ಜಾತ್ರಾ ಮೈದಾನದಲ್ಲಿನ ಅಕ್ರಮ ಅಂಗಡಿ ತೆರವು

ಕಲಬುರಗಿಯ ಶರಣಬಸವೇಶ್ವರ ದೇವಸ್ಥಾನದ ಎದುರಿನ ಜಾತ್ರಾ ಮೈದಾನದಲ್ಲಿನ ಅನಧಿಕೃತ ಅಂಗಡಿಗಳನ್ನು ಜೆಸಿಬಿಯಿಂದ ಮಂಗಳವಾರ ತೆರವುಗೊಳಿಸಲಾಯಿತು.

Published on:

10 Dec 2025, 10:50 am

ಪ್ರಮುಖ ಮುಖ್ಯಾಂಶಗಳು

ಶರಣಬಸವೇಶ್ವರ ಸಂಸ್ಥಾನದ ಪರ ಕೋರ್ಟ್ ಆದೇಶ
ಜೆಸಿಬಿಯೊಂದಿಗೆ ಜಾಗ ಖಾಲಿ ಮಾಡಿಸಿದ ಪಾಲಿಕೆ

ಕಲಬುರಗಿ: ನಗರದ ಮಹಾದಾಸೋಹಿ ಶ್ರೀ ಶರಣಬಸವೇಶ್ವರ ದೇವಸ್ಥಾನ ಎದುರಿನ ಜಾತ್ರಾ ಮೈದಾನದಲ್ಲಿ ಕೆಲ ವರ್ಷಗಳಿಂದ ಹಾಕಿಕೊಂಡಿದ್ದ ಅನಧಿಕೃತ ಅಂಗಡಿಗಳನ್ನು ನ್ಯಾಯಾಲಯ ಆದೇಶದಂತೆ ಬಿಗಿ ಪೊಲೀಸ್ ಬಂದೋಬಸ್ತ್ ಮಧ್ಯೆ ಮಂಗಳವಾರ ತೆರವು ಕಾರ್ಯಾಚರಣೆ ನಡೆಯಿತು. ಇದು ಶರಣರ ಭಕ್ತರಲ್ಲಿ ಸಂತಸ ಮೂಡಿಸಿದೆ.

ಅಕ್ರಮವಾಗಿದ್ದ ಅಂಗಡಿಯನ್ನು ತೆರವುಗೊಳಿಸಲು ಜೆಸಿಬಿ ಸದ್ದು ಮಾಡುತ್ತಿದ್ದಂತೆ ಅದರ ಸುತ್ತಲಿನ ಪ್ರದೇಶದಲ್ಲಿ ಹಾಕಿಕೊಂಡಿದ್ದ ಕೆಲ ಅಂಗಡಿಗಳನ್ನು ಸ್ವಯಂ ಪ್ರೇರಿತವಾಗಿ ಖಾಲಿ ಮಾಡಿಕೊಂಡರು. ತೆರವು ಕಾರ್ಯಾಚರಣೆ ವೇಳೆ ಕೆಲವರು ವಿರೋಧ ವ್ಯಕ್ತಪಡಿಸಿದರು. ಅದನ್ನು ಪರಿಗಣಿಸದೆ ಕೋರ್ಟ್ ಆದೇಶದಂತೆ ಅಂಗಡಿಗಳನ್ನು ತೆರವುಗೊಳಿಸಲಾಯಿತು.

ಜಾತ್ರಾ ಮೈದಾನದಲ್ಲಿ ಪಾಲಿಕೆ ಮಾಜಿ ಸದಸ್ಯ ಪ್ರಕಾಶ ಬೆನಕನಳ್ಳಿ ಎಂಬುವರು ಕಬ್ಬಿನ ಹಾಲು ಮಾರಾಟಕ್ಕೆ ತಾತ್ಕಾಲಿಕ ಶೆಡ್ ನಿರ್ಮಿಸಿ ವ್ಯಾಪಾರ ಆರಂಭಿಸಿದ್ದರು. ತಾವು ವ್ಯವಹರಿಸುತ್ತಿದ್ದ ಈ ಸ್ಥಳದ ಬಗ್ಗೆ ಕೋರ್ಟ್ಗೆ ಸಾರ್ವಜನಿಕ ಹಿತಾಸಕ್ತಿ ಅರ್ಜಿ ಸಲ್ಲಿಸಿದ್ದರು. ಈ ವಿವಾದ ಸುಪ್ರೀಂಕೋರ್ಟ್ವರೆಗೂ ಮುಟ್ಟಿತು.

ಏನಿದು ವಿವಾದ ?

2008ರಲ್ಲಿ ಜಾತ್ರೆ ಸಂದರ್ಭದಲ್ಲಿ ಮೂರು ತಿಂಗಳ ಅವಧಿಗೆ ಅಂಗಡಿ ಹಾಕಿಕೊಳ್ಳಲು ಶರಣಬಸವೇಶ್ವರ ಸಂಸ್ಥಾನ ಸ್ಥಳಾವಕಾಶ ನೀಡಿತ್ತು. ಅವಧಿ ಮುಗಿದರೂ ಪ್ರಕಾಶ ಬೆನಕನಹಳ್ಳಿ ಜಾಗಾ ಖಾಲಿ ಮಾಡಲಿಲ್ಲ. ಶರಣಬಸವೇಶ್ವರ ಜಾತ್ರಾ ಮೈದಾನದಲ್ಲಿ ಕಳೆದ ಹತ್ತಾರು ವರ್ಷಗಳಿಂದ ಅನಧಿಕೃತವಾಗಿ ನಿರ್ಮಿಸಿಕೊಂಡಿದ್ದ ತಾತ್ಕಾಲಿಕ ಶೆಡ್‌ಗಳನ್ನು ತೆರವುಗೊಳಿಸುವಂತೆ 2009ರಲ್ಲಿ ಶರಣಬಸವೇಶ್ವರ ಸಂಸ್ಥಾನವು ಕಲಬುರಗಿ 3ನೇ ಹೆಚ್ಚುವರಿ ಸಿವಿಲ್ ನ್ಯಾಯಾಲಯ (ಜೂನಿಯರ್ ಡಿವಿಷನ್) ಮೊರೆ ಹೋಗಿತ್ತು. 2014ನೇ ಅಕ್ಟೋಬರ್ 31ರಂದು ಸಂಸ್ಥಾನದ ಪರವಾಗಿ ಕೋರ್ಟ್ ಡಿಕ್ರಿ ನೀಡಿತ್ತು.

ಜಿಲ್ಲಾ ನ್ಯಾಯಾಲಯ, ಹೈಕೋರ್ಟ್, ಸುಪ್ರೀಂಕೋರ್ಟ್ವರೆಗೂ ಪ್ರಕಾಶ ಬೆನಕನಹಳ್ಳಿ ಮೇಲ್ಮನವಿ ಸಲ್ಲಿಸಿದರು. ಆದರೆ, ಎಲ್ಲ ಹಂತದಲ್ಲೂ 3ನೇ ಹೆಚ್ಚುವರಿ ಸಿವಿಲ್ ನ್ಯಾಯಾಲಯದ ತೀರ್ಪು ಎತ್ತಿ ಹಿಡಿಯಲಾಗಿತ್ತು. ಕೊನೆ ಹಂತದಲ್ಲಿ ಶರಣಬಸವೇಶ್ವರ ಸಂಸ್ಥಾನ ಅನಧಿಕೃತ ಅಂಗಡಿ ತೆರವು ಮಾಡಲು ಸೂಚಿಸಬೇಕು ಎಂದು ಸಿವಿಲ್ ನ್ಯಾಯಾಲಯದ ಮೊರೆ ಹೋದರು. ಹೀಗಾಗಿ ಡಿಸೆಂಬರ್ 10ರೊಳಗೆ ಬೇಲಿಫ್‌ಗಳ ನೇತೃತ್ವದಲ್ಲಿ ಅಗತ್ಯ ಪೊಲೀಸ್ ಸಿಬ್ಬಂದಿ ನೆರವು ಪಡೆದು ಅಂಗಡಿ ತೆರವು ಮಾಡಿ ಶರಣಬಸವೇಶ್ವರ ಸಂಸ್ಥಾನಕ್ಕೆ ಒಪ್ಪಿಸಬೇಕು ಎಂದು ಕೋರ್ಟ್ ಸೂಚಿಸಿತು.

ಸ್ವಯಂಪ್ರೇರಿತ ತೆರವು

ಕೆಲವರು ತಮ್ಮ ಅಂಗಡಿಗಳನ್ನು ಸ್ವಯಂ ಪ್ರೇರಿತವಾಗಿ ತೆರವುಗೊಳಿಸಿಕೊಂಡರು. ಕಳೆದ ಹತ್ತಾರು ವರ್ಷಗಳಿಂದ ಜಾತ್ರೆಯಲ್ಲಿ ವ್ಯಾಪಾರ ಮಾಡಲು ಹಾಕಲಾಗಿದ್ದ ಈ ಅಂಗಡಿಗಳು ಶಾಶ್ವತವಾಗಿ ನೆಲೆಯೂರಿ ಆ ಜಾಗದ ಹಕ್ಕಿಗಾಗಿ ಪ್ರತಿಪಾದಿಸಿದವರಿಗೆ ಕೋರ್ಟ್ನಲ್ಲಿ ಹಿನ್ನೆಡೆಯಾಗಿದೆ. ನ್ಯಾಯಾಲಯ ಆದೇಶದಂತೆ ತೆರವು ಕಾರ್ಯಾಚರಣೆ ಯಶಸ್ವಿಯಾಗಿ ಜರುಗಿತು.

ಮಹಾನಗರ ಪಾಲಿಕೆ ಸಿಬ್ಬಂದಿ ಮೂರು ಜೆಸಿಬಿಗಳ ಮೂಲಕ ಅಂಗಡಿಗಳ ತೆರವು ಕಾರ್ಯಾಚರಣೆ ನಡೆಸಿದರು. ಅಗತ್ಯ ಪೊಲೀಸ್ ಬಂದೋಬಸ್ತ್ ಒದಗಿಸಲಾಗಿತ್ತು. ಬೆಳಗ್ಗೆ ಅಂಡಗಿ ತೆರವು ಕಾರ್ಯಾಚರಣೆ ಶುರುವಾಗುತ್ತಿದ್ದಂತೆ ಜನ ತಂಡೋಪ ತಂಡವಾಗಿ ಆಗಮಿಸಿ ವೀಕ್ಷಿಸಿದರು. ಕೆಲ ಹೊತ್ತು ಶರಣಬಸವೇಶ್ವರ ದೇವಸ್ಥಾನದ ರಸ್ತೆ ಸಂಚಾರ ಬಂದ್ ಮಾಡಲಾಗಿತ್ತು.

ಮಹಾನಗರ ಪಾಲಿಕೆ ಆಯುಕ್ತ ಅವಿನಾಶ ಸಿಂಧೆ, ಎಸಿಪಿ ಶರಣಬಸಪ್ಪ ಸುಬೇದಾರ, ಪರಿಸರ ಅಧಿಕಾರಿ ಅಭಯಕುಮಾರ, ಪಾಲಿಕೆ ಸದಸ್ಯ ಸಚಿನ್ ಶಿರವಾಳ ಮುತುವರ್ಜಿ ವಹಿಸಿ ಕಾರ್ಯಾಚರಣೆ ನಡೆಸಿದರು. ಜಿ¯್ಲÁ ವೀರಶೈವ ಸಮಾಜದ ಅಧ್ಯP್ಷÀ ಅರುಣಕುಮಾರ ಪಾಟೀಲï ಕೊಡಲಹಂಗರಗಾ, ಮುಖಂಡರಾದ ಸಂಗಮೇಶ ರಾಜೋಳಿ, ಶರಣು ಗೋಧಿ, ಸಂಜೀವ ಐರಡ್ಡಿ,ಶರಣು ಭೂಸನೂರ ಮೊದಲಾದವರು ಸ್ಥಳಕ್ಕೆ ಭೇಟಿ ನೀಡಿ ಕಾರ್ಯವನ್ನು ಶ್ಲಾಘಿಸಿದರು. ಇನ್‌ಸ್ಪೆಕ್ಟರ್‌ಗಳಾದ ಅರುಣಕುಮಾರ, ಮಹಾಂತೇಶ ಪಾಟೀಲ್,ಹುಸೇನಾಭಾಷಾ, ಮಲ್ಲಮ್ಮ ಹಾಗೂ ಸಿಬ್ಬಂದಿ ಬಂದೋಬಸ್ತ್ ಮಾಡಿದ್ದರು.

ಮಹಾನಗರ ಪಾಲಿಕೆ ಮಾಜಿ ಸದಸ್ಯ ಪ್ರಕಾಶ ಬೆನಕನಹಳ್ಳಿ ಎಂಬುವರು ಜಾತ್ರಾ ಮೈದಾನ ಜಾಗ ಕುರಿತು ತಕರಾರು ತೆಗೆದು ಅಂಗಡಿ ಹಾಕಿಕೊಂಡಿದ್ದರು. ಇದೀಗ ತೆರವುಗೊಳಿಸುವಂತೆ ಕೋರ್ಟ್ ಆದೇಶದಂತೆ ಬೇಲಿಫ್‌ಗಳ ನೇತೃತ್ವದಲ್ಲಿ ಪಾಲಿಕೆ ಸಿಬ್ಬಂದಿ ಪೊಲೀಸರ ಸಹಕಾರದೊಂದಿಗೆ ತೆರವು ಕಾರ್ಯಾಚರಣೆ ನಡೆಸಿ ಸ್ಥಳವನ್ನು ಶರಣಬಸವೇಶ್ವರ ಸಂಸ್ಥಾನಕ್ಕೆ ಒಪ್ಪಿಸಲಾಗುತ್ತಿದೆ.

| ಅವಿನಾಶ ಶಿಂಧೆಆಯುಕ್ತ, ಮಹಾನಗರ ಪಾಲಿಕೆ

ಕೋರ್ಟ್ ಆದೇಶ ಶ್ರೀ ಶರಣಬಸವೇಶ್ವರ ಸಂಸ್ಥಾನದ ಪರವಾಗಿ ಆಗಿದೆ. ಅದರಂತೆ ಅನಧಿಕೃತ ಅಂಗಡಿ ತೆರವುಗೊಳಿಸಿ ಸಂಸ್ಥಾನಕ್ಕೆ ವಹಿಸಿದ್ದಾರೆ. ಎಂದಿನAತೆ ಶರಣನ ಜಾತ್ರೆ ಸಂದರ್ಭದಲ್ಲಿ ಅಂಗಡಿ ಹಾಕಿ ವ್ಯಾಪಾರ ಮಾಡಿಕೊಳ್ಳುವವರಿಗೆ ಮೂರು ತಿಂಗಳ ಅವಧಿಗಾಗಿ ಜಾಗಾ ಹಂಚಿಕೆ ಮಾಡುವ ಮೂಲಕ ಭಕ್ತರಿಗೆ ಅನುಕೂಲ ಮಾಡಿಕೊಡಲಾಗುವುದು.

| ಬಸವರಾಜ ದೇಶಮುಖಕಾರ್ಯದರ್ಶಿ, ಶರಣಬಸವೇಶ್ವರ ವಿದ್ಯಾವರ್ಧಕ ಸಂಘ

shop