ವಿಶ್ವದತ್ತ ದಸರಾ ಕಾವ್ಯಯಾನ..!

ನಾಡಹಬ್ಬ ಮೈಸೂರು ದಸರಾ ಕವಿಗೋಷ್ಠಿ ಈ ಬಾರಿ ಕೇವಲ ಕವಿಗಳ ಕಾವ್ಯವಾಚನದ ವೇದಿಕೆಯಾಗದೆ, ಸಮಾಜದ ಕಟ್ಟಕಡೆಯ ವ್ಯಕ್ತಿಯ ಭಾವನೆಗಳಿಗೂ ಧ್ವನಿ ನೀಡುವ ಜತೆಗೆ ವಿಶ್ವದ ಕನ್ನಡಿಗರನ್ನು ಕಾವ್ಯದ ಮೂಲಕ ಬೆಸೆಯುವ ವಿಶಿಷ್ಟ ಪ್ರಯತ್ನಕ್ಕೆ ಸಾಕ್ಷಿಯಾಗಲಿದೆ.

ದಸರಾ ಮಹೋತ್ಸವದ ಅಂಗವಾಗಿ ಅ.13ರಿಂದ 17ರವರೆಗೆ ನಗರದ ಮಾನಸಗಂಗೋತ್ರಿಯ ಕುವೆಂಪು ಕನ್ನಡ ಅಧ್ಯಯನ ಸಂಸ್ಥೆಯ ಬಿ.ಎಂ.ಶ್ರೀ. ಸಭಾಂಗಣದಲ್ಲಿ ಐದು ದಿನಗಳ ಕಾಲ ವೈವಿಧ್ಯಮಯ ಕವಿಗೋಷ್ಠಿ ನಡೆಯಲಿದೆ. ಆದರೆ ಈ ಬಾರಿ ಕವಿಗೋಷ್ಠಿಯ ವಿಶೇಷತೆ ಕೇವಲ ವೇದಿಕೆಯಲ್ಲಿ ನಡೆಯುವ ಕಾರ್ಯಕ್ರಮಕ್ಕೆ ಸೀಮಿತವಾಗಿಲ್ಲ. ಕವಿತೆಯನ್ನು ಜನರ ಬಳಿಗೆ ಕೊಂಡೊಯ್ಯುವ ಉದ್ದೇಶದಿಂದ ಕವಿಗೋಷ್ಠಿಗೆ ಸುಮಾರು 20 ದಿನ ಮುಂಚಿತವಾಗಿ ಜಿಲ್ಲೆಯಲ್ಲಿ ಪ್ರಚಾರ ತೇರು ಸಂಚರಿಸಿ ಕವಿಗೋಷ್ಠಿಯ ಕುರಿತು ಜನರಲ್ಲಿ ಆಸಕ್ತಿ ಮೂಡಿಸುವ ಕಾರ್ಯ ಮಾಡಲಾಗುವುದು.

ಸಾಮಾನ್ಯವಾಗಿ ದಸರಾ ಕವಿಗೋಷ್ಠಿ ಎಂದರೆ ಸಾಹಿತಿಗಳು, ಕವಿಗಳು ಹಾಗೂ ಸಾಹಿತ್ಯ ಕ್ಷೇತ್ರದಲ್ಲಿ ಗುರುತಿಸಿಕೊಂಡವರ ಕಾವ್ಯವಾ ಚನಕ್ಕೆ ಸೀಮಿತವಾಗಿರುವ ಚಿತ್ರಣ ಕಾಣುತ್ತದೆ. ಆದರೆ, ಈ ಬಾರಿ ಆ ಚೌಕಟ್ಟನ್ನು ವಿಸ್ತರಿಸುವ ಪ್ರಯತ್ನ ನಡೆದಿದೆ. ರೈತರು, ಶಕ್ತಿಧಾಮದಲ್ಲಿ ನೆಲೆಸಿರುವವರು, ಮನೆಗೆಲಸದಲ್ಲಿ ತೊಡಗಿರುವವರು, ಕೈದಿಗಳು, ಅಂಗವಿಕಲರು ಸೇರಿದಂತೆ ಸಮಾಜದ ವಿವಿಧ ವರ್ಗಗಳಲ್ಲಿರುವ ಕಾವ್ಯಪ್ರತಿಭೆಗಳನ್ನು ಗುರುತಿಸಿ ಅವರಿಗೆ ಕವನ ವಾಚನಕ್ಕೆ ಅವಕಾಶ ಕಲ್ಪಿಸುವ ಉದ್ದೇಶವನ್ನು ಉಪಸಮಿತಿ ಹೊಂದಿದೆ. ಈ ವರ್ಗಗಳಲ್ಲಿರುವ ಅರ್ಹರನ್ನು ಸಮಿತಿ ಗುರುತಿಸುವ ಕಾರ್ಯ ಕೈಗೊಳ್ಳಲಿದೆ.

ಈ ಬಾರಿ ಕವಿಗೋಷ್ಠಿಯನ್ನು ವಿಶ್ವದ ವಿವಿಧೆಡೆ ನೆಲೆಸಿರುವ ಕನ್ನಡಿಗರಿಗೂ ತಲುಪಿಸುವ ಮತ್ತೊಂದು ಪ್ರಯತ್ನ ನಡೆಯುತ್ತಿದೆ. ವಿದೇಶಗಳಲ್ಲಿ ನೆಲೆಸಿರುವ ಕನ್ನಡಿಗರಿಗೆ ಆನ್‌ಲೈನ್ ಮೂಲಕ ಕವನ ವಾಚನಕ್ಕೆ ಅವಕಾಶ ನೀಡುವ ಚಿಂತನೆ ನಡೆದಿದೆ. ಯೋಜನೆ ಕಾರ್ಯರೂಪಕ್ಕೆ ಬಂದರೆ ಮೈಸೂರು ದಸರಾ ಕವಿಗೋಷ್ಠಿಯ ಕಾವ್ಯಧ್ವನಿ ದೇಶದ ಗಡಿ ದಾಟಿ ವಿದೇಶಗಳಲ್ಲಿಯೂ ಮೊಳಗಲಿದೆ.

ದಸರಾ ಕವಿಗೋಷ್ಠಿಗೆ ಜಾಗತಿಕ ಸ್ಪರ್ಶ ನೀಡುವ ಇಂತಹ ಪ್ರಯತ್ನ ನಡೆಯುತ್ತಿರುವ ಹಿನ್ನೆಲೆಯಲ್ಲಿ ಈ ಬಾರಿಯ ಕವಿಗೋಷ್ಠಿ ರಾಜ್ಯದ ಸಾಹಿತ್ಯ ವಲಯದ ಕಾರ್ಯಕ್ರಮವಾಗಿರದೆ, ವಿಶ್ವದ ಕನ್ನಡಿಗರನ್ನು ಬೆಸೆಯುವ ಕಾವ್ಯ ವೇದಿಕೆಯಾಗುವ ನಿರೀಕ್ಷೆ ಮೂಡಿಸಿದೆ.

ಈ ಬಾರಿಯ ದಸರಾ ಕವಿಗೋಷ್ಠಿಯಲ್ಲಿ ಯುವ ಕವಿಗೋಷ್ಠಿ, ಚಿಗುರು ಕವಿಗೋಷ್ಠಿ, ಹಾಸ್ಯ/ಚುಟುಕು ಗೋಷ್ಠಿ, ಜನಪದ ಕಾವ್ಯಗೋಷ್ಠಿ ಹಾಗೂ ಪ್ರಧಾನ ಕವಿಗೋಷ್ಠಿಗಳನ್ನು ಆಯೋಜಿಸಲಾಗಿದೆ.

ಯುವ ಕವಿಗೋಷ್ಠಿಗೆ ಅರ್ಜಿ ಸಲ್ಲಿಸುವವರು ಕನಿಷ್ಠ ಒಂದು ಕವನ ಸಂಕಲನ ಪ್ರಕಟಿಸಿರಬೇಕು. ಚಿಗುರು, ಹಾಸ್ಯ/ಚುಟುಕು ಹಾಗೂ ಜನಪದ ಕಾವ್ಯಗೋಷ್ಠಿಗಳಿಗೆ ತಮ್ಮ ಕವನದೊಂದಿಗೆ ಪ್ರತ್ಯೇಕವಾಗಿ ಅರ್ಜಿ ಸಲ್ಲಿಸಬಹುದು. ಪ್ರಧಾನ ಕವಿಗೋಷ್ಠಿಯಲ್ಲಿ ರಾಜ್ಯದ ಪ್ರತಿಯೊಂದು ಜಿಲ್ಲೆಯಿಂದ ತಲಾ ಒಬ್ಬರಿಗೆ ಅವಕಾಶ ನೀಡಲಾಗುತ್ತಿದ್ದು, ಅರ್ಜಿದಾರರು ಕನಿಷ್ಠ ಎರಡು ಕವನ ಸಂಕಲನಗಳನ್ನು ಪ್ರಕಟಿಸಿರಬೇಕೆಂಬ ನಿಯಮವಿದೆ.

ಈ ಬಾರಿಯ ದಸರಾ ಕವಿಗೋಷ್ಠಿಯ ಮತ್ತೊಂದು ಗಮನಾರ್ಹ ನಿರ್ಧಾರವೆಂದರೆ ಕಳೆದ ಎರಡು ವರ್ಷಗಳಲ್ಲಿ ದಸರಾ ಕವಿಗೋಷ್ಠಿಯಲ್ಲಿ ಭಾಗವಹಿಸಿದವರಿಗೆ ಈ ಬಾರಿ ಅವಕಾಶ ನೀಡದಿರುವುದು. ದಸರಾ ಕವಿಗೋಷ್ಠಿಯ ಇತಿಹಾಸದಲ್ಲಿ ಹಲವು ಬಾರಿ ಹಿಂದೆ ಭಾಗವಹಿಸಿದವರೇ ಮತ್ತೆ ಮತ್ತೆ ವೇದಿಕೆ ಏರುತ್ತಿದ್ದರೆ, ಹೊಸ ಕವಿಗಳಿಗೆ ಅವಕಾಶ ಸಿಗುವುದಿಲ್ಲ ಎಂಬ ಅಭಿಪ್ರಾಯ ಇತ್ತು. ಈ ಬಾರಿ ಅದಕ್ಕೆ ಬ್ರೇಕ್ ಹಾಕಿ ಹೊಸಬರಿಗೆ ಅವಕಾಶ ಕಲ್ಪಿಸಿರುವುದು ಸಾಹಿತ್ಯಾಸಕ್ತರ ಗಮನ ಸೆಳೆದಿದೆ. ಕವಿಯ ಹೆಸರು, ಪರಿಚಯ ಅಥವಾ ಹಿಂದಿನ ಸಾಧನೆಗಿಂತ ಕವಿತೆಯ ಪ್ರಬುದ್ಧತೆಯೇ ಆಯ್ಕೆಯ ಅಂತಿಮ ಮಾನದಂಡವಾಗಲಿದೆ ಎಂಬ ನಿಲುವು ಹೊಸ ಪ್ರತಿಭೆಗಳಿಗೆ ಭರವಸೆ ಮೂಡಿಸಿದೆ.

ಆಸಕ್ತ ಕವಿಗಳು ತಮ್ಮ ಸ್ವವಿವರ ಹಾಗೂ ಕವನ ಸಂಕಲನಗಳೊಂದಿಗೆ ಸೆ.15ರೊಳಗೆ ಕಾರ್ಯಾಧ್ಯಕ್ಷರು, ದಸರಾ ಕವಿಗೋಷ್ಠಿ ಉಪಸಮಿತಿ, ಕುವೆಂಪು ಕನ್ನಡ ಅಧ್ಯಯನ ಸಂಸ್ಥೆ, ಮಾನಸಗಂಗೋತ್ರಿ, ಮೈಸೂರು-570006 ಇಲ್ಲಿಗೆ ನೇರವಾಗಿ ಅಥವಾ ನೋಂದಾಯಿತ ಅಂಚೆ ಮೂಲಕ ಅರ್ಜಿ ಸಲ್ಲಿಸಬೇಕು.

ನಂಜಯ್ಯ ಹೊಂಗನೂರು, ಕಾರ್ಯಾಧ್ಯಕ್ಷ, ದಸರಾ ಕವಿಗೋಷ್ಠಿ ಉಪಸಮಿತಿ