ರಸ್ತೆಗೆ ಬಾಗಿದ ಒಣಮರಗಳು : ಸಂಚಾರಕ್ಕೆ ಸಂಕಷ್ಟ ಕ್ರಮಕ್ಕೆ ಅರಣ್ಯ ಇಲಾಖೆಗೆ ಒತ್ತಾಯ

ನರೇಂದ್ರ ಎಸ್.ಮರಸಣಿಗೆ ಹೆಬ್ರಿ

ಹೆಬ್ರಿ ತಾಲೂಕಿನ ಬೇಳಂಜೆ- ದೂಪದಕಟ್ಟೆ- ಹೊನ್ಕಲ್ ತನಕ ಅನೇಕ ಒಣಮರಗಳು ರಸ್ತೆಗೆ ಬಾಗಿಕೊಂಡು ಮಳೆಗಾಲದಲ್ಲಿ ಸಂಚಾರ ಮಾಡುವಾಗ ಜೀವ ಭಯ ತಂದೊಡುತ್ತಿದೆ. ವಿಪರೀತ ಗಾಳಿ ಮಳೆಗೆ ಆಗಾಗ ಅನೇಕ ಮರಗಳು ರಸ್ತೆಗೆ ಬೀಳುತ್ತಿವೆ.
ಹೆಬ್ರಿ ಹಾಗೂ ಕುಂದಾಪುರ ಸಂಪರ್ಕಿಸುವ ಪ್ರಮುಖ ಹೆದ್ದಾರಿ ಇದಾಗಿದೆ. 20ರಿಂದ 25 ಮರಗಳು ಅಪಾಯಕಾರಿಯಾಗಿ ವಾಲಿಕೊಂಡಿವೆ. ಕೆಲವರು ವಿಪರೀತ ಗಾಳಿ ಮಳೆ ಆಗುವಾಗ ಈ ಮಾರ್ಗದಲ್ಲಿ ಸಂಚರಿಸುವುದೇ ಇಲ್ಲ. ಅಷ್ಟರ ಮಟ್ಟಿಗೆ ಇದು ಅಪಾಯಕಾರಿ. ಅರಣ್ಯ ಇಲಾಖೆಯವರು ಇದರ ಗೋಜಿಗೆ ಹೋಗುತ್ತಿಲ್ಲ. ಅನಾಹುತ ಆಗುವ ಮೊದಲು ಕ್ರಮ ಕೈಗೊಳ್ಳಿ ಎಂದು ಜನ ಇಲಾಖೆಯನ್ನು ಒತ್ತಾಯಿಸಿದ್ದಾರೆ.

ಜೀವ ಹೋಗಿದೆ

ಕೆಲವು ಸಮಯದ ಹಿಂದೆ ಕುಂದಾಪುರ ಕಡೆಯಿಂದ ಬೈಕ್‌ನಲ್ಲಿ ಬೇಳಂಜೆ ಬರುತ್ತಿರುವಾಗ ವಿಪರೀತ ಗಾಳಿ ಮಳೆಗೆ ಮರ ಬಿದ್ದು ಬೆಳಂಜೆಯ ಯುವಕನೊಬ್ಬ ನಿಧನ ಹೊಂದಿದ್ದ.

ಮಕ್ಕಳು ನಡೆದು ಹೋಗುವ ದಾರಿ

ಸಳ್ಳೆಕಟ್ಟೆ ಶಾಸ್ತ್ರಿ ನಗರದಿಂದ ದೂಪದ ಕಟ್ಟೆ ತನಕ ಪ್ರಾಥಮಿಕ ಹಾಗೂ ಪ್ರೌಢಶಾಲೆಗೆ ಅನೇಕ ವಿದ್ಯಾರ್ಥಿಗಳು ಈ ರಸ್ತೆಯಲ್ಲಿ ನಡೆದು ಸಾಗುತ್ತಾರೆ. ಗಾಳಿ ಮಳೆಗೆ ಮರಗಳು ಅಲ್ಲಾಡುವುದು ನೋಡಿದರೆ, ಯಾರಿಗಾದರೂ ಒಂದೊಮ್ಮೆ ದಿಗ್ಭ್ರಮೆಯಾಗುತ್ತದೆ. ಮಕ್ಕಳ ಹಿತಾದೃಷ್ಟಿಯಿಂದ ಸಂಬಂಧಪಟ್ಟವರು ಶೀಘ್ರ ಮರ ತೆರವು ಮಾಡಬೇಕಾಗಿದೆ.

ಅರಣ್ಯ ಇಲಾಖೆ ಸ್ಪಂದನೆ ಇಲ್ಲ

ಅಪಾಯಕಾರಿ ಮರ ತೆರವಿನ ಬಗ್ಗೆ, ಗ್ರಾಪಂ, ತಾಪಂ ಹಾಗೂ ಜಿಲ್ಲಾ ಮಟ್ಟದ ಸಭೆಯಲ್ಲಿ ಗಮನಸೆಳೆದಿದ್ದರೂ ಯಾವುದೇ ಪ್ರಯೋಜನ ಆಗಿಲ್ಲ. ಅರಣ್ಯ ಇಲಾಖೆ ಒಂದೆರಡು ಬಾರಿ ನೋಡಿ ಹೋಗಿ ಏನು ಕ್ರಮ ಜರುಗಿಸಿಲ್ಲ. ಇವರ ಬೇಜವಾಬ್ದಾರಿತನಕ್ಕೆ ನಾವು ಜೀವ ಕಳೆದುಕೊಂಡಿದ್ದೇವೆ. ಈ ಸಲ ಸೂಕ್ತ ಕ್ರಮ ಜರುಗಿಸದಿದ್ದಲ್ಲಿ ಹೋರಾಟ ಮಾಡಲಾಗುವುದು ಎಂದು ಸಾರ್ವಜನಿಕರು ಎಚ್ಚರಿಸಿದ್ದಾರೆ.

https://www.vijayavani.net/fear-of-dangerous-trees

https://www.vijayavani.net/dangerous-trees-on-the-side-of-the-highway