ಮಳಲಿ ಅಣೆಕಟ್ಟಿಗೆ ಬೇಕಿದೆ ರಸ್ತೆ!: ಗಂಜಿಮಠ-ಪೊಳಲಿ-ಬಿ.ಸಿ.ರೋಡ್ ಸಂಪರ್ಕಕ್ಕೆ ಸುಲಭ : ನಾಗರಿಕರಿಂದ ಆಗ್ರಹ ವ್ಯಕ್ತ

ಧನಂಜಯ ಗುರುಪುರ

ಗುರುಪುರ: ಗಂಜಿಮಠ ಗ್ರಾಮ ಪಂಚಾಯಿತಿ ವ್ಯಾಪ್ತಿಯ ಬಡಗುಳಿಪಾಡಿ, ತೆಂಕುಳಿಪಾಡಿ, ಮೊಗರು ಮತ್ತು ಮುತ್ತೂರು ಪಂಚಾಯಿತಿ ವ್ಯಾಪ್ತಿಯ ಕುಲವೂರು ಗ್ರಾಮದ ಕೃಷಿಕರಿಗೆ ಅನುಕೂಲವಾಗುವಂತೆ ನಿರ್ಮಿಸಲಾದ ಮಳಲಿ(ಮಣೇಲ್) ಕಿಂಡಿ ಅಣೆಕಟ್ಟಿನ(ವೆಂಟೆಡ್ ಡ್ಯಾಮ್) ಕಿರುರಸ್ತೆಯ ಎರಡೂ ಪಾರ್ಶ್ವಗಳಲ್ಲಿ ರಸ್ತೆ ಸಂಪರ್ಕ ಕಲ್ಪಿಸುವಂತೆ ಸ್ಥಳೀಯ ನಾಗರಿಕರು ಆಗ್ರಹಿಸಿದ್ದಾರೆ.

ಅಂತರ್ಜಲ ವೃದ್ಧಿಯೊಂದಿಗೆ ಸುತ್ತಲ ಪ್ರದೇಶದ ಕೃಷಿಕರಿಗೆ ಅನುಕೂಲವಾಗುವಂತೆ ಫಲ್ಗುಣಿ ನದಿಗೆ ಅಡ್ಡಲಾಗಿ 4 ವರ್ಷಗಳ ಹಿಂದೆ ತೆಂಕುಳಿಪಾಡಿ ಗ್ರಾಮದ ಮಳಲಿಯಲ್ಲಿ ಕಿಂಡಿ ಅಣೆಕಟ್ಟು ನಿರ್ಮಿಸಲಾಗಿದೆ. ಹೊಸತಾಗಿ ನಿರ್ಮಿಸಲಾದ ಈ ಅಣೆಕಟ್ಟು ಇನ್ನೂ ಲೋಕಾರ್ಪಣೆಗೊಳ್ಳದಿದ್ದರೂ ನಾಗರಿಕರು ಮಾತ್ರ ಪೂರ್ಣ ಪ್ರಮಾಣದಲ್ಲಿ ಇದನ್ನು ಬಳಸಿಕೊಳ್ಳುತ್ತಿದ್ದಾರೆ. ಅಣೆಕಟ್ಟಿನಲ್ಲಿ ಸುಮಾರು 14 ಅಡಿ ಅಗಲದ ರಸ್ತೆ ನಿರ್ಮಿಸಲಾಗಿದೆ.

ಇಚ್ಛಾಶಕ್ತಿ ವ್ಯಕ್ತಪಡಿಸದ ಜನಪ್ರತಿನಿಧಿಗಳು

ಯೋಜನೆಯ ಆರಂಭದಲ್ಲಿ ಪ್ರಕಟಿಸಲಾದಂತೆ ಮಳಲಿ ಅಮ್ಚೆದಬಾಗಿಲಿನಿಂದ ಅಣೆಕಟ್ಟಿನ ವರೆಗೆ ಸುಮಾರು ಅರ್ಧ ಕಿ.ಮೀ. ಅಂತರದಲ್ಲಿ ಸ್ಥಳೀಯ ಕೃಷಿಕರು ಬಿಟ್ಟುಕೊಟ್ಟಿರುವ ಜಾಗದಲ್ಲಿ ಕಚ್ಛಾ ರಸ್ತೆ ನಿರ್ಮಾಣಗೊಂಡಿದ್ದರೂ, ಈವರೆಗೆ ಇದರ ಸೂಕ್ತ ಅಭಿವೃದ್ಧಿ ಕಾಮಗಾರಿ ನಡೆದಿಲ್ಲ. ಅಣೆಕಟ್ಟಿನ ಮತ್ತೊಂದು ಪಾರ್ಶ್ವದಲ್ಲಿ ಪೊಳಲಿ ಮತ್ತು ಪುಂಚಮೆಯಾಗಿ ಬಿ.ಸಿ.ರೋಡ್ ಸಂಪರ್ಕ ಕಲ್ಪಿಸಲು ರಸ್ತೆ ನಿರ್ಮಿಸಲು ಅವಕಾಶವಿದ್ದು, ಅಣೆಕಟ್ಟಿನಿಂದ ಸುಮಾರು 500 ಮೀಟರ್ ರಸ್ತೆ ನಿರ್ಮಾಣದ ಅಗತ್ಯವಿದೆ. ಪೊಳಲಿಗೆ ಸಂಪರ್ಕ ಕಲ್ಪಿಸಬಹುದಾದ ರಸ್ತೆ ನಿರ್ಮಿಸಲು ಆ ಭಾಗದ ಭೂಮಾಲೀಕರು ಸಮ್ಮತಿಸಿದ್ದಾರೆ. ಇಷ್ಟಿದ್ದರೂ ಇಲ್ಲಿಗೆ ಸಂಬಂಧಿಸಿದ ಜನಪ್ರತಿನಿಧಿಗಳು ಮಾತ್ರ ತಮ್ಮ ಇಚ್ಛಾಶಕ್ತಿ ವ್ಯಕ್ತಪಡಿಸಿಲ್ಲ ಎಂಬುದು ಸ್ಥಳೀಯರ ಬೇಸರಕ್ಕೆ ಕಾರಣವಾಗಿದೆ.

ಪೊಳಲಿ-ಮಳಲಿ ನಿಕಟತೆ

ಪೊಳಲಿ - ಮೈಯರಕೂಟೇಲು - ಕಡಪುಕರಿಯ ಮೂಲಕ ತೆಂಕುಳಿಪಾಡಿ ಗ್ರಾಮದ ಮಳಲಿಯ ಉಳಿಪಾಡಿಗುತ್ತಿನ ಮನೆಗೆ ಪೊಳಲಿ ಶ್ರೀ ರಾಜರಾಜೇಶ್ವರೀ ದೇವಸ್ಥಾನದಿಂದ ವರ್ಷಕ್ಕೆ 5 ಬಾರಿ ಭಂಡಾರ ಬರುವ ಸಂಪ್ರದಾಯವಿದೆ. ಜತೆಗೆ ಪೊಳಲಿ ದೇವಸ್ಥಾನದ ವಾರ್ಷಿಕ ಜಾತ್ರೆಯ ಕೊನೆಯ ದಿನದಂದು ಅವಭೃತ ಸ್ನಾನ ನಡೆಯುವುದು ಮಳಲಿಯ ಫಲ್ಗುಣಿ ನದಿ ತಟದಲ್ಲೇ. ಆದರೆ ಪೊಳಲಿಯಿಂದ ಕಡಪುಕರಿಯದ ವರೆಗೆ ದೇವರ ಮೆರವಣಿಗೆಯು ಸವೆದು ಹೋಗಿರುವ ನದಿ ತಟದಲ್ಲಿ, ಪೊದೆ-ಗಿಡಗಂಟಿ ಸೀಳಿಕೊಂಡು ಮುಂದೆ ಸಾಗಬೇಕಾಗಿದೆ. ಹಾಗಾಗಿ ಧಾರ್ಮಿಕವಾಗಿ ಮಹತ್ವ ಪಡೆದಿರುವ ಮಳಲಿಗೆ ಅಣೆಕಟ್ಟು ಸಂಪರ್ಕಿಸುವ ಕಡಪುಕರಿಯದಲ್ಲಿ ಕಿರು ರಸ್ತೆ ನಿರ್ಮಿಸುವ ಅಗತ್ಯವಿದೆ.

ಮರಳುಗಾರಿಕೆಗೆ ನಿರ್ಬಂಧ

ಜಿಲ್ಲೆಯಲ್ಲಿ ಸೇತುವೆಗಳಿಗೆ ಹತ್ತಿರದಲ್ಲೇ ಮರಳುಗಾರಿಕೆ ನಡೆಯುತ್ತಿರುವುದರಿಂದ ಅಡ್ಡೂರು ಸಹಿತ ಕೆಲವು ಹಳೇ ಸೇತುವೆಗಳು ಶಿಥಿಲಗೊಂಡಿವೆ ಎಂಬ ಆರೋಪ ಕೇಳಿ ಬರುತ್ತಿರುವುದರ ಜತೆಗೆ ಹೊಸ ಸೇತುವೆ ನಿರ್ಮಾಣದ ಅಗತ್ಯ ಕಂಡು ಬಂದಿದೆ. ಈ ದೃಷ್ಟಿಯಿಂದ 4 ವರ್ಷದ ಹಿಂದೆ ನಿರ್ಮಿಸಲಾದ ಮಳಲಿ ಕಿಂಡಿ ಅಣೆಕಟ್ಟಿನ ಹತ್ತಿರದಲ್ಲಿ ಮರಳುಗಾರಿಕೆ ನಡೆಸದಂತೆ ಜಿಲ್ಲಾಡಳಿತವು ಸಣ್ಣ ನೀರಾವರಿ ಇಲಾಖೆಗೆ ಸೂಕ್ತ ನಿರ್ದೇಶನ ನೀಡುವ ಅಗತ್ಯವಿದೆ. ಇಲ್ಲವಾದಲ್ಲಿ ಕಿರು ರಸ್ತೆ ಒಳಗೊಂಡಿರುವ ಮಳಲಿ ಕಿಂಡಿ ಅಣೆಕಟ್ಟಿನ ಬಾಳಿಕೆ ಕ್ಷೀಣಿಸಬಹುದು ಎಂಬುದು ಸ್ಥಳೀಯ ನಾಗರಿಕರ ಅಭಿಮತ.

https://www.vijayavani.net/subrahmanya-math-ganesh-chaturthi

https://www.vijayavani.net/bharantalayam-drama-kruthi-bidugade