ಕಸದಲ್ಲೇ ಅರಳಿದ ಕಲಾಕೃತಿ

ಸಿಕ್ಕ ಸಿಕ್ಕ ಕಡೆಯೆಲ್ಲ ಕಸ ಎಸೆಯುವವರ ಮನೋಭಾವನೆ ಬದಲಾವಣೆ ಮಾಡುವ ದೃಷ್ಟಿಯಿಂದ ಮೈಸೂರು ನಗರ ಪಾಲಿಕೆಯು ತ್ಯಾಜ್ಯದಿಂದಲೇ ಕಣ್ಮನ ಸೆಳೆಯುವ ಕಲಾಕೃತಿಗಳನ್ನು ಸೃಷ್ಟಿಸುವ ಮೂಲಕ ವಿನೂತನ ಮಾರ್ಗವನ್ನು ಅನುಸರಿಸಲು ಶುರು ಮಾಡಿದೆ.

ಸ್ವಚ್ಛ ಮೈಸೂರು-ಸಮರ್ಥ ಮೈಸೂರು ಧ್ಯೇಯವನ್ನು ಸಾಕಾರಗೊಳಿಸುವ ನಿಟ್ಟಿನಲ್ಲಿ ನಗರಪಾಲಿಕೆಯ ಪರಿಸರ ಇಂಜಿನಿಯರಿಂಗ್ ವಿಭಾಗವು ಪೌರಕಾರ್ಮಿಕರು ಹಾಗೂ ಆರೋಗ್ಯ ನಿರೀಕ್ಷಕರ ಸಹಕಾರದದಲ್ಲಿ ಈ ಸಕಾರಾತ್ಮಕ ಹಾದಿಯನ್ನು ಕಂಡುಕೊಂಡಿದೆ. ಇದರಲ್ಲಿ ನಾಗರಿಕರು ಬಿಸಾಡಿದ ವಸ್ತುಗಳನ್ನು ಮರುಬಳಕೆ ಮಾಡಿ ಕಸದ ರಾಶಿಯಾಗಿ ಮಾರ್ಪಟ್ಟು ಹೋಗುವ ಜಾಗಗಳಲ್ಲಿ ಸುಂದರವಾದ ಒಂದು ರೀತಿ ಮಾಡರ್ನ್ ಆರ್ಟ್ ರೀತಿಯ ಕಲಾಕೃತಿಗಳನ್ನು ಸೃಷಿಸುವ ಮೂಲಕ ಕಸ ಎಸೆಯುವ ಪ್ರಕ್ರಿಯೆಗೆ ಕಡಿವಾಣ ಹಾಕಲು ಮುಂದಾಗಿದ್ದಾರೆ.

ಹೊಸತನ: ಕಸ ಬಿದ್ದಿರುವ ಜಾಗವನ್ನು ಸಂಪೂರ್ಣವಾಗಿ ಸ್ವಚ್ಛಗೊಳಿಸಿ, ಅಲ್ಲಿ ಜಾಗದ ಲಭ್ಯತೆಯ ಅನುಸಾರವಾಗಿ ಕಲಾಕೃತಿಗಳನ್ನು ನಿರ್ಮಾಣ ಮಾಡಲಾಗುತ್ತಿದೆ. ಇವುಗಳನ್ನು ಸೃಷ್ಟಿ ಮಾಡಲು ಹೊಸದಾಗಿ ಪದಾರ್ಥವನ್ನು ತಾರದೆ, ಅಲ್ಲೇ ಸಿಗುವ ತ್ಯಾಜ್ಯ ವಸ್ತುಗಳನ್ನು ಅಂದರೆ ಹಳೇ ಟೈರ್, ಪ್ಲಾಸ್ಟಿಕ್ ಬಾಟಲ್, ಬಿದಿರಿನ ಕಟ್ಟಿಗೆಗಳು, ಬಿದಿರ ಬುಟ್ಟಿಗಳು, ಮರದ ತುಂಡುಗಳು, ರಿಪೀಸ್ ಪಟ್ಟಿಗಳು ಸೇರಿದಂತೆ ಇನ್ನಿತರ ತ್ಯಾಜ್ಯಗಳನ್ನು ಮರುಬಳಕೆ ಮಾಡಿ, ಅವುಗಳಿಗೆ ತರಹೇವಾರಿ ಬಣ್ಣ ಬಳಿದು ಡ್ರಾಮಾ ಸ್ಟೇಜ್‌ನಂತೆ ಮಾಡಲಾಗುತ್ತಿದೆ. ಇನ್ನೂ ಸ್ವಲ್ಪ ಜಾಗವಿದ್ದರೆ ಕಾಂಕ್ರೀಟ್ ಇಟ್ಟಿಗೆಗಳನ್ನು ಬಳಸಿಕೊಂಡು ಜನರು ಕೂರಲು ಆಸನ ಸಿದ್ಧಗೊಳಿಸಲಾಗುತ್ತಿದೆ. ಕೆಲವು ಕಡೆ ಮರದ ಬೆಂಚುಗಳನ್ನು ಹಾಕಲಾಗಿದೆ. ಇದರೊಂದಿಗೆ ಸ್ವಚ್ಛತಾ ಅರಿವಿನ ಸಂದೇಶವುಳ್ಳ ಫಲಕಗಳನ್ನು ಅಳವಡಿಸಿ ಜಾಗೃತಿ ಮೂಡಿಸಲಾಗುತ್ತದೆ.

ರಸ್ತೆ ಬದಿಯಲ್ಲಿ, ಪಾರ್ಕುಗಳ ಅಕ್ಕಪಕ್ಕ, ಆಯಕಟ್ಟಿನ ಜಾಗದಲ್ಲಿ ಪ್ರತಿನಿತ್ಯ ಜನರು ಕಸವನ್ನು ತಂದು ಬಿಸಾಡುತ್ತಲೇ ಇರುತ್ತಾರೆ. ಪೌರ ಕಾರ್ಮಿಕರು ವಾಹನಗಳನ್ನು ತಂದು ಆ ಜಾಗದಲ್ಲಿ ಕಸವನ್ನು ಸಂಗ್ರಹಿಸಿ, ವಾಹನಗಳಿಗೆ ತುಂಬಿಕೊಂಡು ಹೋಗುತ್ತಾರೆ. ಅವರು ಅತ್ತ ಹೋಗಿ ಕೆಲವೇ ಗಂಟೆಗಳು ಆಗಿರುವುದಿಲ್ಲ, ಮತ್ತೆ ಅದೇ ಜಾಗಕ್ಕೆ ಜನರು ಕಸವನ್ನು ತಂದು ಸುರಿಯುತ್ತಾರೆ. ಇಂತಹ ಜಾಗಗಳನ್ನು ಗುರುತಿಸಿಕೊಂಡು ಪಾಲಿಕೆಯು ಕಲಾಕೃತಿ ನಿರ್ಮಾಣ ಮಾಡುವ ಅಭಿಯಾನ ಮಾಡುತ್ತಿದೆ. ನಗರದ ವಿಜಯನಗರ 3ನೇ ಹಂತ, ಗೋಕುಲಂ, ಮಹದೇವಪುರ ಮುಖ್ಯರಸ್ತೆ, ಅರವಿಂದನಗರ, ರಾಮಾನುಜ ರಸ್ತೆಯ ಅಕ್ಕಮ್ಮಣ್ಣಿ ಆಸ್ಪತ್ರೆ ಬಳಿ ಸೇರಿದಂತೆ ಸುಮಾರು 50 ಜಾಗದಲ್ಲಿ ಈ ರೀತಿ ನಿರ್ಮಾಣ ಮಾಡಲಾಗಿದೆ. ಇನ್ನೂ ಹಲವು ಕಡೆ ಮಾಡಲಾಗುತ್ತಿದೆ. ಇದು ಹೀಗೆ ಮುಂದುವರಿದುಕೊಂಡು ಹೋಗುತ್ತದೆ ಎಂದು ಪಾಲಿಕೆ ಅಧಿಕಾರಿಗಳು ತಿಳಿಸಿದ್ದಾರೆ.

ಈ ಕಲಾಕೃತಿಗಳನ್ನು ತಯಾರು ಮಾಡಲು ಪಾಲಿಕೆಯಿಂದ ಪ್ರತ್ಯೇಕ ಅನುದಾನವಿಲ್ಲ. ಆಯಾ ಭಾಗದ ಸ್ಥಳೀಯ ಮುಖಂಡರ ಸಹಕಾರ ಪಡೆದುಕೊಂಡು ಇಂತಹ ಸತ್ಕಾರ್ಯ ನಡೆಸಲಾಗುತ್ತಿದೆ.

ಸ್ವಚ್ಛತೆ ಪಾಠವನ್ನು, ಅರಿವಿನ ಬೋಧನೆಯನ್ನು ಮಾಡುವ ಈ ಪರಿಕಲ್ಪನೆಗೆ ಆಯಾ ವ್ಯಾಪ್ತಿಯ ಪೌರ ಕಾರ್ಮಿಕರೇ ಕಲೆಗಾರರು. ಅವರೇ ಪರಿಣಿತ ವಾಸ್ತುಶಿಲ್ಪಕಾರರಂತೆ ವಿನ್ಯಾಸ ಮಾಡುತ್ತಾರೆ. ಅವರಿಗೆ ಪಾಲಿಕೆಯ ಹಿರಿಯ ಅಧಿಕಾರಿಗಳು ಬೆಂಬಲವಾಗಿ ನಿಂತು, ಹೊಸ-ಹೊಸ ವಿನ್ಯಾಸವನ್ನು ಹೇಳಿಕೊಡುತ್ತಾರೆ. ಅದರಂತೆ ಪೌರಕಾರ್ಮಿಕರು ಅನುಷ್ಠಾನಗೊಳಿಸುತ್ತಿದ್ದಾರೆ.

ಹಿಂದೆಲ್ಲ ಸ್ವಚ್ಛನಗರಿ ಎನ್ನುವ ಗರಿಯನ್ನು ಗಳಿಸಿಕೊಂಡಿದ್ದ ಸಾಂಸ್ಕೃತಿಕ ನಗರಿ ಮೈಸೂರಿನಲ್ಲಿ ಇತ್ತೀಚಿನ ದಿನಗಳಲ್ಲಿ ಕಂಡ ಕಂಡಲ್ಲಿ ಕಸ ಸುರಿಯುವುದು ಹೆಚ್ಚಾಗುತ್ತಿದೆ. ಈ ಪ್ರವೃತ್ತಿ ಕಡಿಮೆಯಾಗಬೇಕಾದರೆ ಮೊದಲು ಕಸ ಸುರಿಯುವವರ ಮನಸ್ಥಿತಿ ಬದಲಾಗಬೇಕು. ಇಲ್ಲಿ ಕಸ ಬಿಸಾಡಬಾರದು ಸ್ವಚ್ಛತೆ ಕಾಪಾಡಿಕೊಳ್ಳಬೇಕು ಎಂಬ ಸ್ವಯಂ ಜಾಗೃತಿ ಅವರಲ್ಲೇ ಮೂಡಬೇಕು. ಈ ನಿಟ್ಟಿನಲ್ಲಿ ಕಸದಿಂದ ತುಂಬಿ ತುಳುಕುತ್ತಿದ್ದ ಸ್ಥಳಗಳನ್ನು ಕಸ ಮುಕ್ತವಾಗಿ ಮಾಡಲಾಗುತ್ತಿರುವ ಕಾರ್ಯ ಶ್ಲಾಘನೀಯ. ಅಲ್ಲಿನ ಅಲಂಕೃತ ಸ್ಥಳ ನೋಡಿಯೇ ಇಲ್ಲಿ ಕಸ ಬಿಸಾಡಬಾರದು, ಸ್ವಚ್ಛತೆ ಕಾಪಾಡಬೇಕು ಎಂಬ ಭಾವನೆ ಜನರ ಮನಸ್ಸಿನಲ್ಲಿ ಮೂಡಬೇಕು ಎಂದು ಕಾಳಜಿಯುಳ್ಳ ನಾಗರಿಕರು ಆಶಯ ವ್ಯಕ್ತಪಡಿಸುತ್ತಿದ್ದಾರೆ.

"

ಸಾರ್ವಜನಿಕರು ಕಸ ಬಿಸಾಡುವ ಸ್ಥಳಗಳನ್ನು ಗುರ್ತಿಸಿ, ಸ್ವಚ್ಛತೆ ಮಾಡಿ, ಹೊಸ ರೂಪದ ಸ್ಪರ್ಶ ನೀಡಲಾಗುತ್ತಿದೆ. ಈ ಕೆಲಸವನ್ನು ಬಹಳ ಆಸಕ್ತಿಯಿಂದ, ಪರಿಶ್ರಮವಹಿಸಿ ಮಾಡುತ್ತಿರುವ ಪೌರಕಾರ್ಮಿಕರು ಮತ್ತು ಆರೋಗ್ಯ ನಿರೀಕ್ಷರಿಗೆ ಎಲ್ಲ ಶ್ರೇಯ ಸಲ್ಲಬೇಕು. ಕಂಡ ಕಂಡಲ್ಲಿ ಕಸ ಬಿಸಾಡುವ ಮನಸ್ಥಿತಿ ದೂರಾದರೆ, ಈ ವಿನೂತನ ಕಾರ್ಯ ಹಮ್ಮಿಕೊಂಡಿರುವುದಕ್ಕೂ ಸಾರ್ಥಕತೆ ದೊರೆಯಲಿದೆ.

— ಮೃತ್ಯುಂಜಯ, ಕಾರ್ಯಪಾಲಕ ಇಂಜಿನಿಯರ್, ಪರಿಸರ ವಿಭಾಗ, ಮೈಸೂರು ನಗರಪಾಲಿಕೆ