ಶಾಸಕ ಗಣೇಶ್ ಪ್ರಸಾದ್ ಕೂಡಲೇ ಕ್ಷಮೆಯಾಚಿಸಲಿ

ನಾನು ಶಾಸಕನಾಗಿರುವುದೆ ಅಕ್ರಮಗಳನ್ನು ನಡೆಸಲು ಎಂದು ಗಣೇಶ್ ಪ್ರಸಾದ್ ಭಾವಿಸಿದ್ದಾರೆ. ಎಲ್ಲ ಕಾರ್ಯಕ್ರಮಗಳಲ್ಲೂ ತನ್ನ ತಂದೆಯ ಹೆಸರು ಹೇಳುವ ಶಾಸಕರು ತಂದೆ ಮತ್ತು ತಾಯಿ ಸಚಿವರಾಗಿದ್ದ ಅವಧಿಯಲ್ಲಿ ಕ್ಷೇತ್ರದ ಅಭಿವೃದ್ಧಿಗೆ ಕೈಗೊಂಡ ಕಾರ್ಯಗಳ ಬಗ್ಗೆ ಜನತೆಗೆ ಅರಿವಿದೆ. ರೈತ ಹುತಾತ್ಮರ ದಿನಾಚರಣೆ ಅಂಗವಾಗಿ ಮಂಗಳವಾರ ರೈತ ಸಂಘಟನೆ ಆಯೋಜಿಸಿದ್ದ ಕಾರ್ಯಕ್ರಮಕ್ಕೆ ಗಣೇಶ್ ಪ್ರಸಾದ್ ಆಗಮಿಸಿದ್ದಾಗ ತಾಲೂಕಿನ ನಾನಾ ಸಮಸ್ಯೆಗಳ ಜತೆಗೆ ಹಂಗಳ ಗ್ರಾಮದ ಮುಖಂಡರು ದಿ.ಮಹದೇವ ಪ್ರಸಾದ್ ಮತ್ತು ಡಾ.ಗೀತಾ ಮಹದೇವ ಪ್ರಸಾದ್ ಅವಧಿಯಲ್ಲಿ ಗ್ರಾಮದ ಬಸ್ ನಿಲ್ದಾಣ, ಕುಡಿಯುವ ನೀರು ಸಮಸ್ಯೆ ಬಗ್ಗೆ ಪ್ರಶ್ನೆ ಎತ್ತಿದ್ದಾರೆ. ಇದರಿಂದ ಸಿಟ್ಟಿಗೆದ್ದ ಶಾಸಕರು ಸಮರ್ಪಕ ಉತ್ತರ ನೀಡದೆ ಹೊರ ಹೋದರು. ಹಿಂದೆ ಕಲ್ಲುಕಟ್ಟೆ ಜಲಾಶಯದ ಬಳಿ ಪ್ರತಿಭಟನೆ ನಡೆಸುತ್ತಿದ್ದ ರೈತರು ಮತ್ತು ರಂಗನಾಥಪುರ ಗ್ರಾಮದಲ್ಲಿ ಅಭಿವೃದ್ಧಿ ಕಾರ್ಯಗಳ ಬಗ್ಗೆ ಪ್ರಶ್ನಿಸಿದ ಗ್ರಾಮಸ್ಥರ ಮೇಲೆ ತೋಳೇರಿಸಿ ತಮ್ಮ ದರ್ಪ ಮೆರೆದಿದ್ದರು ಎಂದು ಆಕ್ರೋಶ ವ್ಯಕ್ತಪಡಿಸಿದರು.

ತಾಲೂಕಿನ ಕೆರೆಗಳಿಗೆ ನೀರು ತುಂಬಿಸುವಂತೆ ಪ್ರತಿಭಟನೆ ನಡೆಸಿದರೂ ಲೆಕ್ಕಿಸದ ಶಾಸಕರು ನಂತರ ತಮ್ಮ ಬೆಂಬಲಿಗರನ್ನು ಅಲ್ಲಿಗೆ ಕಳಿಸಿ ಗಲಾಟೆ ಮಾಡಿಸುವ ಮೂಲಕ ರೈತರನ್ನು ಅವಮಾನಿಸಿದ್ದರು. ಇವರ ತಂದೆ ದಿ.ಮಹದೇವ ಪ್ರಸಾದ್ ಜಿಲ್ಲಾ ಉಸ್ತುವಾರಿ ಸಚಿವರಾಗಿದ್ದಾಗ ಸಂಕಷ್ಟಕ್ಕೆ ಸಿಲುಕಿರುವ ರೈತರ ಸಾಲಮನ್ನಾ ಮಾಡುವಂತೆ ಕೋರಿದಾಗ ರೈತರನ್ನು ಮೈಗಳ್ಳರು ಎನ್ನುವ ಮೂಲಕ ಅವಮಾನಿಸಿದ್ದರು. ಈಗ ಅವರ ಪುತ್ರನೂ ಇದನ್ನೇ ಮುಂದುವರಿಸಿದ್ದಾರೆ ಎಂದು ಟೀಕಿಸಿದರು.

ಕಾಂಗ್ರೆಸ್ ಅಧಿಕಾರಕ್ಕೆ ಬಂದ ನಂತರ ಗುತ್ತಿಗೆದಾರರಿಗೆ ಕಾಮಗಾರಿ ಟೆಂಡರ್ ಕೊಡುವ ಬದಲು ಕಮಿಷನ್ ಪಡೆದು ಮಂಡ್ಯ, ಮೈಸೂರು, ಬೆಂಗಳೂರು ಮೂಲದವರಿಗೆ ಗುತ್ತಿಗೆ ನೀಡುತ್ತಿದ್ದಾರೆ. ಮೂರು ವರ್ಷಗಳಿಂದ ತಾಂತ್ರಿಕ ದೋಷ ನೆಪದಲ್ಲಿ ಕೆರೆಗಳಿಗೆ ನೀರು ತುಂಬಿಸದೆ ನೆಪ ಹೇಳಲು ನಾಚಿಕೆ ಆಗಬೇಕು. ಕ್ಷೇತ್ರದ ಜನತೆ ನಿಮ್ಮನ್ನು ಆಯ್ಕೆ ಮಾಡಿರುವುದು ಕೇರಳಕ್ಕೆ ಪ್ರತಿದಿನ 200-300 ಲಾರಿಗಳಲ್ಲಿ ಕಲ್ಲು ಸಾಗಣೆ, ಅಕ್ರಮ ಲಾಟರಿ ಮಾರಾಟ, ಅನ್ನಭಾಗ್ಯ ಅಕ್ಕಿ ಸಾಗಣೆ, ಗಾಂಜಾ ಮಾರಾಟಕ್ಕೆ ಕುಮ್ಮಕ್ಕು ಕೊಡಲು ಅಲ್ಲ ಎಂದು ದೂರಿದರು.

ಪ್ರತಿಭಟನಾ ಸ್ಥಳದಲ್ಲಿ ಶಾಸಕರ ಬೆಂಬಲಿಗರು ನಡೆಸಿದ ಗೂಂಡಾವರ್ತನೆ ತಡೆಗಟ್ಟಲು ಪೊಲೀಸರು ವಿಫಲರಾಗಿದ್ದಾರೆ. ಕೂಡಲೇ ಪೊಲೀಸರು ರೈತರ ಮೇಲೆ ಗೂಂಡಾಗಿರಿ ನಡೆಸಿದ ಶಾಸಕರ ಬೆಂಬಲಿಗರ ವಿರುದ್ಧ ಸುಮೊಟೊ ಪ್ರಕರಣ ದಾಖಲಿಸಬೇಕು ಎಂದು ಒತ್ತಾಯಿಸಿದರು.

ಬಿಜೆಪಿ ಮಂಡಲಾಧ್ಯಕ್ಷ ಸಿ.ಮಹದೇವ ಪ್ರಸಾದ್, ಮಾಜಿ ಅಧ್ಯಕ್ಷ ಎಲ್.ಸುರೇಶ್, ಚಾಮುಲ್ ಮಾಜಿ ನಿರ್ದೇಶಕ ಸ್ವಾಮಿ, ಪುರಸಭೆ ಮಾಜಿ ಸದಸ್ಯ ನಾಗೇಶ್ ಇದ್ದರು.