ಬುಧವಾರ ರಾಮನಗರ, ಕನಕಪುರ, ಚನ್ನಪಟ್ಟಣ, ಮಾಗಡಿ, ಬಿಡದಿ, ಕೆಂಗೇರಿ ಇತರ ಕಡೆಗಳಿಂದ ಅಪಾರ ಭಕ್ತರು ಕಾವೇರಿ ನದಿ ದಾಟಿ ಅರಣ್ಯ ಪ್ರದೇಶದ ಮೂಲಕ ಸಾಗರೋಪಾದಿಯಲ್ಲಿ ಕಾಲ್ನಡಿಗೆಯಲ್ಲಿ ತೆರಳುತ್ತಿರುವುದು ಒಂದೆಡೆಯಾದರೆ, ಇತ್ತ ಕೊಳ್ಳೇಗಾಲ-ಹನೂರು ಮಾರ್ಗವಾಗಿ ಚಾಮರಾಜನಗರ, ಮೈಸೂರು, ಮಂಡ್ಯ, ನರಸೀಪುರ, ಮಳವಳ್ಳಿ ಮೊದಲಾದ ಊರುಗಳಿಂದ ಸಾವಿರಾರು ಪಾದಯಾತ್ರಿಗಳು ತೆರಳಿದರು. ಇದರಲ್ಲಿ ಬಹುತೇಕ ಭಕ್ತರು ಭಯದಿಂದಲೇ ಮ.ಬೆಟ್ಟಕ್ಕೆ ಸಾಗಿದರೆ, ಕೆಲ ಭಕ್ತರಲ್ಲಿ ಮಾದಪ್ಪನ ಕಾಪಾಡುತ್ತಾನೆ ಎಂಬ ನಂಬಿಕೆ ಮನದಲ್ಲಿಟ್ಟುಕೊಂಡು ತೆರಳಿದರು. ಭಕ್ತರ ಸುರಕ್ಷತೆಯ ದೃಷ್ಟಿಯಿಂದ ಕಾವೇರಿ ನದಿ ದಡದಲ್ಲಿ ಎಸ್ಡಿಆರ್ಎಫ್, ಡಿಆರ್ಎಫ್, ಪೊಲೀಸ್ ಹಾಗೂ ಅರಣ್ಯ ಇಲಾಖೆಯ ಸಿಬ್ಬಂದಿ ಮೊಕ್ಕಾಂ ಹೂಡಿದ್ದಾರೆ. ಜತೆಗೆ ತಾಳುಬೆಟ್ಟದ ಮಾರ್ಗದಲ್ಲಿ ಹೆಚ್ಚಿನ ಸಿಬ್ಬಂದಿ ನಿಯೋಜಿಸಲಾಗಿದ್ದು, ಗಸ್ತು ಮಾಡಲಾಗುತ್ತಿದೆ.
