ತ್ಯಾಗರಾಜ ಕೋ ಆಪರೇಟಿವ್​ ಬ್ಯಾಂಕ್​ ಮಾದರಿ: ಶಾಸಕ ರವಿ ಸುಬ್ರಹ್ಮಣ್ಯ ಬಣ್ಣನೆ

ಬೆಂಗಳೂರು: ಉತ್ಕೃಷ್ಟ ರೀತಿಯಲ್ಲಿ ಕಾರ್ಯಕ್ರಮ ರೂಪಿಸಿಕೊಂಡು ಇತರೆ ಬ್ಯಾಂಕ್​ಗಳಿಗಿಂತ ಶ್ರೀ ತ್ಯಾಗರಾಜ ಕೋ ಆಪರೇಟಿವ್​ ಬ್ಯಾಂಕ್​ ಮಾದರಿಯಾಗಿ ಕಾರ್ಯನಿರ್ವಹಿಸುತ್ತಿದೆ ಎಂದು ಶಾಸಕ ರವಿ ಸುಬ್ರಹ್ಮಣ್ಯ ಗುಣಗಾನ ಮಾಡಿದರು.

ವಜ್ರ ಮಹೋತ್ಸವ ನಿಮಿತ್ತ ಶ್ರೀ ತ್ಯಾಗರಾಜ ಕೋ ಆಪರೇಟಿವ್​ ಬ್ಯಾಂಕ್​ ಲಿ. ಶ್ರೀನಿವಾಸನಗರದ ಶಂಕರ್​ನಾಗ್​ ವೃತ್ತದ ಬಿಬಿಎಂಪಿ ಆಟದ ಮೈದಾನ(ಡೊಂಕೊಳ್ಳ)ದಲ್ಲಿ ಭಾನುವಾರ ಆಯೋಜಿಸಿದ್ದ ವಿದ್ಯುತ್​ಚಾಲಿತ ವಾಹನಗಳ(ಇವಿ) ಪ್ರದರ್ಶನ ಮತ್ತು ಬೃಹತ್​ ಸಾಲ ಮೇಳ ಕಾರ್ಯಕ್ರಮವನ್ನು ಉದ್ಘಾಟಿಸಿ ಮಾತನಾಡಿದರು.

ಸಮಾಜದ ಬಗ್ಗೆ ಕಳಕಳಿ ಹಾಗೂ ಆರ್​ಬಿಐ ಮಾರ್ಗಸೂಚಿ ಪಾಲಿಸಿಕೊಂಡು ವಿವಿಧ ಸಮಾಜಮುಖಿ ಕಾರ್ಯಕ್ರಮಗಳನ್ನು ಈ ಬ್ಯಾಂಕ್​ ನಡೆಸಿಕೊಂಡು ಬರುತ್ತಿದೆ. ಮಹಿಳೆಯರಿಗೆ, ರೈತರಿಗೆ, ನಿರುದ್ಯೋಗಿಗಳ ಗಮನ ಇಟ್ಟುಕೊಂಡು ಈ ಮೇಳ ಆಯೋಜಿಸಿರುವುದು ಶ್ಲಾಘನೀಯ. ಸಹಕಾರಿ ಕ್ಷೇತ್ರದಲ್ಲಿ ಬೇರೆ ಬ್ಯಾಂಕ್​ಗಳಿಗೆ ಹೋಲಿಸಿದರೆ ಈ ಬ್ಯಾಂಕ್​ ಆದರ್ಶವಾಗಿದೆ. ಇಂತಹ ಕಾರ್ಯಕ್ರಮಗಳು ನಗರದ ಇತರೆ ಭಾಗಗಳಲ್ಲೂ ನಡೆಯುವಂತಾಗಬೇಕು ಎಂದರು.

"ವಿಜಯವಾಣಿ' ಸಂಪಾದಕ ಕೆ.ಎನ್​.ಚನ್ನೇಗೌಡ ಮಾತನಾಡಿ, ಸಹಕಾರಿ ಬ್ಯಾಂಕ್​ಗಳ ಮೇಲೆ ಜನರಿಗೆ ನಂಬಿಕೆಯ ಇಲ್ಲದ ದಿನಗಳಲ್ಲಿ ತ್ಯಾಗರಾಜ ಕೋ ಆಪರೇಟಿವ್​ ಬ್ಯಾಂಕ್​ ಒಳ್ಳೆಯ ಕಾರ್ಯಕ್ರಮ ಆಯೋಜಿಸಿಕೊಂಡು ಬರುತ್ತಿದೆ. ದಕ್ಷ ಆಡಳಿತ ಮಂಡಳಿ ಇದ್ದರೆ ಬ್ಯಾಂಕ್​ ಅಭಿವೃದ್ಧಿಯಾಗುತ್ತದೆ ಎಂಬುದಕ್ಕೆ ಈ ಬ್ಯಾಂಕ್​ ಸಾಕ್ಷಿಯಾಗಿದೆ.ಸರ್ಕಾರಿ ಜಾಗದಲ್ಲಿ ಚಾರ್ಜಿಂಗ್​ ಸ್ಟೇಷನ್​ಗಳನ್ನು ಸ್ಥಾಪಿಸಿದರೆ ಇವಿ ವಾಹನಗಳ ಖರೀದಿ ಇನ್ನಷ್ಟು ಜಾಸ್ತಿಯಾಗುತ್ತದೆ. ಕೇಂದ್ರ ಮತ್ತು ರಾಜ್ಯ ಸರ್ಕಾರಗಳು ಈ ವಲಯಕ್ಕೆ ಹೆಚ್ಚಿನ ಆದ್ಯತೆ ನೀಡುತ್ತಿದ್ದು, ಇದನ್ನು ಸಾರ್ವಜನಿಕರು ಸದ್ಬಳಕೆ ಮಾಡಿಕೊಳ್ಳುವಂತಾಗಬೇಕು ಎಂದು ಸಲಹೆ ನೀಡಿದರು.

ಬ್ಯಾಂಕಿನ ಉಪಾಧ್ಯ ರಾಮೇಗೌಡ, ಬಿಬಿಎಂಪಿ ಮಾಜಿ ಸದಸ್ಯ ಸಂಗಾತಿ ವೆಂಕಟೇಶ್​, ಜಿಲ್ಲಾ ಸಹಕಾರಿ ಯೂನಿಯನ್​ ಅಧ್ಯ ಜೆ.ಮಂಜುನಾಥ್​, ಬ್ಯಾಂಕಿನ ನಿರ್ದೇಶಕರು, ಆಡಳಿತ ಮಂಡಳಿ ಸದಸ್ಯರು ಮತ್ತಿತರರಿದ್ದರು.

ಭವಿಷ್ಯದಲ್ಲಿ ಇವಿ ವಾಹನಗಳ ಜಮಾನಾ ಇನ್ನಷ್ಟು ಹೆಚ್ಚಾಗಲಿದೆ.ಪೆಟ್ರೋಲ್​, ಡೀಸೆಲ್​ನಿಂದ ವಿದ್ಯುತ್​ ಚಾಲಿತ ವಾಹನಕ್ಕೆ ಪರಿವರ್ತನೆಯಾಗಬೇಕು. ಬೆಂಗಳೂರಿನ ಸೌಂದರ್ಯ ಕಾಪಾಡುವ ನಿಟ್ಟಿನಲ್ಲಿ ಹೆಚ್ಚು ಇವಿ ವಾಹನಗಳನ್ನು ಬಳಸಬೇಕು. ಇವಿ ಖರೀದಿಗೆ ಮತ್ತು ಸೌರಶಕ್ತಿ ಅಳವಡಿಕೆಗೆ ಕೇಂದ್ರ ನೀಡುತ್ತಿರುವ ಸಬ್ಸಿಡಿಯನ್ನು ಸಾರ್ವಜನಿಕರ ಸದ್ಬಳಕೆ ಮಾಡಿಕೊಳ್ಳಬೇಕು. ದೇಶದಲ್ಲೇ ಮೊದಲ ಬಾರಿಗೆ ಸಹಕಾರ ಬ್ಯಾಂಕ್​, ಈ ಮೇಳ ಆಯೋಜಿಸಿರುವುದು ಗಮನಾರ್ಹ.

| ತೇಜಸ್ವಿ ಸೂರ್ಯ, ಸಂಸದ.

ಪ್ರಮುಖ 11 ವಿತರಕರು ನಮ್ಮೊಂದಿಗೆ ಕೈಜೋಡಿಸಿದ್ದಾರೆ. ಮೇಳದಲ್ಲಿ ವಾಹನಕ್ಕೆ ಖರೀದಿಸುವವರಿಗೆ ಶೇ.9 ಬಡ್ಡಿದರದಲ್ಲಿ ಸಾಲ ವಿತರಿಸಲಾಗುತ್ತದೆ. ಮೇಳದಲ್ಲಿ ಸಾಲ ಪಡೆಯುವರಿಗೆ ಸಂಸ್ಕರಣಾ ಶುಲ್ಕ ಪಡೆಯುತ್ತಿಲ್ಲ. ಕೇಂದ್ರ ಸರ್ಕಾರ ವಿದ್ಯುತ್​ಚಾಲಿತ ಮೇಲಿನ ನೀಡುವ ಸಬ್ಸಿಡಿಯನ್ನು ಮುಂದುವರಿಸಬೇಕು. ಬಿಬಿಎಂಪಿ, ಬಿಎಂಟಿಸಿ, ಕೆಎಸ್​ಆರ್​ಟಿಸಿ ಜಾಗದಲ್ಲಿ ಹೆಚ್ಚು ಚಾರ್ಜಿಂಗ್​ ಸ್ಟೇಷನ್​ ಸ್ಥಾಪಿಸಲು ಸರ್ಕಾರ ಮುಂದಾಗಬೇಕು. ಇದರಿಂದ ಇವಿ ತಯಾರಿಸುವ ಕಂಪನಿಗಳಿಗೆ ತುಂಬ ಅನುಕೂಲವಾಗಲಿದೆ.

| ಎಂ.ಆರ್​.ವೆಂಕಟೇಶ್​, ಶ್ರೀ ತ್ಯಾಗರಾಜ ಕೋ ಆಪರೇಟಿವ್​ ಬ್ಯಾಂಕ್​ ಅಧ್ಯಕ್ಷ.

https://www.vijayavani.net/divorce-65-year-old-european-man-divorces-wife-to-marry-nigerian-tiktok-girlfriend