ಕುಡಿದು ಕಾರು ಚಲಾಯಿಸಿದ್ದ, ತಡೆದಿದ್ದಕ್ಕೆ 'ನಾನ್ಯಾರು ಗೊತ್ತಾ?' ಎಂದು ಪೊಲೀಸ್​ಗೇ ಕಾರು ಗುದ್ದಿಸಿ ಕೊನೆಗೂ ಸಿಕ್ಕಿಬಿದ್ದ..

ಬೆಂಗಳೂರು: ಕುಡಿದು ಅಮಲಿನಲ್ಲಿ ಕಾರು ಚಲಾಯಿಸಿದ್ದಲ್ಲದೆ, ಪರಿಶೀಲನೆಗೆಂದು ತಡೆದಿದ್ದ ಪೊಲೀಸರನ್ನೇ ಪ್ರಶ್ನಿಸಿ, ಅವರಿಗೆ ಕಾರು ಗುದ್ದಿಸಿ ಮದ್ಯಪಾನಿಯೊಬ್ಬ ಪರಾರಿಯಾಗಿದ್ದಾನೆ. ಬೆಂಗಳೂರಿನ ಎಚ್​ಎಎಲ್ ಮುಖ್ಯರಸ್ತೆಯಲ್ಲೇ ಈ ಪ್ರಕರಣ ನಡೆದಿದೆ.

ನಿನ್ನೆ ಬೆಳಗಿನ ಜಾವ ಡ್ರಂಕ್​ ಆ್ಯಂಡ್ ಡ್ರೈವ್ ಪರಿಶೀಲನೆ ನಡೆಸುತ್ತಿದ್ದ ಹಳೇ ವಿಮಾನ ನಿಲ್ದಾಣ ಸಂಚಾರ ಪೊಲೀಸರು, ಯಮಲೂರು ಕಡೆಯಿಂದ ವೇಗವಾಗಿ ಬರುತ್ತಿದ್ದ ಕೆಎ 01 ಎಂಎಸ್​ 3772 ನೋಂದಣಿಯ ಹ್ಯುಂಡೈ ಕ್ರೆಟಾ ಕಾರು ತಡೆದಿದ್ದರು. ಆಗ ಅದನ್ನು ಚಲಾಯಿಸುತ್ತಿದ್ದ ವ್ಯಕ್ತಿ, 'ನಾನ್ಯಾರು ಗೊತ್ತಾ, ನನ್ನ ಕಾರು ತಡೆಯಲು ಯಾರು ಹೇಳಿದ್ದು?' ಎಂದು ಪೊಲೀಸರನ್ನೇ ಏರುದನಿಯಲ್ಲಿ ಪ್ರಶ್ನಿಸಿದ್ದಾನೆ.

ಇದನ್ನೂ ಓದಿ: ವಿಮಾನದಲ್ಲೇ ಬಂದಿಳಿಯುತ್ತಿದ್ದರು, ಲಾಡ್ಜ್​​ನಲ್ಲೇ ತಂಗಿರುತ್ತಿದ್ದರು; ಆಮೇಲೆ ಈ ಇಬ್ಬರು ಮಾಡುತ್ತಿದ್ದುದು ಏನು ಗೊತ್ತಾ?

ಮಾತ್ರವಲ್ಲ ಹೆಡ್​ ಕಾನ್​ಸ್ಟೆಬಲ್ ಮುಬಾರಕ್ ಅಲಿ ಎಂಬವರನ್ನು ಅವಾಚ್ಯ ಶಬ್ದಗಳಿಂದ ನಿಂದಿಸಿದ್ದಲ್ಲದೆ, ಅವರಿಗೆ ಕಾರಿನಿಂದ ಗುದ್ದಿಸಿ ಮುಂದಕ್ಕೆ ಹೋಗಿದ್ದಾನೆ. ಪೊಲೀಸ್​ಗೆ ಕಾರು ಗುದ್ದಿಸಿ ಪರಾರಿ ಆಗುವ ವೇಳೆ ರಸ್ತೆ ಬದಿಯ ಗೋಡೆಗೂ ಕಾರು ಡಿಕ್ಕಿಯಾಗಿದೆ. ಹೆಡ್​​ ಕಾನ್​ಸ್ಟೆಬಲ್​ ಮುಬಾರಕ್​ ಅಲಿ ಎಡಗಾಲಿನ ಮಂಡಿ, ಮೊಣಕಾಲಿಗೆ ಗಾಯಗಳಾಗಿದ್ದು, ಆಸ್ಪತ್ರೆಗೆ ದಾಖಲಿಸಲಾಗಿದೆ.

ಕಾರು ಚಾಲಕ ರಾಮಾಂಜುಲು ಎಂಬಾತನನ್ನು ಬಂಧಿಸಿರುವ ಪೊಲೀಸರು, ಎಚ್​ಎಎಲ್ ಠಾಣೆಯಲ್ಲಿ ಪ್ರಕರಣ ದಾಖಲಿಸಿದ್ದಾರೆ. ಪೊಲೀಸರು ಸರ್ಕಾರಿ ಅಧಿಕಾರಿಯ ಕರ್ತವ್ಯಕ್ಕೆ ಅಡ್ಡಿ, ಕೊಲೆ ಯತ್ನ ಕೇಸ್ ದಾಖಲಿಸಿದ್ದಾರೆ.

https://www.vijayavani.net/thieves-gang-put-chemical-on-teacher-then-pretended-as-helping-and-snatched-money-bag/

https://www.vijayavani.net/a-doctor-killed-his-wife-by-giving-high-dose-injection/