ಮುಂಗಾರು ಹಂಗಾಮಿನ ಶೇಂಗಾ ಬಿತ್ತನೆಗೆ ಹಿನ್ನಡೆ

ಜೂನ್ ತಿಂಗಳ ಕೊನೆಯ ಹೊತ್ತಿಗೆ ಶೇ.60ರಷ್ಟು ಬಿತ್ತನೆ ಆಗಬೇಕಿದ್ದ ತಾಲೂಕಿನಲ್ಲಿ ಗಣನೀಯವಾಗಿ ಇಳಿಮುಖವಾಗಿದೆ. ನಗರದ ಕಸಬಾ ವ್ಯಾಪ್ತಿಯಲ್ಲಿ 500 ಹೆಕ್ಟೇರ್, ತಳಕು ಹೋಬಳಿಯಲ್ಲಿ 1100, ನಾಯಕನಹಟ್ಟಿ ಭಾಗದಲ್ಲಿ 1200, ಪರಶುರಾಮಪುರ ಭಾಗದಲ್ಲಿ 700 ಸೇರಿ ಕೇವಲ 3400 ಹೆಕ್ಟೇರ್ ಪ್ರದೇಶದಲ್ಲಿ ಮಾತ್ರ ಬಿತ್ತನೆ ಆಗಿದೆ.

ಈ ವರ್ಷದ 67,199 ಸಾವಿರ ಹೆಕ್ಟೇರ್ ಬಿತ್ತನೆ ಶೇಂಗಾ ಭೂಮಿಗೆ ಅನುಗುಣವಾಗಿ ನಿರೀಕ್ಷಿತ 14 ಸಾವಿರ ಕ್ವಿಂಟಾಲ್ ದಾಸ್ತಾನು ವ್ಯವಸ್ಥೆಗೆ ಈಗಾಗಲೇ 1960 ಕ್ವಿಂಟಾಲ್ ಸಂಗ್ರಹ ಮಾಡಿಕೊಳ್ಳಲಾಗಿತ್ತು. ತಾಲೂಕಿನ ಸುಮಾರು 30 ಸಾವಿರ ರೈತರಿಗೆ ಸಮರ್ಪಕವಾಗಿ ಶೇಂಗಾ ವಿತರಣೆ ದೃಷ್ಟಿಯಿಂದ ನಗರದ ಎಪಿಎಂಸಿ ಮಾರುಕಟ್ಟೆ ಮಳಿಗೆಯಲ್ಲಿ 330 ಕ್ವಿಂಟಾಲ್, ತಳಕು ಹೋಬಳಿ ಕೃಷಿ ಉಪ ಕೇಂದ್ರದಲ್ಲಿ 180, ಪರಶುರಾಮಪುರ ಹೋಬಳಿ ಕೃಷಿ ಉಪ ಕೇಂದ್ರದಲ್ಲಿ 170, ನಾಯಕನಹಟ್ಟಿ ಹೋಬಳಿ ಕೃಷಿ ಉಪ ಕೇಂದ್ರದಲ್ಲಿ 150 ಕ್ವಿಂಟಾಲ್ ಶೇಂಗಾ ದಾಸ್ತಾನು ಮಾಡಿಕೊಂಡಿದ್ದ ಕೃಷಿ ಇಲಾಖೆಯ ಕಾರ್ಯಕ್ಕೂ ಹಿನ್ನಡೆ ಆಗುವ ರೀತಿಯಲ್ಲಿ ಶೇಂಗಾ ಖರೀದಿಗೆ ರೈತರು ಮುಂದೆ ಬರುತ್ತಿಲ್ಲ.

ಮಳೆಗಾಲದಲ್ಲೂ ಮಳೆರಾಯನಿಗೆ ಕೈ ಮುಗಿಯುವ ಸೀಮೆ ನಮ್ಮದು ಎನ್ನುವ ಚಿಂತಕರ ಮಾತು ವರ್ಷದಿಂದ ವರ್ಷಕ್ಕೆ ಬಲಗೊಳ್ಳುತ್ತಿದೆ. ಪ್ರತಿದಿನ ಸಂಜೆ ಹೊತ್ತಿಗೆ ಮಳೆ ಮೋಡಗಳಾಗುತ್ತಿವೆ. ಗಾಳಿಯ ಜತೆಯಾಗಿ ಮಾಯವಾಗುತ್ತವೆ. ಬಿತ್ತನೆ ಕಾಲ ದಿನೇದಿನೆ ಹಿಂದಕ್ಕೆ ಹೋಗುತ್ತದಲ್ಲ ಎಂದು ರೈತರು ಕಂಗಾಲಾಗಿದ್ದಾರೆ. ಕಳೆದ ವರ್ಷ ಮಳೆಯ ಕೊರತೆಯಿಂದ ಸಂಪೂರ್ಣ ಬೆಳೆ ಕಳೆದುಕೊಂಡಿದ್ದ ರೈತಾಪಿ ವರ್ಗಕ್ಕೆ ಈ ವರ್ಷವೂ ಮಳೆ ಇಲ್ಲದೆ ಬರಗಾಲವೇ ಗತಿ ಎಂದು ನೆತ್ತಿಯ ಮೇಲೆ ಕೈ ಹೊತ್ತು ಕೂರುವ ಪರಿಸ್ಥಿತಿ ಕಾಣುತ್ತಿದೆ.

"

ಮಳೆಯ ಕೊರತೆಯಿಂದ ಬಿತ್ತನೆ ಹದ ಈಗಾಗಲೇ ಕೈ ತಪ್ಪಿದೆ. ರೈತರಲ್ಲಿ ಈ ವರ್ಷದ ಶೇಂಗಾ ಬೆಳೆಯಲ್ಲಿ ನಂಬಿಕೆ ಇಲ್ಲ. ಅಲ್ಪಸ್ವಲ್ಪ ಮಳೆ ಬಂದರೆ ಜಾನುವಾರುಗಳ ಮೇವಿಗಾಗಿ, ಬಿತ್ತನೆ ಮಾಡಿಕೊಳ್ಳುವ ರೈತರಿಗೆ ಅರ್ಧ ದರಕ್ಕೆ ಶೇಂಗಾ ವಿತರಣೆ ಮಾಡಲು ಸರ್ಕಾರ ವ್ಯವಸ್ಥೆ ಮಾಡಬೇಕು.

— -ರೆಡ್ಡಿಹಳ್ಳಿ ವೀರಣ್ಣ, ಉಪಾಧ್ಯಕ್ಷ, ರಾಜ್ಯ ರೈತ ಸಂಘ, ಚಳ್ಳಕೆರೆ.

"

ಕಳೆದ ವರ್ಷ ಮಳೆ ಕೊರತೆಯಿಂದ ಬೆಳೆ ನಷ್ಟವಾಗಿದ್ದರೂ ಸಮರ್ಪಕವಾಗಿ ಬೆಳೆ ವಿಮೆ, ಪರಿಹಾರ ಸಿಗಲಿಲ್ಲ. ಈ ವರ್ಷ ಆರಂಭದಲ್ಲೇ ಮಳೆ ಹಿನ್ನಡೆ ಆಗಿದೆ. ಕೂಡಲೇ ರಾಜ್ಯ ಸರ್ಕಾರ ಬರಗಾಲ ಘೋಷಣೆ ಮಾಡಬೇಕು. ಕೂಲಿ ಕಾರ್ಮಿಕರಿಗೆ ಪಂಚಾಯಿತಿ ಹಂತದಲ್ಲಿ ಖಾತ್ರಿಯಲ್ಲಿ ಕೆಲಸ ಕೊಡಬೇಕು. ಹಳ್ಳಿಗಳಿಂದ ವಲಸೆ ಹೋಗುವುದು ತಪ್ಪಿಸಬೇಕು. ಪಂಚಾಯಿತಿಗೊಂದು ಗೋಶಾಲೆ ಆರಂಭ ಮಾಡಬೇಕು.

— -ಕೆ. ಚಿಕ್ಕಣ್ಣ, ಕಾರ್ಯಾಧ್ಯಕ್ಷ, ಅಖಂಡ ಕರ್ನಾಟಕ ರೈತ ಸಂಘ, ಚಳ್ಳಕೆರೆ.