ಬೆಂಗಳೂರು ದಕ್ಷಿಣ

ಮೈತ್ರಿಯಲ್ಲಿ ಮೂಡದ ಒಮ್ಮತ

ಜೆಡಿಎಸ್
ಜೆಡಿಎಸ್
ಗಂಗಾಧರ ಬಿ ವಿ
Published on: 

ಪ್ರಮುಖ ಮುಖ್ಯಾಂಶಗಳು

  • ಜೆಡಿಎಸ್, ಬಿಜೆಪಿ ಹೊಂದಾಣಿಕೆ ಕೊರತೆ
  • ಸರ್ಕಾರದ ವಿರುದ್ಧ ಹೋರಾಟ ರೂಪಿಸುವಲ್ಲಿ ವಿಫಲ
  • ನಾಯಕರ ತ್ವರಿತ ನಿರ್ಧಾರಕ್ಕೆ ಪಟ್ಟು
ರಾಮನಗರ
ತಾಯಿಯಂತೆ ಮಕ್ಕಳು, ನೂಲಿನಂತೆ ಸೀರೆ ಎನ್ನುವ ಗಾದೆ ಮಾತಿದೆ. ಈ ಮಾತು ಪ್ರಸ್ತುತ ಜೆಡಿಎಸ್ ಮತ್ತು ಬಿಜೆಪಿ ನಡುವಿನ ಮೈತ್ರಿಗೆ ಸೂಕ್ತವಾಗಿ ಅನ್ವಯವಾಗುತ್ತದೆ.
ಕೇಂದ್ರ ಸರ್ಕಾರ ರಚನೆಗಾಗಿ ಬಿಜೆಪಿಯೊಂದಿಗೆ ಮೈತ್ರಿ ಮಾಡಿಕೊಂಡಿದ್ದು, ಬಿಟ್ಟರೆ ರಾಜ್ಯದಲ್ಲಿ ಇವರ ಮೈತ್ರಿ ಇನ್ನೂ ಚಾಲ್ತಿಗೆ ಬಂದಿಲ್ಲ. ಇದೇ ದಾರಿಯನ್ನು ಜಿಲ್ಲಾಮಟ್ಟದ ನಾಯಕರೂ ಅನುಸರಿಸುತ್ತಿದ್ದು, ಮುಖ್ಯಮಂತ್ರಿ ಡಿ.ಕೆ. ಶಿವಕುಮಾರ್ ಅವರ ತವರು ಜಿಲ್ಲೆ ಬೆಂಗಳೂರು ದಕ್ಷಿಣದಲ್ಲಿ ಸರ್ಕಾರದ ವಿರುದ್ಧ ಹೋರಾಟಕ್ಕೆ ಪ್ರಬಲ ಅಸ್ತ್ರಗಳು ದೊರೆತರೂ, ಇವುಗಳನ್ನು ಬಳಸಿಕೊಳ್ಳುವಲ್ಲಿ ಎರಡೂ ಪಕ್ಷಗಳು ವಿಲವಾಗುವ ಮೂಲಕ ಮೈತ್ರಿಯ ಬಗ್ಗೆಯೇ ಕಾರ್ಯಕರ್ತರಲ್ಲಿ ಪ್ರಶ್ನೆ ಮೂಡುವಂತೆ ಮಾಡಿದೆ.
ಹೊಂದಾಣಿಕೆ ಆಗಲೇ ಇಲ್ಲ: ಜಿಲ್ಲೆಯಲ್ಲಿ ಜೆಡಿಎಸ್ ಬೇರು ಗಟ್ಟಿಯಾಗಿವೆ. ಬಿಜೆಪಿ ಇನ್ನೂ ಪ್ರಬಲವಾಗಿ ಬೆಳೆಯಬೇಕಿದೆ. ಇದರ ಹೊರತಾಗಿಯೂ ಎರಡೂ ಪಕ್ಷಗಳು ಸೇರಿಕೊಂಡು ಸರ್ಕಾರದ ವಿರುದ್ಧ ಸಮರ ಸಾರುವ ಶಕ್ತಿಯನ್ನಂತೂ ಹೊಂದಿವೆ. ಆದರೆ, ಎರಡೂ ಪಕ್ಷಗಳು ಹೊಂದಾಣಿಕೆ ಮಾಡಿಕೊಂಡಿವೆ ಎನ್ನುವ ಯಾವ ಲಕ್ಷಣಗಳೂ ಇಲ್ಲಿಯವರೆಗೂ ಗೋಚರಿಸಲೇ ಇಲ್ಲ. ರಾಜ್ಯಮಟ್ಟದಲ್ಲಿ ಮಾತ್ರವಲ್ಲ ಜಿಲ್ಲೆಯಲ್ಲಿಯೂ ಸ್ಥಳೀಯ ಮುಖಂಡರು ಒಗ್ಗೂಡಿ ಯಾವುದೇ ವಿಚಾರದಲ್ಲಿ ಹೋರಾಟ ಮಾಡುವ ಬದ್ಧತೆಯನ್ನು ತೋರಲೇ ಇಲ್ಲ.

ಅಲ್ಲೇ ಇಲ್ಲ ಇಲ್ಲೇನು ಮಾಡೋಣ?

ಹೊಂದಾಣಿಕೆ ಬಗ್ಗೆ ಎರಡೂ ಪಕ್ಷಗಳ ಸ್ಥಳೀಯ ಮುಖಂಡರು ಮತ್ತು ಕಾರ್ಯಕರ್ತರಲ್ಲಿ ಪ್ರಶ್ನೆಗಳು ಎದ್ದಿವೆ. ಮೇಲೇ ಹೊಂದಾಣಿಕೆ ಇಲ್ಲ, ಇನ್ನೇನು ಮಾಡೋದು ಹೇಳಿ ಎನ್ನುವ ಮರು ಪ್ರಶ್ನೆ ಎದುರಾಗುತ್ತದೆ. ಹೊಂದಾಣಿಕೆ ಇದ್ದರೆ ರಾಜ್ಯ ಸರ್ಕಾರದ ವಿರುದ್ಧ ಹೋರಾಟ ಮಾಡಲು ಸಾಕಷ್ಟು ವಿಷಯಗಳು ಇದ್ದವು. ಆದರೆ, ಎಂದೂ ಜತೆಯಾಗಿ ಹೋರಾಟ ಮಾಡಲೇ ಇಲ್ಲ. ಇನ್ನು ಹೊಂದಾಣಿಕೆ ಇದ್ದಿದ್ದರೆ ವಿಧಾನ ಪರಿಷತ್ ಒಂದು ಸ್ಥಾನವನ್ನು ಅಷ್ಟು ಸುಲಭವಾಗಿ ಕಾಂಗ್ರೆಸ್‌ಗೆ ಬಿಟ್ಟುಕೊಡಲು ಸಾಧ್ಯವಾಗುತ್ತಿತ್ತೇ? ಅವರು ಎಂದೂ ಒಂದಾಗಲೇ ಇಲ್ಲ, ಇಲ್ಲಿನವರಿಗೂ ಹೊಂದಾಣಿಕೆ ಮಾಡಿಕೊಂಡು ಹೋರಾಟ ಮಾಡಿ ಎಂದು ಹೇಳಲೇ ಇಲ್ಲ ಎಂದು ಬೇಸರ ವ್ಯಕ್ತಪಡಿಸುತ್ತಾರೆ.

ಅವಕಾಶ ಕೈ ಚೆಲ್ಲಿದರು

ಬೆಂಗಳೂರು ದಕ್ಷಿಣ ಜಿಲ್ಲೆಯಲ್ಲಿಯೂ ಮುಖ್ಯಮಂತ್ರಿ ಡಿ.ಕೆ.ಶಿವಕುಮಾರ್ ಸೇರಿ ರಾಜ್ಯಸರ್ಕಾರದ ವಿರುದ್ಧ ಹೋರಾಟ ಮಾಡಲು ಸಾಕಷ್ಟು ಉತ್ತಮ ಅವಕಾಶಗಳಿದ್ದರೂ ಒಗ್ಗೂಡಿ ಹೋರಾಟ ಮಾಡದೇ ಜೆಡಿಎಸ್ - ಬಿಜೆಪಿ ಪಕ್ಷಗಳ ನಾಯಕರು ನಗೆ ಪಾಟಲಿಗೀಡಾಗಿದ್ದಾರೆ. ಬಿಡದಿ ಸಮಗ್ರ ಟೌನ್‌ಶಿಪ್ ವಿರೋಧಿಸಿ ನಡೆದ ಹೋರಾಟದಲ್ಲಿ ವಿರೋ‘ ಪಕ್ಷದ ನಾಯಕ ಆರ್.ಅಶೋಕ್, ಪಕ್ಷದ ರಾಜ್ಯಾಧ್ಯಕ್ಷ ವಿಜಯೇಂದ್ರ ಸೇರಿ ಹಲವರು ಭೈರಮಂಗಲದಲ್ಲಿ ಹೋರಾಟ ನಡೆಸಿದಾಗ, ಜೆಡಿಎಸ್ ನಾಯಕರು ಇತ್ತ ಸುಳಿಯಲೇ ಇಲ್ಲ. ಇನ್ನು ನಿಖಿಲ್ ಕುಮಾರಸ್ವಾಮಿ ಮತ್ತು ಎಚ್.ಡಿ.ಕುಮಾರಸ್ವಾಮಿ ಅವರು ಹೋರಾಟ ನಡೆಸಿದಾಗ ಬಿಜೆಪಿ ನಾಯಕರೂ ಅತ್ತ ಸುಳಿಯಲಿಲ್ಲ.
ಮತ್ತೊಂದೆಡೆ ಮತಪಟ್ಟಿ ಸಮಗ್ರ ಪರಿಷ್ಕರಣೆ ಕಾರ್ಯದಲ್ಲಿ ಲೋಪಗಳು ಕಂಡು ಬಂದಾಗ, ಇದರ ವಿರುದ್ಧ ಬೃಹತ್ ಹೋರಾಟ ಮಾಡುವ ಅವಕಾಶ ಇದ್ದರೂ ಇದರ ಬಳಕೆಯಲ್ಲಿಯೂ ಎರಡೂ ಪಕ್ಷಗಳು ಎಡವಿದವು. ಬಿಜೆಪಿ ಮತ್ತು ಜೆಡಿಎಸ್ ಒಂದೇ ದಿನ ಪ್ರತ್ಯೇಕ ಹೋರಾಟ ಮಾಡುವ ಮೂಲಕ ವಿರೋಧಿ ಪಾಳಯಕ್ಕೆ ನಿರಾಳವಾಗುವಂತೆ ಮಾಡಿದರು.

ಇನ್ನಾದರೂ ಒಂದಾಗುವರೇ?

ಡಿ.ಕೆ.ಶಿವಕುಮಾರ್ ಮತ್ತು ಕಾಂಗ್ರೆಸ್ ಅಲೆಯಲ್ಲಿ ಬಿಜೆಪಿ ಮತ್ತು ಜೆಡಿಎಸ್ ಜಿಲ್ಲೆಯಲ್ಲಿ ಮಂಕಾಗುತ್ತಿವೆ. ಇದು ಸ್ಥಳೀಯವಾಗಿ ಎರಡೂ ಪಕ್ಷಗಳ ಕಾರ್ಯಕರ್ತರಲ್ಲಿ ಆತಂಕವನ್ನು ಮೂಡಿಸಿದೆ. ಪಕ್ಷವನ್ನು ಸಂಘಟನೆ ಮಾಡಬೇಕಾದರೆ ಸೂಕ್ತ ನಿರ್‘ಾರವನ್ನು ಪಕ್ಷದ ರಾಜ್ಯಮಟ್ಟದ ನಾಯಕರು ಕೈಗೊಳ್ಳಬೇಕು ಎನ್ನುವುದು ಇವರ ಆಶಯ. ಮುಂದೆ ಗ್ರಾಪಂ, ತಾಪಂ ಮತ್ತು ಜಿಪಂ ಚುನಾವಣೆಗಳು ಎದುರಾದಾಗ ಮೈತ್ರಿ ಬಗ್ಗೆ ಮಾತನಾಡಿದರೆ ಏನೂ ಪ್ರಯೋಜನವಾಗದು, ಈಗಿನಿಂದಲೇ ಹೊಂದಾಣಿಕೆ ಮಾಡಿಕೊಂಡರೆ ಚುನಾವಣೆಗಳನ್ನು ಎದುರಿಸಲು ಸಾಧ್ಯವಾಗುತ್ತದೆ. ಇಲ್ಲವಾದರೆ ಕಾಂಗ್ರೆಸ್ ಎದುರು ಪಕ್ಷ ನೆಲ ಕಚ್ಚುವುದು ಗ್ಯಾರಂಟಿ ಎನ್ನುತ್ತಾರೆ ಎರಡೂ ಪಕ್ಷಗಳ ಕಾರ್ಯಕರ್ತರು.
ವಿಜಯವಾಣಿ ನಂ.1 ದಿನ ಪತ್ರಿಕೆ | Vijayavani | Kannada News
www.vijayavani.net