ಬಾಲ್ಯ ವಿವಾಹ ಮೂವರಿಗೆ ಜೈಲು ಶಿಕ್ಷೆ: ಅತ್ಯಾಚಾರಿಗೆ 20 ವರ್ಷ ಜೈಲು

ಯಾದಗಿರಿ ಜಿಲ್ಲೆ, ತಾಲೂಕಿನ ಯರಗೋಳ ಗ್ರಾಮದ ನಾಗಪ್ಪ ಚಡಬಾನೂರ ಶಿಕ್ಷೆಗೀಡಾದ ಅಪರಾಧಿ. ಬಾಲ್ಯವಿವಾಹವಾದ ಯಾದಗಿರಿ ಜಿಲ್ಲೆಯ ಯರಗೋಳದ ಸಿದ್ದಪ್ಪ ಹರಕಂಚಿಗೆ ಒಂದು ವರ್ಷ ಜೈಲು, 10 ಸಾವಿರ ರೂ. ದಂಡ,, ಬಾಲ್ಯವಿವಾಹ ಮಾಡಿದ ನೊಂದ ಬಾಲಕಿಯ ತಂದೆ ನಿಂಗಪ್ಪ ಬಡ್ಡೇರ, ನಿಂಗಮ್ಮ ಬಡ್ಡೇರಗೆ ಒಂದು ವರ್ಷ ಜೈಲು ಶಿಕ್ಷೆ, 10 ಸಾವಿರ ರೂ. ದಂಡ ವಿಧಿಸಿ, ಆದೇಶಿಸಿದ್ದಾರೆ. ನೊಂದ ಬಾಲಕಿಗೆ ಐದು ಲಕ್ಷ ರೂ. ಪರಿಹಾರವಾಗಿ ನೀಡುವಂತೆ ಆದೇಶಿಸಿದ್ದಾರೆ.

ವಾಡಿ ಪೊಲೀಸ್​ ಠಾಣೆಯಲ್ಲಿ ಪ್ರಕರಣ ದಾಖಲಾಗಿತ್ತು. ತನಿಖಾಧಿಕಾರಿಗಳಾದ ಪಿಎಸ್​ಐ ತಿರುಮಲೇಶ, ಸಿಪಿಐ ಚಂದ್ರಶೇಖರ ತಿಗಡಿ ದೋಷಾರೋಪಣೆ ಸಲ್ಲಿಸಿದ್ದರು. ಸರ್ಕಾರದ ಪರ ವಿಶೇಷ ಸರ್ಕಾರಿ ಅಭಿಯೋಜಕ ಶಾಂತವೀರ ತುಪ್ಪದ ವಾದಿಸಿದ್ದರು.

ಯಾದಗಿರಿ ತಾಲೂಕಿನ ವ್ಯಾಪ್ತಿಯ ಗ್ರಾಮವೊಂದರ ಬಾಲಕಿಯನ್ನು ಚಿತ್ತಾಪುರ ತಾಲೂಕಿನ ನಾಲವಾರದ ಸಿದ್ದಪ್ಪನ ಜತೆ 2024 ಮೇ 3ರಂದು ಬಾಲ್ಯವಿವಾಹ ಮಾಡಲಾಗಿತ್ತು. ಈ ಮಧ್ಯೆ ಯರಗೋಳದ ನಾಗಪ್ಪ ಚಡಬಾನೂರನು ಬಾಲಕಿಯ ಮದುವೆಗೆ ಮುನ್ನವೇ ಚುಡಾಯಿಸುವುದು, ಆಮಿಷ ಒಡ್ಡಿ ಅತ್ಯಾಚಾರ ಎಸಗಿದ್ದ. ಬಾಲ್ಯ ವಿವಾಹದ ನಂತರವೂ ನಿನ್ನನ್ನು ಮದುವೆ ಆಗುತ್ತೇನೆ, ಗಂಡನನ್ನು ಬಿಟ್ಟು ಬಾ ಎಂದು ಆಮಿಷ ಒಡ್ಡಿದ್ದಾನೆ. ನಾಲವಾರಕ್ಕೆ ಆಗಮಿಸಿ 2024 ಸೆ.5ರಂದು ಬಾಲಕಿಯನ್ನು ಗಂಡನ ಮನೆಯಿಂದಲೇ ಜರ್ಬದಸ್ತಿಯಿಂದ ಅಪಹರಿಸಿಕೊಂಡು ಬೈಕ್​ ಮೇಲೆ ಕರೆದೊಯ್ದು, ತೊಗರಿ ಹೊಲದಲ್ಲಿ ಅತ್ಯಾಚಾರ ಎಸಗಿ, ವಾಡಿ ರೈಲ್ವೆ ಸ್ಟೇಷನ್​ನಲ್ಲಿ ಕೂಡಿಸಿ, ಹಣ ತರುತ್ತೇನೆ ಎಂದು ಹೇಳಿ ಪರಾರಿಯಾಗಿದ್ದ. ಈ ಬಗ್ಗೆ ಬಾಲಕಿಯೂ ತನ್ನ ತಂದೆ, ತಾಯಿಗೆ ತಿಳಿಸಿದ್ದಳು. ಪ್ರಶ್ನಿಸಿದ ಬಾಲಕಿಯ ತಂದೆ, ತಾಯಿಗೆ ಜೀವ ಬೆದರಿಕೆ ಹಾಕಿದ್ದ. ಈ ಕುರಿತು ಚಿತ್ತಾಪುರ ತಾಲೂಕಿನ ವಾಡಿ ಠಾಣೆಯಲ್ಲಿ ಪ್ರಕರಣ ದಾಖಲಾಗಿತ್ತು.