ಕಿರು ಸೇತುವೆ ಮೂಲಕ ಉಳೆಪಾಡಿಯ ಬಹುತೇಕ ಮಂದಿ ಹಲವು ಕಾರಣಗಳಿಗೆ ಮುಂಡ್ಕೂರಿಗೆ ಬರಲೇ ಬೇಕು. ವಿಪರ್ಯಾಸ ಎಂದರೆ ಉಳೆಪಾಡಿ ದ.ಕ. ಜಿಲ್ಲೆಯ ಐಕಳ ಗ್ರಾಪಂ ವ್ಯಾಪ್ತಿಗೆ ಬಂದರೆ, ಇಲ್ಲಿನ ಜನರಿಗೆ ವಿಳಾಸ ಹೇಳಲು ಅಂಚೆ ಮುಂಡ್ಕೂರು..! ಈ ಕಾರಣಕ್ಕಾಗಿ ಇಲ್ಲಿನ ಜನ ಅಂಚೆ ಕಚೇರಿ ಸಹಿತ ಮತ್ತಿತರ ಸಾಮಗ್ರಿ ಖರೀದಿಗೆ ಈ ಕಿರುಸೇತುವೆ ಮೂಲಕವೇ ಮುಂಡ್ಕೂರು ಸೇರಬೇಕು. ಮುಂಡ್ಕೂರಿನಿಂದ ಮೂಲ್ಕಿ, ಬಳ್ಕುಂಜೆ, ಕರ್ನಿರೆ, ಪಲಿಮಾರು, ಮಂಗಳೂರು ಕಡೆಗೆ ತೆರಳುವವರಿಗೆ ಇದು ಹತ್ತಿರದ ಮಾರ್ಗವಾದರೂ ಸೂಕ್ತ ರಸ್ತೆ ಸಹಿತ ಸೇತುವೆ ಇಲ್ಲದಿರುವುದರಿಂದ ವಾಹನ ಸಂಚಾರ ನಡೆಸಲಾಗದ ಸ್ಥಿತಿ. ಉಳೆಪಾಡಿ, ಬಳ್ಕುಂಜೆ ಭಾಗದ ಜನರಿಗೂ ಕಾರ್ಕಳ ಸೇರಲು ಇದು ಹತ್ತಿರದ ಒಳದಾರಿಯಾಗಿದೆ. ಹೀಗಾಗಿ ಹಲವು ದಶಕಗಳಿಂದ ರಸ್ತೆ ಸಹಿತ ಸೇತುವೆ ನಿರ್ಮಾಣದ ಬೇಡಿಕೆಯಿದ್ದರೂ ಇನ್ನೂ ಪೂರೈಕೆಯಾಗಿಲ್ಲ.
