ಸುಗ್ರೀವ ದೇಗುಲ ಸ್ವಚ್ಛ

ಬೆಂಗಳೂರಿನ ದಯಾನಂದಸಾಗರ ಕಾಲೇಜಿನ ಸಿವಿಲ್ ಇಂಜಿನಿಯರಿಂಗ್ ವಿಭಾಗದ ವಿದ್ಯಾರ್ಥಿಗಳು ಇತ್ತೀಚೆಗೆ ಶ್ರಮದಾನದ ಮೂಲಕ ಸ್ವಚ್ಛತೆ ಕಾರ್ಯ ನಡೆಸಿದರು. ಬಳಿಕ ದೇವರಿಗೆ ಪೂಜೆ ನೆರವೇರಿಸಿದರು.

ವಿಜಯನಗರ ಕಾಲದಲ್ಲಿ ನಿರ್ಮಾಣವಾಗಿರುವ ಮೇಲುಕೋಟೆ ಸುಗ್ರೀವ ಗುಡಿಯಲ್ಲಿ ಕೈಮುಗಿದ ಭಂಗಿಯಲ್ಲಿರುವ ಸುಗ್ರೀವನ ಆರು ಅಡಿಯ ವಿಗ್ರಹ ಅತ್ಯಂತ ಕಲಾತ್ಮಕವಾಗಿದೆ. ಆದರೆ ನಿರ್ವಹಣೆಯ ಕೊರತೆಯಿಂದ ಸುಗ್ರೀವ ದೇಗುಲದ ಮೇಲ್ಭಾಗ ಹಾಗೂ ಸುತ್ತ ಗಿಡಗಂಟಿಗಳು ಬೆಳೆದಿದ್ದು, ಕಲ್ಲಿನ ತೊಲೆಗಳು ನೆಲಕ್ಕುರುಳಿದ್ದವು.

ಮೇಲುಕೋಟೆಯಲ್ಲಿ ಸರ್ವೇ ಕ್ಯಾಂಪ್‌ನಲ್ಲಿ ಭಾಗವಹಿಸಿದ್ದ ಬೆಂಗಳೂರಿನ ದಯಾನಂದಸಾಗರ ಕಾಲೇಜಿನ ಸಿವಿಲ್ ಇಂಜಿನಿಯರಿಂಗ್ ವಿದ್ಯಾರ್ಥಿಗಳು ಸ್ವಚ್ಛ ಭಾರತ ಕಾರ್ಯಕ್ರಮದಡಿ ಗಿಡಗಂಟಿಗಳನ್ನು ಕಿತ್ತು ಸ್ವಚ್ಛಗೊಳಿಸಿದರು. ಇಡೀ ದೇಗುಲವನ್ನು ನೀರಿನಿಂದ ತೊಳೆದು ಪುಷ್ಪಾಲಂಕಾರ ಮಾಡಿ ಪೂಜೆ ಮಾಡಿದರು.

ಮಾಧ್ಯಮದೊಂದಿಗೆ ಮಾತನಾಡಿದ ವಿದ್ಯಾರ್ಥಿಗಳು, ಐತಿಹಾಸಿಕ ಮಹತ್ವದ ದೇಗುಲವನ್ನು ಸ್ವಚ್ಛವಾಗಿಡಬೇಕು. ಇದಕ್ಕೆ ದೇವಾಲಯದ ಅಧಿಕಾರಿಗಳು ಕ್ರಮವಹಿಸಬೇಕು. ಬೆಂಗಳೂರಿಗೆ ತೆರಳಿದ ನಂತರ ಮುಜರಾಯಿ ಇಲಾಖೆ ಆಯುಕ್ತರು ಹಾಗೂ ಸಚಿವರಿಗೂ ಮನವಿ ಮಾಡುತ್ತೇವೆ. ಪುರಾತನ ದೇಗುಲಗಳು ನಮ್ಮ ಸಂಸ್ಕೃತಿಯ ಪ್ರತೀಕವಾಗಿದ್ದು, ಈ ಮಾದರಿಯ ನಿರ್ಲಕ್ಷ್ಯ ಸಲ್ಲದು. ರಾಜ್ಯ ಪುರಾತತ್ವ ಇಲಾಖಾ ಅಧಿಕಾರಿಗಳು ತಕ್ಷಣ ಕ್ರಮ ವಹಿಸಬೇಕಾದ ತುರ್ತು ಅಗತ್ಯವಿದೆ ಎಂದು ತಿಳಿಸಿದರು.