ನಾವು ವೋಟ್ ಮಾಡಲ್ಲ!

ಕಲ್ವಳ್ಳಿ ಭಾಗದ ಗಾಯತ್ರಿ ಅಣೆಕಟ್ಟೆ ಒಳಗೊಂಡು 16 ಕೆರೆಗಳಿಗೆ ವಿವಿಎಸ್ ಜಲಾಶಯದಿಂದ ನೀರು ಹರಿಸುವಂತೆ ಆಗ್ರಹಿಸಿ ಹೋರಾಟ ತೀವ್ರಗೊಂಡಿದ್ದು, ಗೌಡನಹಳ್ಳಿಯಿಂದ ಸೋಮವಾರ ಸಾವಿರಾರು ರೈತರು ರ‌್ಯಾಲಿಯಲ್ಲಿ ಬಂದು ತಾಲೂಕು ಕಚೇರಿ ಆವರಣದಲ್ಲಿ ಪ್ರತಿಭಟನೆ ನಡೆಸಿದರು.

ಕಲ್ವಳ್ಳಿ ಭಾಗದ 166 ಹಳ್ಳಿಗಳಲ್ಲಿ ಜನ-ಜಾನುವಾರುಗಳ ಕುಡಿಯುವ ನೀರಿಗೂ ಹಾಹಾಕಾರವಿದೆ. ಈ ಭಾಗದ 16 ಕೆರೆಗಳು ತುಂಬಿದ್ದೇ ಅಪರೂಪ. ಸಾವಿರ ಅಡಿ ಕೊರೆಸಿದರೂ ಕೊಳವೆ ಬಾವಿಗಳಲ್ಲಿ ಹನಿ ನೀರು ಬರುತ್ತಿಲ್ಲ. ಲಕ್ಷಾಂತರ ರೂಪಾಯಿ ಖರ್ಚು ಮಾಡಿ ಬೆಳೆಸಿದ್ದ ಅಡಿಕೆ, ತೆಂಗು, ದಾಳಿಂಬೆ ತೋಟಗಳು ಒಣಗಿ ಹೋಗಿವೆ. ಪದವಿ ನಂತರ ಕೃಷಿಯಲ್ಲಿ ಏನಾದರೂ ಸಾಧಿಸಬೇಕೆಂಬ ಹುಮ್ಮಸ್ಸಿನಲ್ಲಿ ಕೃಷಿಗೆ ಇಳಿದಿದ್ದ ನೂರಾರು ಯುವಕರು ಬೆಂಗಳೂರು, ಗೋವಾ, ಮುಂಬೈ ನಗರಗಳಿಗೆ ವಲಸೆ ಹೋಗಿದ್ದಾರೆ. ಇದು ಆಡಳಿತ ನಡೆಸುವವರಿಗೆ ತಿಳಿದಿದ್ದೂ ನೀರು ಹರಿಸುವ ವಿಚಾರದಲ್ಲಿ ಮೌನಕ್ಕೆ ಶರಣಾಗಿರುವುದು ಅನ್ನದಾತರಿಗೆ ಮಾಡುತ್ತಿರುವ ದ್ರೋಹ ಎಂದು ಕಿಡಿಕಾರಿದರು.

ಕಲ್ವಳ್ಳಿ ಭಾಗದ ಕೆರೆಗಳಿಗೆ ನೀರು ತುಂಬಿಸಲು ಅಗತ್ಯವಿರುವ 0.307 ಟಿಎಂಸಿ ಅಡಿ ನೀರನ್ನು ವಿವಿ ಸಾಗರ ಜಲಾಶಯದಿಂದ ವಿಶ್ವೇಶ್ವರಯ್ಯ ನೀರಾವರಿ ನಿಗಮ ಹಂಚಿಕೆ ಮಾಡಿ ಆದೇಶ ಹೊರಡಿಸಿದೆ. 265 ಕೋಟಿ ರೂ. ವೆಚ್ಚದಲ್ಲಿ ಕಾಮಗಾರಿ ಅನುಷ್ಠಾನಗೊಳಿಸಲು ವಿಸ್ತೃತ ವರದಿ ತಯಾರಿಸಿ ತಾಂತ್ರಿಕ ಅನುಮೋದನೆ ನೀಡಲಾಗಿದೆ. ಈ ವಿಚಾರವನ್ನು ಸಚಿವ ಸಂಪುಟದ ಮುಂದಿಟ್ಟು ಒಪ್ಪಿಗೆ ಪಡೆಯಲು ಎಷ್ಟುದಿನ ಬೇಕು. ಬರದ ಬೇಗೆಯಿಂದ ಕಂಗೆಟ್ಟಿರುವ ರೈತರ ತಾಳ್ಮೆಗೂ ಒಂದು ಮಿತಿ ಇದೆಯಲ್ಲವೇ? ಎಂದು ಮುಖಂಡರು ಪ್ರಶ್ನಿಸಿದರು.

ಈ ಭಾಗದ ಜನ ಬದುಕಬೇಕೆಂದರೆ ವಾಣಿ ವಿಲಾಸ ಅಣೆಕಟ್ಟೆಯಿಂದ ನೀರು ಬರಲೇಬೇಕು. ಇಲ್ಲವಾದಲ್ಲಿ ನಾವು ಬದುಕಿದ್ದೂ ಸತ್ತಂತೆ. ಸತ್ತವರನ್ನು ವೋಟ್ ಕೇಳಲು ಯಾರೂ ಬರಬಾರದು. ಕ್ಷೇತ್ರಕ್ಕೆ ಉಪ ಚುನಾವಣೆ ನಡೆಯಲಿದ್ದು, ಕೆರೆಗಳಿಗೆ ನೀರು ತುಂಬಿಸುವ ಕಾಮಗಾರಿಗೆ ಚಾಲನೆ ಕೊಟ್ಟು ನಮ್ಮ ಊರುಗಳ ಒಳಗೆ ಬರಬೇಕು. ಸುಳ್ಳು ಭರವಸೆಗಾರರು ಗ್ರಾಮದೊಳಗೆ ಕಾಲಿಡಬಾರದು ಎಂದು ರೈತರು ಷರತ್ತು ಹಾಕಿದರು.

ರೈತ ಸಂಘದ ಜಿಲ್ಲಾಧ್ಯಕ್ಷ ಕೆ.ಟಿ. ತಿಪ್ಪೇಸ್ವಾಮಿ, ಪತ್ರಕರ್ತ ಲಕ್ಷ್ಮಣ್ ಹೂಗಾರ್, ದಿಂಡಾವರ ಚಂದ್ರಗಿರಿ, ಬಳಗಟ್ಟ ವೆಂಕಟೇಶ್, ಆಲೂರು ಸಿದ್ದರಾಮಣ್ಣ, ಗೌಡನಹಳ್ಳಿ ಅಭಿ, ಶ್ರೀಪತಿ, ನಾಗರಾಜ್, ಪ್ರಕಾಶ್, ಸೂರಪ್ಪನ ಹಟ್ಟಿ ಕೃಷ್ಣ, ದಿಂಡಾವರ ವಿರೂಪಾಕ್ಷ, ಗಿರೀಶ್ ಗೌಡ, ಮಹಂತೇಶ್ ಪಾಲ್ಗೊಂಡಿದ್ದರು.