ಮೈಸೂರು

ನಗರದಲ್ಲಿ ‘ಸೈಕ್ಲಿಂಗ್ ವೆಲೋಡ್ರೋಮ್’

ಸೈಕ್ಲಿಸ್ಟ್‌ಗಳು
ಸೈಕ್ಲಿಸ್ಟ್‌ಗಳು
ಅವಿನಾಶ್ ಜೈನಹಳ್ಳಿ
Published on: 

ಪ್ರಮುಖ ಮುಖ್ಯಾಂಶಗಳು

  • 10 ಕೋಟಿ ರೂ.ವೆಚ್ಚ
  • ಈ ಬಾರಿಯ ಬಜೆಟ್‌ನಲ್ಲಿ ಘೋಷಣೆ
ಅವಿನಾಶ್ ಜೈನಹಳ್ಳಿ ಮೈಸೂರು
ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಸಾಧನೆ ಮಾಡಲು ಕನಸು ಹೊತ್ತಿರುವ ಮೈಸೂರು ಭಾಗದ ಸೈಕ್ಲಸ್ಟ್‌ಗಳಿಗೆ ಇಲ್ಲೊಂದಿದೆ ಸಿಹಿ ಸುದ್ದಿ...!
ಸಾಂಸ್ಕೃತಿಕ ನಗರಿ ಮೈಸೂರಿನಲ್ಲಿ ಅಂತಾರಾಷ್ಟ್ರೀಯ ಮಟ್ಟದ ‘ಸೈಕ್ಲಿಂಗ್ ವೆಲೋಡ್ರೋಮ್’ ನಿರ್ಮಾಣಕ್ಕೆ ಸರ್ಕಾರ ಮುಂದಾಗಿದ್ದು, ಇದು ಸೈಕ್ಲಿಸ್ಟ್‌ಗಳ ಬಹು ವರ್ಷಗಳ ಕನಸು ನನಸಾಗುವಂತಾಗಿದೆ.
ಮುಖ್ಯಮಂತ್ರಿ ಸಿದ್ದರಾಮಯ್ಯ ಅವರು ಕಳೆದ ಬಾರಿಯ ಬಜೆಟ್‌ನಲ್ಲಿಯೇ ಮೈಸೂರಿನಲ್ಲಿ ಸೈಕ್ಲಿಂಗ್ ವೆಲೋಡ್ರೋಮ್ ನಿರ್ಮಾಣಕ್ಕೆ ಅಸ್ತು ಎಂದಿದ್ದರು. ಆದರೆ, ಸೂಕ್ತ ಸ್ಥಳ ಹಾಗೂ ನಾನಾ ಕಾರಣಗಳಿಂದ ನಿರ್ಮಾಣದ ಕನಸು ಕೈಗೂಡಲಿಲ್ಲ. ಮತ್ತೆ ಈ ಬಾರಿಯ ಬಜೆಟ್ ನಲ್ಲಿ ಮೈಸೂರಿನಲ್ಲಿ ಸೈಕ್ಲಿಂಗ್ ವೆಲೋಡ್ರೋಮ್ ನಿರ್ಮಾಣ ಮಾಡುವುದಾಗಿ ಘೋಷಿಸಿದ್ದಾರೆ. ಇದಕ್ಕೆ ಬೇಕಾದ ಜಾಗವೂ ಅಂತಿಮವಾಗಿದ್ದು, ಸಚಿವ ಸಂಪುಟದಲ್ಲೂ ಅನುಮೋದನೆ ನೀಡಲಾಗಿದೆ.

ರಾಜ್ಯದ ಎರಡು ಅಂಕಣ

ಸೈಕ್ಲಿಂಗ್ ಒಲಿಂಪಿಕ್ಸ್ ಕ್ರೀಡೆಯಾಗಿದ್ದು, ಇದರಲ್ಲಿ ರೋಡ್ ಸೈಕ್ಲಿಂಗ್, ಆಫ್ ರೋಡಿಂಗ್ ಸೈಕ್ಲಿಂಗ್ ಮತ್ತು ಟ್ರ್ಯಾಕ್ ಸೈಕ್ಲಿಂಗ್ ವಿಭಾಗ ಇರಲಿದೆ. ವೆಲೋಡ್ರೋಮ್ ಸೈಕ್ಲಿಂಗ್ ಒಳಾಂಗಣ ಮತ್ತು ಹೊರಾಂಗಣ ವಿಭಾಗದಲ್ಲಿ ನಡೆಯಲಿದೆ. ಹೊಸದಿಲ್ಲಿಯಲ್ಲಿ ಮಾತ್ರ ಒಳಾಂಗಣ ವೆಲೋಡ್ರೋಮ್ ಕ್ರೀಡಾಂಗಣವಿದೆ. ಕರ್ನಾಟಕ ಚಂದ್ರಗಿರಿ ಕ್ರೀಡಾನಿಲಯ ಮತ್ತು ಇತ್ತೀಚೆಗೆ ಅನಾವರಣಗೊಂಡ ವಿಜಯಪುರದಲ್ಲಿ ವೆಲೋಡ್ರೋಮ್ ಅಂಕಣವಿದೆ. ಶೀಘ್ರದಲ್ಲೇ ಈ ಸಾಲಿಗೆ ಮೈಸೂರು ಸೇರಲಿದೆ.
ಸದ್ಯಕ್ಕೆ ಜಿಲ್ಲೆಯಲ್ಲಿ ಸೈಕ್ಲಿಂಗ್‌ನ ಎರಡು ವಿಭಾಗದಲ್ಲಿ ಚಾಂಪಿಯನ್ಸ್‌ಗಳಿದ್ದಾರೆ. ಹಾಗೆಯೇ ರಾಷ್ಟ್ರೀಯ-ಅಂತಾರಾಷ್ಟ್ರೀಯ ಮಟ್ಟದ ಪ್ರಶಸ್ತಿಗಳನ್ನು ಗೆದ್ದು ಬೀಗಿದವರು ಇಲ್ಲಿದ್ದಾರೆ. ಆದರೆ, ಇದುವರೆಗೂ ವೆಲೋಡ್ರೋಮ್ ಸೈಕ್ಲಿಂಗ್‌ನಲ್ಲಿ ಚಾಂಪಿಯನ್ಸ್‌ಗಳು ಇಲ್ಲ. ಇದಕ್ಕೆ ಇಲ್ಲಿಯವರೆಗೂ ಕ್ರೀಡಾಂಗಣ ನಿರ್ಮಾಣವಾಗದಿರುವುದೇ ಕಾರಣವಾಗಿತ್ತು. ಈಗ ಮುಖ್ಯಮಂತ್ರಿ ಸಿದ್ದರಾಮಯ್ಯ ಅವರು ವಿಶೇಷ ಕಾಳಜಿವಹಿಸಿರುವುದರಿಂದ ಹಲವು ವರ್ಷಗಳಿಂದ ಕನಸಾಗಿಯೇ ಉಳಿದಿದ್ದ ಯೋಜನೆಗೆ ಮರುಜೀವ ಸಿಕ್ಕಂತಾಗಿದೆ.

6 ಎಕರೆ ಜಾಗ

10 ಕೋಟಿ ರೂ.ವೆಚ್ಚದಲ್ಲಿ ಸಾತಗಳ್ಳಿ ಬಸ್ ಡಿಪೋ ಬಳಿಯಿರುವ ವಿಟಿಯು ಕಾಲೇಜಿನ ಹತ್ತಿರದ 21 ಎಕರೆ ಜಾಗದಲ್ಲಿ ಸ್ಪೋಟ್ಸ್ ಕಾಂಪ್ಲೆಕ್ಸ್ ಮಾಡಬೇಕೆಂದು ನಿರ್ಧರಿಸಲಾಗಿತ್ತು. ಇಲ್ಲಿಯೇ 6 ಎಕರೆ ಜಾಗದಲ್ಲಿ ವೆಲೋಡ್ರೋಮ್ ನಿರ್ಮಾಣವಾಗಬೇಕು ಎಂದು ಎಂಡಿಎ ಮತ್ತು ನಗರಾಭಿವೃದ್ಧಿ ಇಲಾಖೆಗೆ ಸೂಚನೆ ನೀಡಲಾಗಿತ್ತು. ಆದರೆ, ಬಜೆಟ್‌ನಲ್ಲಿ ದಟ್ಟಗಳ್ಳಿ ಎಂದು ನಮೂದಿಸಿರುವುದು ಗೊಂದಲ ಸೃಷ್ಟಿಸಿದೆ. ಆದರೆ, ಇದಕ್ಕೆ ಕೆಲ ದಿನಗಳಲ್ಲಿ ತೆರೆ ಬಿದ್ದು, ಸೂಕ್ತ ಸ್ಥಳದಲ್ಲಿ ಶೀಘ್ರವೇ ಕಾಮಗಾರಿ ಆರಂಭಕ್ಕೆ ಅನುಮೋದನೆ ದೊರೆಯಲಿ ಎಂಬುದು ಸೈಕ್ಲಿಸ್ಟ್‌ಗಳ ಆಶಯವಾಗಿದೆ.
ಮೈಸೂರಿನಲ್ಲಿ ಅಂತಾರಾಷ್ಟ್ರೀಯ ಮಟ್ಟದ ನವೀನ ಮಾದರಿಯ 250 ಮೀಟರ್‌ನ ಅಳತೆಯಲ್ಲಿ ವೆಲೋಡ್ರೋಮ್ ನಿರ್ಮಾಣಕ್ಕೆ ಅನುಮೋದನೆ ದೊರೆತಿದೆ. ಮೈಸೂರಿನಲ್ಲಿ 25ಕ್ಕೂ ಹೆಚ್ಚು ಸೈಕ್ಲಿಸ್ಟ್‌ಗಳಿದ್ದು, ಇದರಲ್ಲಿ ಏಷ್ಯನ್ ಗೇಮ್ಸ್‌ನಲ್ಲಿ ಚಾಂಪಿಯನ್ ಆದವರು, ರಾಷ್ಟ್ರೀಯ ಮಟ್ಟದ ಸ್ಪರ್ಧೆಗಳಲ್ಲಿ ಪ್ರಶಸ್ತಿ ಮುಡಿಗೇರಿಸಿಕೊಂಡವರು ಇದ್ದಾರೆ.

ಏನಿದು ಸೈಕಲ್ ವೆಲೋಡ್ರೋಮ್?

ಸೈಕ್ಲಿಸ್ಟ್‌ಗಳ ಅಭ್ಯಾಸಕ್ಕೆ ಅನುಕೂಲಕರವಾದ ಇಳಿಜಾರುಗಳುಳ್ಳ, ವೃತ್ತಾಕಾರದ ವಿನ್ಯಾಸದ ಅಭ್ಯಾಸದ ಅಂಕಣವೇ ವೆಲೋಡ್ರೋಮ್. ರಾಜ್ಯದ ಮೊಟ್ಟ ಮೊದಲ ವೆಲೋಡ್ರೋಮ್ ಅಂಕಣವನ್ನು ವಿಜಯಪುರ ಜಿಲ್ಲೆಯಲ್ಲಿ ಮುಖ್ಯಮಂತ್ರಿ ಸಿದ್ದರಾಮಯ್ಯ ಜನವರಿಯಲ್ಲಿ ಉದ್ಘಾಟಿಸಿದ್ದರು. ಇದೀಗ ಮೈಸೂರಿನಲ್ಲೂ ನಿರ್ಮಾಣವಾಗಲಿದೆ.
ಭಾರತ ವಿಶ್ವ ಮಟ್ಟದ ಸೈಕ್ಲಿಂಗ್‌ನಲ್ಲಿ ಅರ್ಹತೆ ಪಡೆಯುತ್ತಿರುವುದು ಟ್ರ್ಯಾಕ್ ಸೈಕ್ಲಿಂಗ್‌ನಲ್ಲಿ ಮಾತ್ರ. ಇದನ್ನು ಪಡೆಯಲು ಟ್ರ್ಯಾಕ್ ಬಹಳ ಮುಖ್ಯ. ವೆಲೋಡ್ರೋಮ್ ನಿರ್ಮಾಣವಾಗದೆ ಶಾಲಾ-ಕಾಲೇಜು ವಿದ್ಯಾರ್ಥಿಗಳು ಸೇರಿದಂತೆ ತರಬೇತುದಾರರು ಕೂಡ ತರಬೇತು ನೀಡಲು ಆಗುತ್ತಿರಲಿಲ್ಲ. ಮೈಸೂರಿನಲ್ಲಿಯೂ ಕ್ರೀಡಾ ವಸತಿನಿಲಯ ಹಾಗೂ ವಿವಿಧ ಕ್ರೀಡಾ ಕ್ಲಬ್‌ಗಳಿದ್ದು, ಆಗಾಗ್ಗೆ ಸ್ಪರ್ಧೆಗಳು ನಡೆಯುತ್ತ ಬಂದಿವೆ. ವೆಲೋಡ್ರೋಮ್‌ನಂತಹ ಸೌಲಭ್ಯ ಸಿಕ್ಕಲ್ಲಿ ಆಟಗಾರರಿಗೆ ಇನ್ನಷ್ಟು ವೃತ್ತಿಪರ ತರಬೇತಿ ಸಾಧ್ಯವಾಗಲಿದೆ.
ಈಗಿನ ಸಂಚಾರ ವ್ಯವಸ್ಥೆಯನ್ನು ಕಂಡು ಪಾಲಕರು ತಮ್ಮ ಮಕ್ಕಳನ್ನು ಸೈಕ್ಲಿಂಗ್‌ಗೆ ಕಳುಹಿಸುವುದಿಲ್ಲ. ಹೀಗಾಗಿ ಒಳಾಂಗಣ ಕ್ರೀಡಾಂಗಣದಲ್ಲಿ ಸೈಕ್ಲಿಂಗ್ ನಡೆಸಲು ಅನುಮತಿ ಕೊಡುವುದು ಹೆಚ್ಚು. ಆದ್ದರಿಂದ ವೆಲೋಡ್ರೋಮ್ ಅತ್ಯಂತ ಮುಖ್ಯ. ಇದರ ಜತೆಗೆ ಅಂತಾರಾಷ್ಟ್ರೀಯ ಮಟ್ಟದ ಸ್ಪರ್ಧೆಗಳಲ್ಲಿ ಭಾಗವಹಿಸಲು ಸಾಧ್ಯವಾಗಲಿದೆ ಎನ್ನುತ್ತಾರೆ ಯುವ ಜನ ಸಬಲೀಕರಣ ಮತ್ತು ಕ್ರೀಡಾ ಇಲಾಖೆ ಸೈಕಲ್ ತರಬೇತುದರು.
"

ನಗರದಲ್ಲಿ ವೆಲೋಡ್ರೋಮ್ ನಿರ್ಮಿಸಬೇಕು ಎಂಬುದು ಹಲವು ವರ್ಷಗಳ ಬೇಡಿಕೆ ಆಗಿತ್ತು. ಅದಕ್ಕೆ ಮುಖ್ಯಮಂತ್ರಿ ಸಿದ್ದರಾಮಯ್ಯ ಅವರು ಅನುಮೋದನೆ ಕೊಟ್ಟಿರುವುದು ಸ್ವಾಗತಾರ್ಹ. ವೆಲೋಡ್ರೋಮ್ ನಿರ್ಮಿಸಲು ಬಜೆಟ್ ಅನುಮೋದನೆ ನೀಡುವ ಮೂಲಕ ಸೈಕ್ಲಿಸ್ಟ್‌ಗಳ ಸಾಧನೆಗೆ ಮುನ್ನುಡಿ ಬರೆದಿದೆ. ರಾಜ್ಯ ಯುವ ಜನ ಸಬಲೀಕರಣ ಮತ್ತು ಕ್ರೀಡಾ ಇಲಾಖೆಯಿಂದ ನಮಗೆ ಮುಂದಿನ ಕ್ರಮ ಕುರಿತು ನಿರ್ದೇಶನ ಬಂದ ತಕ್ಷಣ ಕಾಮಗಾರಿ ಆರಂಭವಾಗಲಿದೆ.

velodrome i
ವಿಜಯವಾಣಿ ನಂ.1 ದಿನ ಪತ್ರಿಕೆ | Vijayavani | Kannada News
www.vijayavani.net