ಯಾರಿಗೆ ತಾನೇ ಸ್ವಚ್ಛ ಹಲ್ಲುಗಳನ್ನು ಹೊಂದಲು ಇಷ್ಟವಾಗುವುದಿಲ್ಲ? ಇಂದಿನ ದಿನಗಳಲ್ಲಂತೂ ಟೂಥ್ ಬ್ರಷ್ ಮುಟ್ಟದೇ ಯಾರ ದಿನವೂ ಆರಂಭವಾಗುವುದಿಲ್ಲ. ಮನೆಯ ಪ್ರತಿಯೊಬ್ಬರಿಗೆ ಅವರ ದಂತದ ಹಾಗೂ ವಸಡಿನ ಸೂಕ್ಷ್ಮತೆಗನುಸಾರ ಸಿದ್ಧಪಡಿಸಿದ 'ಬ್ರಷ್' ಗಳು ಇದೀಗ ಮಾರುಕಟ್ಟೆಯಲ್ಲಿ ಲಭ್ಯ. ಮನುಷ್ಯ ತನ್ನ ಜೀವನಕ್ಕೆ ಅತೀ ಮುಖ್ಯವೆಂದು ಭಾವಿಸುವ ಅನೇಕ ವಸ್ತುಗಳ ಕುರಿತಾಗಿ ಅಮೆರಿಕದ ಪ್ರಸಿದ್ಧ ವಿಶ್ವವಿದ್ಯಾಲಯ MIT, 2003ರಲ್ಲಿ ನಡೆಸಿದ ಸಮೀಕ್ಷೆಯಲ್ಲಿ, ಜನ ಕಾರು, ಲ್ಯಾಪ್ ಟಾಪ್ ಅಥವಾ ಮೊಬೈಲ್ಗಳಿಗೂ ಮುನ್ನದ ಪ್ರಾಶಸ್ತ್ಯವನ್ನು ಟೂಥ್ ಬ್ರಷ್ಗೆ ನೀಡಿದ್ದರು. ಆದರೆ, ನಮ್ಮ ದೇಹದ ಅತ್ಯಂತ ಮುಖ್ಯ ಭಾಗದ ಸ್ವಚ್ಛತೆಗೆ ಅಗತ್ಯವಾದ ಈ ಟೂಥ್ ಬ್ರಷ್ಗಳು ತ್ಯಾಜ್ಯವಾದಾಗ ಅವು ಭೂಮಿಯಲ್ಲಿ ಸೇರುವುದೇ ಹೆಚ್ಚು. ಪಾಲಿಪ್ರೊಪಿಲೀನ್ (ಪ್ಲಾಸ್ಟಿಕ್) ಹಿಡಿ ಹಾಗೂ ನೈಲಾನ್ ಹಲ್ಲುಕೂದಲಿನಿಂದ (bristles) ಹೊಂದಿರುವ ಅಂದರೆ ಪಾಲಿಮರ್ ಆಧಾರಿತವಾದ ಈ ಉತ್ಪನ್ನ, ನೈಲಾನ್ ಮತ್ತು ಪ್ಲಾಸ್ಟಿಕ್ಗಳ ಮಿಶ್ರಣದಿಂದ ತಯಾರಾಗಿರುತ್ತವಾದ್ದರಿಂದ ಪುನರ್ ಬಳಕೆಯಾಗುವುದು ಬಹಳ ಕಡಿಮೆ. ಭೂಮಿಯಲ್ಲಿದು ಕರಗುವುದೂ ಇಲ್ಲ. ಈ 'ಬ್ರಷ್' ಗಳನ್ನು ಪ್ರತಿ ಮೂರು ಅಥವಾ ನಾಲ್ಕು ತಿಂಗಳಿಗೊಮ್ಮೆ ಬದಲಾಯಿಸಲು ದಂತವೈದ್ಯರೇ ಸಲಹೆ ಮಾಡುತ್ತಾರೆ. ಅಲ್ಲಿಗೆ ನಾವು ವೈಯುಕ್ತಿಕವಾಗಿ ವರ್ಷಕ್ಕೆ ಸರಿಸುಮಾರು ಮೂರು ಬ್ರಷ್ಗಳನ್ನು ಬಿಸಾಡಬಹುದು. ಒಟ್ಟು ಜನಸಂಖ್ಯೆಯನ್ನು ಮನದಲ್ಲಿಟ್ಟುಕೊಂಡು ಇಲ್ಲಿಂದ ಮುಂದಿನ ಲೆಕ್ಕವನ್ನು ನೀವೇ ಮಾಡಿಕೊಳ್ಳಿ. ತ್ಯಾಜ್ಯವೊಂದು ಭೂಮಿಯಿಂದ ನದಿ, ನದಿಯಿಂದ ಸಾಗರ ತಲುಪಲು ಸಮಯ ಹಿಡಿಯುವುದಿಲ್ಲ.
