'ಕಪಿಲ್​ದೇವ್' ವರ್ಗಾವಣೆ, 'ಬೌಂಡರಿ' ಮೀರಿದ ಸಂಭ್ರಮ!; ಖಾಕಿ ಖದರಿಗೆ ಮುದುರಿತಾ ಕೋವಿಡ್ ನಿಯಮ?

ಕಲಬುರಗಿ: ಸಾರ್ವಜನಿಕರು ಯಾರಾದರೂ ಕೋವಿಡ್ ನಿಯಮ ಪಾಲಿಸಲಿಲ್ಲ ಎಂದರೆ ಪೊಲೀಸರು ಅಡ್ಡಗಟ್ಟಿ ತಡೆದು ಖಡಕ್​ ಆಗಿ ಗದರುವ ಜತೆಗೆ ದಂಡವನ್ನೂ ವಸೂಲಿ ಮಾಡುತ್ತಾರೆ. ಆದರೆ ಇಲ್ಲೊಂದು ಕಡೆ ಪೊಲೀಸರ ಸಮ್ಮುಖದಲ್ಲೇ ದಂಡಿಯಾಗಿ ಕೋವಿಡ್​ ನಿಯಮ ಉಲ್ಲಂಘನೆಯಾಗಿದ್ದು, ಇದಕ್ಕೆಲ್ಲ ಪೊಲೀಸ್ ಇನ್​ಸ್ಪೆಕ್ಟರ್ ಒಬ್ಬರ ವರ್ಗಾವಣೆ ಖುಷಿಯೇ ಕಾರಣವಾಗಿದೆ.

ಕಲಬುರಗಿಯ ಬ್ರಹ್ಮಪುರ ಠಾಣೆಯಲ್ಲಿ ಕರ್ತವ್ಯದಲ್ಲಿದ್ದ ಇನ್​ಸ್ಪೆಕ್ಟರ್ ಕಪಿಲ್​ದೇವ್​ ಎಂಬವರು ಬೀದರ್​ನ ನ್ಯೂಟೌನ್​ ಠಾಣೆಗೆ ವರ್ಗಾವಣೆಗೊಂಡಿದ್ದು, ಅವರನ್ನು ಬೀಳ್ಕೊಡುವಾಗ 'ಬೌಂಡರಿ' ಮೀರಿ ಸಂಭ್ರಮಿಸಿರುವ ಅಭಿಮಾನಿಗಳು-ಸಹೋದ್ಯೋಗಿಗಳು ದೈಹಿಕ ಅಂತರ ಕಾಪಾಡುವುದು, ಮಾಸ್ಕ್​ ಧರಿಸುವುದು ಮುಂತಾದ ಕೋವಿಡ್ ನಿಯಮಗಳನ್ನು ಉಲ್ಲಂಘಿಸಿದ್ದಾರೆ.

ಇದನ್ನೂ ಓದಿ: ಒಬ್ಬನ ಹುಟ್ಟುಹಬ್ಬ, ಮತ್ತೊಬ್ಬನಿಗೆ ಸಾವು, ಇನ್ನೊಬ್ಬನಿಗೆ ಗಾಯ: ಅಷ್ಟಕ್ಕೂ ದೇಹ ಛಿದ್ರವಾಗಿದ್ದೇಕೆ?

ವರ್ಗಾವಣೆ ನೆಪದಲ್ಲಿ ಕಲಬುರಗಿಯ ಯಾತ್ರಿ ನಿವಾಸದಲ್ಲಿ ಕಪಿಲ್​ದೇವ್​ಗೆ ಭರ್ಜರಿ ಬೀಳ್ಕೊಡುಗೆ ಕಾರ್ಯಕ್ರಮ ಹಮ್ಮಿಕೊಳ್ಳಲಾಗಿತ್ತು. ಈ ಸಂದರ್ಭದಲ್ಲಿ ಕಲಬುರಗಿಯ ವಿವಿಧ ಸಂಘಟನೆಗಳ ಅಭಿಮಾನಿಗಳು ಇನ್​ಸ್ಪೆಕ್ಟರ್ ಮೇಲೆ ಹೂಗಳ ಸುರಿಮಳೆಗರೆದಿದ್ದಲ್ಲದೆ, ಅವರನ್ನು ಹೊತ್ತುಕೊಂಡು ಗುಂಪಾಗಿ ಕುಣಿದಿದ್ದಾರೆ. ಅವರ ಸಂಭ್ರಮಾಚರಣೆಯ ವಿಡಿಯೋ ವೈರಲ್ ಆಗಲಾರಂಭಿಸಿದೆ. ಕರೊನಾ ನಿಯಮ ಪಾಲಿಸಬೇಕಾದ ಹಾಗೂ ಪಾಲಿಸುವಂತೆ ನೋಡಿಕೊಳ್ಳಬೇಕಾದ ಪೊಲೀಸರ ಸಮ್ಮುಖದಲ್ಲೇ ಹೀಗೆ ಕೋವಿಡ್​ ಮಾರ್ಗಸೂಚಿ ಉಲ್ಲಂಘನೆ ಆಗಿರುವ ಕುರಿತು ಈಗ ಸಾರ್ವಜನಿಕರಿಂದ ತೀವ್ರ ಅಸಮಾಧಾನ ಕೇಳಿಬರುತ್ತಿದೆ.

https://www.vijayavani.net/these-people-can-face-delta-plus-variant-more-effectively/

https://www.vijayavani.net/does-pregnants-can-take-covid-vaccine/

https://www.vijayavani.net/what-percentage-of-protection-you-get-after-taking-two-doses-of-vaccine/