ರಂಗಾಯಣದ ಚಿಣ್ಣರ ಮೇಳಕ್ಕೆ ಅದ್ದೂರಿ ತೆರೆ

ಸದಾ ಅಮ್ಮನ ಸೆರಗು ಹಿಡಿದು ತಿಂಡಿ ತಿನಿಸುಗಳಿಗಾಗಿ ರಚ್ಚೆ ಹಿಡಿಯುವ ಮಕ್ಕಳು ಸೋಮವಾರ ರಂಗಾಯಣದ ಅಂಗಳದಲ್ಲಿ ಅಮ್ಮ ಮಾಡಿಕೊಟ್ಟ ತಿಂಡಿ ತಿನಿಸುಗಳನ್ನು ಮಾರಾಟ ಮಾಡಿ ಗಮನ ಸೆಳೆದರು.

ಚಿಣ್ಣರ ಮೇಳದ ಅಂಗವಾಗಿ ಚಿಣ್ಣರ ಸಂತೆ ಆಯೋಜಿಸಲಾಗಿತ್ತು. ಭಾಗವಹಿಸಿದ್ದ 350ಕ್ಕೂ ಹೆಚ್ಚಿನ ಚಿಣ್ಣರು ಬೆಳಗ್ಗೆ 10 ಗಂಟೆ ನಂತರ ವ್ಯಾಪಾರಕ್ಕೆ ಇಳಿದು ಗಮನ ಸೆಳೆದರು.

ತಮ್ಮ ಮುದ್ದು ಮಗು ಬಿಸಿಲಿನಲ್ಲಿ ನಿಂತು ವ್ಯಾಪಾರದಲ್ಲಿ ತೊಡಗಿದ್ದಾಗ ಅಮ್ಮಂದಿರು ಮಕ್ಕಳಿಗೆ ಪ್ರೋತ್ಸಾಹ ನೀಡುತ್ತಿದ್ದ ದೃಶ್ಯ ಕಂಡುಬಂತು. 1ರೂ. ವ್ಯಾಪಾರವಾದರೂ ಮಕ್ಕಳು ಹಣವನ್ನು ಅಮ್ಮಂದಿರ ಕೈಗೆ ಒಪ್ಪಿಸಿ ಮತ್ತೆ ವ್ಯಾಪಾರಕ್ಕೆ ಇಳಿಯುತ್ತಿದ್ದರು. ಎಷ್ಟು ವ್ಯಾಪಾರ ಮಾಡಿದೆ ಎಂದು ಮಕ್ಕಳನ್ನು ಪ್ರಶ್ನಿಸಿದರೆ ಕೆಲವರು ‘ಗೊತ್ತಿಲ್ಲ, ಎಲ್ಲ ಹಣವನ್ನು ಅಮ್ಮನ ಕೈಗೆ ಕೊಟ್ಟಿದ್ದೇನೆ’ ಎಂದು ಮುಗ್ಧವಾಗಿ ಉತ್ತರಿಸುತ್ತಿದ್ದರು. ಇನ್ನು ಕೆಲವರು ಪಟ ಪಟ ಲೆಕ್ಕ ಮಾಡಿ ಒಂದೇ ಉಸಿರಿನಲ್ಲಿ ಹೇಳುತ್ತಿದ್ದರು.

ಅಮ್ಮಾ ಇಲ್ಲಿ ಬನ್ನೀ, ಆಂಟಿ ಚಕ್ಕುಲಿ, ಕೋಡುಬಳೆ ತಗೊಳ್ಳಿ, ಇದು ಮನೆಯಲ್ಲೇ ತಯಾರಿಸಿದ್ದು, ನಾನೇ ತಯಾರಿಸಿರುವುದು. ಕೇವಲ 5 ರೂ. ಎರಡು ತಗೊಂಡ್ರೆ 10 ರೂ.ತಗೊಳ್ಳಿ ಅಮ್ಮಾ... ತಗೊಳ್ಳಿ ಅಣ್ಣಾ.. ಪ್ಲೀಸ್ ತಗೊಳ್ಳಿ ಮಾಮ... ಎಂದು ಕೂಗಿ ಕರೆಯುತ್ತಿದ್ದ ಚಿಣ್ಣರು ದೈನಂದಿನ ಜೀವನದಲ್ಲಿ ವ್ಯಾಪಾರ-ವಹಿವಾಟಿನ ಬಗ್ಗೆ ಕೆಲ ವಿಚಾರಗಳನ್ನು ತಿಳಿದುಕೊಂಡರು. ಒಟ್ಟಾರೆ ರಂಗಾಯಣದಲ್ಲಿ ತಾಯಿ ಮತ್ತು ಮಗುವಿನ ಬಾಂಧವ್ಯ ಅನಾವರಣಗೊಂಡಿತು. ಚಕ್ಕುಲಿ, ಕೋಡುಬಳೆ, ನಿಪ್ಪಿಟ್ಟು, ಚುರುಮುರಿ, ರವೆ ಉಂಡೆ, ಕಡಲೇಪುರಿ, ಮಿಠಾಯಿ ಇದ್ದರೆ, ಮತ್ತೊಂದೆಡೆ ಎಳನೀರು, ಜ್ಯೂಸ್, ಮಜ್ಜಿಗೆ, ಫ್ರೂಟ್ ಸಲಾಡ್‌ಗಳು ಬಂದಿದ್ದವರ ದಾಹ ತೀರಿಸಿದವು.

ಸಂತೆಗೆ ಮತ್ತಷ್ಟು ಮೆರುಗು ನೀಡುವ ನಿಟ್ಟಿನಲ್ಲಿ ತಾಜಾ ತರಕಾರಿಗಳನ್ನು ಮಾರಾಟ ಮಾಡಲಾಯಿತು. ಟೊಮ್ಯಾಟೊ, ಬದನೆಕಾಯಿ, ಬೆಂಡೆಕಾಯಿ, ತೆಂಗಿನಕಾಯಿ, ನುಗ್ಗೇಕಾಯಿ, ಬೀನ್ಸ್ ಹಾಗೂ ಕ್ಯಾರೆಟ್ ಮಾರಾಟ ಜೋರಾಗಿ ನಡೆಯಿತು. ಮನೆ ಅಲಂಕರಿಸುವ ಹೂ ಕುಂಡಗಳು, ಬಣ್ಣ ಬಣ್ಣದ ಸರಗಳು, ಓಲೆಗಳು, ಹೇರ್‌ಪಿನ್‌ಗಳು, ಬಳೆಗಳು ಹೆಣ್ಣು ಮಕ್ಕಳು ಮತ್ತು ಮಹಿಳೆಯರ ಗಮನ ಸೆಳೆಯಿತು.

ಬೆಳಗ್ಗೆ ಆಯೋಜಿಸಿದ್ದ ಚಿಣ್ಣರ ಸಂತೆಯಲ್ಲಿ ನಾನಾ ಬಗೆಯ ವ್ಯಾಪಾರ ಮಾಡಿದ್ದ ಚಿಣ್ಣರೆಲ್ಲರೂ ಸಂಜೆ ನೀರಿನಲ್ಲಿ ಆಡಿ ಸಂಭ್ರಮಿಸಿದರು. ಅರ್ಧ ಗಂಟೆಗೂ ಹೆಚ್ಚು ಕಾಲ ನೀರಿನಲ್ಲಿ ಮಿಂದೆದ್ದರು. ಟ್ಯಾಂಕರ್‌ನಲ್ಲಿ ತಂದ ನೀರನ್ನು ಕಡಾಯಿಗಳಲ್ಲಿ ತುಂಬಿಸಲಾಯಿತು. ಚಿಣ್ಣರು ಮಗ್ಗುಗಳಲ್ಲಿ ನೀರಿನ್ನೆರಚಾಡಿ ನಲಿದರು. ಧನಂಜಯ್, ಯತೀಶ್ ಕೊಳ್ಳೇಗಾಲ ಸೇರಿದಂತೆ ರೆಪರ್ಟರಿ ಶಿಕ್ಷಕರು ಹಾಡಿದ ರಂಗಗೀತೆಗಳು, ಜಾನಪದ ಗೀತೆಗಳಿಗೆ ಮಕ್ಕಳು ಕುಣಿದರು.