ಶಿವನಸಮುದ್ರ ರಸ್ತೆ ಅಭಿವೃದ್ಧಿ ಕಾಮಗಾರಿಗೆ ಚಾಲನೆ

ಹಲವು ವರ್ಷಗಳಿಂದ ಹಾಳಾದ ಈ ರಸ್ತೆಯಲ್ಲಿಯೇ ಸಂಚರಿಸಿ ಜನರು ಹೈರಾಣಾಗಿದ್ದರು. ಅಲ್ಲದೆ, ವಿಶ್ವ ಪ್ರಸಿದ್ಧ ಭರಚುಕ್ಕಿ ಫಾಲ್ಸ್ , ಸಮೂಹ ದೇವಾಲಯಗಳಾದ ಮಧ್ಯರಂಗ ದೇವಾಲಯ, ಶ್ರೀ ಮೀನಾಕ್ಷಿ ಸಮೇತ ದೇವಾಲಯ ಹಾಗೂ ಶಿಂಷಾ ಮಾರಮ್ಮ ದೇವಾಲಯಕ್ಕೆ ದೇಶ ಹಾಗೂ ರಾಜ್ಯದ ನಾನಾ ಕಡೆಗಳಿಂದ ಲಕ್ಷಾಂತರ ಸಂಖ್ಯೆಯಲ್ಲಿ ಪ್ರವಾಸಿಗರು ವರ್ಷವಿಡೀ ಆಗಮಿಸುತ್ತಾರೆ. ಈ ವೇಳೆ ರಸ್ತೆಯ ಶೋಚನೀಯ ಪರಿಸ್ಥಿತಿ ನೋಡಿ ಬೇಸರ ವ್ಯಕ್ತಪಡಿಸುತ್ತಿದ್ದರು. ಇನ್ನೂ ಪ್ರವಾಸಿ ತಾಣಗಳಿಗೆ ಹೊರಗಿನಿಂದ ಬರುವ ಜನರನ್ನು ಕರೆದೊಯ್ಯುವ ಆಟೋ ಚಾಲಕರೇ ರಸ್ತೆಗುಂಡಿಗಳಿಗೆ ಮಣ್ಣು ತುಂಬಿಸಿರುವ ಉದಾಹರಣೆಗಳಿವೆ. ಹಲವು ವರ್ಷಗಳಿಂದ ಹದಗೆಟ್ಟಿದ್ದ ಈ ರಸ್ತೆಗೆ ಕೊನೆಗೂ ಅಭಿವೃದ್ಧಿಯ ಭಾಗ್ಯ ದೊರೆತಿದೆ.

ಶಾಸಕ ಎಂ.ಆರ್.ಮಂಜುನಾಥ್ ಮಾತನಾಡಿ, ಸುಮಾರು 1 ಕೋಟಿ ರೂ.ವೆಚ್ಚದಲ್ಲಿ ಶಿವನ ಸಮುದ್ರ ಗ್ರಾಮದ 3 ಕಿ.ಮೀ. ಉದ್ದದ ರಸ್ತೆ ಅಭಿವೃದ್ಧಿ ಕಾಮಗಾರಿಗೆ ಎನ್.ಎಚ್ ರಸ್ತೆಯ ಉಳಿತಾಯ ಹಣದಲ್ಲಿ 75 ಲಕ್ಷ ರೂ. ಹಾಗೂ ವಿಶೇಷ ಅನುದಾನದಿಂದ 20 ಲಕ್ಷ ರೂ.ನೀಡಿ ಗುಣಮಟ್ಟದ ರಸ್ತೆ ನಿರ್ಮಾಣ ಚಾಲನೆ ನೀಡಲಾಗಿದೆ.

ಹಲವು ವರ್ಷಗಳಿಂದ ಈ ರಸ್ತೆ ಅಭಿವೃದ್ಧಿಗೆ ಪ್ರವಾಸಿಗರ ಬೇಡಿಕೆಯಿತ್ತು. ಅದರಂತೆ, ಅಭಿವೃದ್ಧಿ ಕಾಮಗಾರಿಗೆ ಭೂಮಿಪೂಜೆ ನೆರವೇರಿಸಲಾಗಿದೆ. ಸುಪ್ರಸಿದ್ಧ ಭರಚುಕ್ಕಿ ಜಲಪಾತ ಹಾಗೂ ಧಾರ್ಮಿಕ ಕ್ಷೇತ್ರಗಳಿಗೆ ಹೆಸರಾಗಿರುವ ಶಿವನ ಸಮುದ್ರ ವಜ್ರವಿದ್ದಂತೆ. ಅದು ಹೊಳೆಯುವ ರೀತಿ ಅಭಿವೃದ್ಧಿ ಕೆಲಸಗಳನ್ನು ಮಾಡಲಾಗುತ್ತದೆ ಎಂದರು.

ಸತ್ತೇಗಾಲ ಗ್ರಾ.ಪಂ ಮಾಜಿ ಅಧ್ಯಕ್ಷ ಮಲ್ಲೇಶ್, ಮಾಜಿ ಸದಸ್ಯ ಚೆನ್ನಿಪುರ ದೊಡ್ಡಿ ರಾಜು, ಜಮೀರ್ ಪಾಷ, ಪಿಎಸಿಸಿಎಸ್ ಬ್ಯಾಂಕ್ ಅಧ್ಯಕ್ಷ ನಂಜುಂಡ, ಮುಖಂಡರಾದ ಹ್ಯಾಂಡ್‌ಪೋಸ್ಟ್ ಮಹದೇವ, ವಿಜಯ ಕುಮಾರ್, ಶಾಂತರಾಜು, ಮಂಜೇಶ್ ಗೌಡ, ರವಳಪ್ಪ, ಫಾಜೀಲ್ ಪಾಷ, ಯೂನುಸ್, ಇಮ್ರಾನ್ ಟಿಪ್ಪು, ಎನ್.ಎಚ್ ಇಂಜಿನಿಯರ್ ಲೋಕೇಶ್, ರಾಹುಲ್ ಇತರರು ಇದ್ದರು.