ಉದ್ಯೋಗ ಮೇಳದಲ್ಲಿ 845 ಮಂದಿಗೆ ನೌಕರಿ

ನಗರದ ಅಂಬೇಡ್ಕರ್ ಭವನದಲ್ಲಿ ಶನಿವಾರ ಆಯೋಜಿಸಿದ್ದ ಉದ್ಯೋಗ ಮೇಳದಲ್ಲಿ ಪದವಿ, ಡಿಪ್ಲೊಮಾ ಸೇರಿದಂತೆ ವಿವಿಧ ವಿದ್ಯಾರ್ಹತೆ ಹೊಂದಿದ್ದ 1223 ಮಂದಿ ಅರ್ಜಿ ಸಲ್ಲಿಸಿದ್ದರು. ಅಂತಿಮವಾಗಿ 845 ಮಂದಿ ಉದ್ಯೋಗ ಪಡೆಯುವಲ್ಲಿ ಸಫಲರಾದರು. ಟಿವಿಎಸ್ ಕಂಪನಿಯಲ್ಲಿ 1500 ವಿವಿಧ ಹುದ್ದೆಗಳಿಗೆ ಅವಕಾಶ ನೀಡಿತ್ತು. ಹುಣಸೂರು ತಾಲೂಕಿನ 507 ಯುವಕರು, ಎಚ್.ಡಿ.ಕೋಟೆಯ 35, ಪಿರಿಯಾಪಟ್ಟಣದ 156 ಮತ್ತು ಕೆ.ಆರ್.ನಗರ ತಾಲೂಕಿನ 60 ಮಂದಿ ಉದ್ಯೋಗಪಡೆದಿದ್ದಾರೆ.

ಈ ವೇಳೆ ಮಾತನಾಡಿದ ಮಾಜಿ ಶಾಸಕ ಎಚ್.ಪಿ.ಮಂಜುನಾಥ್, ಯುವಕರು ಪರಿಶ್ರಮ ಮತ್ತು ಕಂಪನಿಯ ನೀತಿ ನಿಯಮಗಳನ್ನು ಕಟ್ಟುನಿಟ್ಟಾಗಿ ಪಾಲಿಸಿಕೊಳ್ಳುವ ಮೂಲಕ ಉದ್ಯೋಗದಲ್ಲಿ ಮುಂದುವರಿಯಬೇಕು. ಉದ್ಯೋಗ ಸಿಕ್ಕ ಕೂಡಲೇ ಲಕ್ಷ ರೂ.ಗಳ ವೇತನ ನಿರೀಕ್ಷೆ ಇಟ್ಟುಕೊಳ್ಳಬೇಡಿ. ದೊರೆತ ವೇತನವನ್ನು ಮೌಲ್ಯವರ್ಧನೆ ಮಾಡುವ, ಹಿತಮಿತ ಖರ್ಚಿನೊಂದಿಗೆ ಉಳಿತಾಯ ಮಾಡುವುದನ್ನು ಕಲಿಯಿರಿ. ಉದ್ಯೋಗಕ್ಕೆ ಎಷ್ಟು ಪ್ರಾಮುಖ್ಯತೆ ಇದೆ ಎನ್ನುವುದಕ್ಕೆ ಉದಾಹರಣೆಯಾಗಿ ಈ ಉದ್ಯೋಗ ಮೇಳಕ್ಕೆ ಬೆಂಗಳೂರು, ಉಡುಪಿ, ಬೆಳಗಾವಿ, ಚಿತ್ರದುರ್ಗ ಮುಂತಾದ ಕಡೆಗಳಿಂದಲೂ ನಿರುದ್ಯೋಗಿಗಳು ಬಂದಿರುವುದೇ ಸಾಕ್ಷಿ. ಸ್ನೇಹಜೀವಿ ತಂಡ ತಮ್ಮ ಹುಟ್ಟುಹಬ್ಬಕ್ಕಾಗಿ ಅತ್ಯುತ್ತಮ ಸೇವೆ ನೀಡಿರುವುದು ಶ್ಲಾಘನೀಯ ಎಂದರು.

ಕೆಪಿಸಿಸಿ ವಕ್ತಾರ ಎಂ.ಲಕ್ಷ್ಮಣ್ ಮಾತನಾಡಿ, ಸಿಕ್ಕ ಉದ್ಯೋಗವನ್ನು ಸದ್ಬಳಕೆ ಮಾಡಿಕೊಳ್ಳಿ. ವಿದ್ಯಾರ್ಥಿಗಳು ವ್ಯಾಸಂಗದ ವೇಳೆ ಕೌಶಲಾಭಿವೃದ್ಧಿಗೆ ಹೆಚ್ಚಿನ ಒತ್ತು ನೀಡಿ. ಸ್ಕಿಲ್ ಇಂದಿನ ಅತ್ಯಗತ್ಯವಾಗಿದೆ ಎಂದರು.

ಗ್ಯಾರಂಟಿ ಯೋಜನೆಗಳ ಅನುಷ್ಠಾನ ಸಮಿತಿ ಉಪಾಧ್ಯಕ್ಷೆ ಡಾ.ಪುಷ್ಪಾ ಅಮರನಾಥ್, ನಗರ ಯೋಜನಾ ಪ್ರಾಧಿಕಾರದ ಅಧ್ಯಕ್ಷ ಎಚ್.ಪಿ.ಅಮರನಾಥ್, ಟಿವಿಎಸ್ ಕಂಪನಿಯ ಅಧಿಕಾರಿಗಳು, ಜಿಲ್ಲಾ ಎಸ್‌ಸಿ, ಎಸ್ಟಿ ದೌರ್ಜನ್ಯ ತಡೆ ಮತ್ತು ಜಾಗೃತಿ ಸಮಿತಿ ಸದಸ್ಯ ನೇರಳಕುಪ್ಪೆ ಮಹದೇವ್, ಸ್ನೇಹಜೀವಿ ಬಳಗದ ಸದಸ್ಯರು ಇದ್ದರು.