ಹಾಸ್ಟೆಲ್ ವಿದ್ಯಾರ್ಥಿಗಳಿಂದಲೇ ಗದ್ದೆಯಲ್ಲಿ ಭತ್ತದ ಬೇಸಾಯ ನಡೆಸಿ ಕೃಷಿಯ ಬಗ್ಗೆ ಪ್ರಾಯೋಗಿಕ ಅನುಭವ ನೀಡಬೇಕೆನ್ನುವುದು ವಾಮದಪದವಿನ ಬಿಸಿಎಂ ಹಾಸ್ಟೆಲ್ನ ನಿಲಯ ಮೇಲ್ವಿಚಾರಕಿ ಭವಾನಿ ಅವರ ಕನಸಾಗಿತ್ತು. ವಾಮದಪದವಿನ ವಾಂಬೆಟ್ಟುವಿನ ಯಜ್ಞ ನಾರಾಯಣ ವಿದ್ಯಾರ್ಥಿಗಳ ಬೇಸಾಯ ಚಟುವಟಿಕೆಗೆ ಗದ್ದೆ ನೀಡಿ ಸಹಕರಿಸಿದ್ದರು. ಬೀಜ ಬಿತ್ತನೆ, ನೇಜಿ ಕೊಯ್ಲು, ನೇಜಿ ನಾಟಿ, ಔಷಧ ಸಿಂಪಡಣೆ ಬಗ್ಗೆ ವಿದ್ಯಾರ್ಥಿಗಳಿಗೆ ಮಾರ್ಗದರ್ಶನ ಮಾಡಿದ್ದರು. ಇದೀಗ ಪೈರು ಬಿಡುವ ಹಂತಕ್ಕೆ ಬಂದಿದ್ದು, ಭವಾನಿ ಅವರ ಕನಸು, ವಿದ್ಯಾರ್ಥಿಗಳ ಪರಿಶ್ರಮಕ್ಕೆ ಫಲ ಸಿಗುವ ಕಾಲ ಬಂದಿದೆ. ಇಲಾಖೆಯ ಅಧಿಕಾರಿ ಬಿಂದಿಯಾ ನಾಯಕ್ ಅವರ ಸಹಕಾರ, ಮಾರ್ಗದರ್ಶನ ಈ ಕಾರ್ಯಕ್ರಮವನ್ನು ಯಶಸ್ವಿಯಾಗಿ ನಡೆಸಲು ಸಾಧ್ಯವಾಗಿದೆ ಎನ್ನುತ್ತಾರೆ ಭವಾನಿ.
