‘ಕೃಷಿ ಮೇಳ’ಕ್ಕೆ ಮೆರುಗು ನೀಡಿದ ಭವ್ಯ ಮೆರವಣಿಗೆ

ನಗರದ ಸುಣ್ಣದಕೇರಿಯ ಶ್ರೀ ಮಹದೇಶ್ವರಸ್ವಾಮಿ ದೇವಸ್ಥಾನದಲ್ಲಿ ಪೂಜೆ ಸಲ್ಲಿಸುವ ಮೂಲಕ ಗಣ್ಯರು ಮೆರವಣಿಗೆಗೆ ಚಾಲನೆ ನೀಡಿದರು. ಶಾಸಕ ಟಿ.ಎಸ್.ಶ್ರೀವತ್ಸ, ವಿಆರ್‌ಎಲ್ ಮೀಡಿಯಾ ಪ್ರೈವೇಟ್ ಲಿಮಿಟೆಡ್‌ನ ಹಿರಿಯ ಉಪಾಧ್ಯಕ್ಷ ಅರುಣ್ ಕರಡಿ, ವಿಜಯವಾಣಿ ಸಂಪಾದಕ ಕೆ.ಎನ್.ಚನ್ನೇಗೌಡ, ಮೈಸೂರು ಬ್ಯುರೊ ಮುಖ್ಯಸ್ಥ ಎಂ.ಆರ್.ಸತ್ಯನಾರಾಯಣ, ವಿಜಯವಾಣಿ ಡಿಜಿಟಲ್ ವಿಭಾಗದ ಮುಖ್ಯಸ್ಥ ಸಿದ್ದು ಕಾಳೋಜಿ, ರಾಜ್ಯೋತ್ಸವ ಪ್ರಶಸ್ತಿ ಪುರಸ್ಕೃತ ಡಾ.ಯೋಗೇಂದ್ರ ಮಾದಪ್ಪ ಸೇರಿದಂತೆ ಇತರ ಗಣ್ಯರು ದೇಗುಲದ ಹೊರ ಭಾಗದಲ್ಲಿ ‘ಬಸವ’ ಹಾಗೂ ದೇವರ ಪಟಕ್ಕೆ ಪೂಜೆ ಸಲ್ಲಿಸಿ ‘ಮೂರು ದಿನಗಳ ಕೃಷಿ ಮೇಳ ಯಶಸ್ವಿಯಾಗಲಿ’ ಎಂದು ಶುಭ ಹಾರೈಸಿದರು.

ತಲಕಾಡಿನ ಗೌತಮಿ ಟ್ರಸ್ಟ್‌ನ ಕೃಷ್ಣಮೂರ್ತಿ ಕಲಾ ತಂಡದ ಡೊಳ್ಳು ಕುಣಿತ, ನಗಾರಿ ತಂಡ, ಮದ್ದೂರು ತಾಲೂಕಿನ ನಂಜಿನಾಯಕನಹಳ್ಳಿಯ ಮಹಿಳಾ ಕೋಲಾಟ ಸಂಘ, ಮಳವಳ್ಳಿ ತಾಲೂಕಿನ ಕೋರೆಗಾಲದ ಪಟದ ಕುಣಿತ, ಎಚ್.ಡಿ.ಕೋಟೆ ತಾಲೂಕಿ ಆದಿವಾಸಿ ಕಲಾ ತಂಡ, ಕೆಂಪಿಸಿದ್ದನಹುಂಡಿಯ ಮಹದೇವು ನೇತೃತ್ವದ ಕಂಸಾಳೆ ತಂಡ ಹಾಗೂ ಶ್ರೀ ಧರ್ಮಸ್ಥಳ ಗ್ರಾಮಾಭಿವೃದ್ಧಿ ಸಂಸ್ಥೆಯ ಹೆಂಗಳೆಯರು ಮೆರವಣಿಗೆಯಲ್ಲಿ ಸಾಗಿದರು. ರಸ್ತೆಯುದ್ದಕ್ಕೂ ವಿವಿಧ ಕಲಾ ತಂಡಗಳು ಆಕರ್ಷಕ ನೃತ್ಯ, ಪ್ರದರ್ಶನ ನೀಡುವ ಮೂಲಕ ಮೆರವಣಿಗೆ ಸೊಬಗು ಹೆಚ್ಚಿಸಿದವು. ಕೃಷಿ ಮೇಳದ ಬಗ್ಗೆ ಅರಿವು ಮೂಡಿಸುವಂತಹ ಬ್ಯಾನರ್‌ಗಳನ್ನು ಹಿಡಿದ ಸಿಬ್ಬಂದಿ ಮೆರವಣಿಗೆಯಲ್ಲಿ ಹೆಜ್ಜೆ ಹಾಕಿದರು. ಗ್ರಾಮೀಣ ಸೊಗಡನ್ನು ಬಿಂಬಿಸುವ ಎತ್ತಿನ ಗಾಡಿಗಳು ಸಹ ಶಿಸ್ತುಬದ್ಧವಾಗಿ ಸಾಗುವ ಮೂಲಕ ಮೆರವಣಿಗೆ ಸೊಬಗನ್ನು ಹೆಚ್ಚಿಸಿದವು.

ಶಾಂತಲಾ ಚಿತ್ರಮಂದಿರದ ಸಿಗ್ನಲ್ ಮೂಲಕ ಚಾಮರಾಜ ಜೋಡಿ ರಸ್ತೆಯಲ್ಲಿ ಸಾಗಿ ಬಂದ ಮೆರವಣಿಗೆ ರಾಮಸ್ವಾಮಿ ವೃತ್ತವನ್ನು ದಾಟಿ ಮೇಳ ಆಯೋಜನೆಗೊಂಡಿದ್ದ ಮಹಾರಾಜ ಕಾಲೇಜು ಮೈದಾನದಲ್ಲಿ ಸಮಾಪನಗೊಂಡಿತು.