ಬಸ್​ ಶೆಲ್ಟರ್​ ಕಾಮಗಾರಿಗೆ ಚಾಲನೆ ನೀಡದೆ ತೆರಳಿದ ಶಾಸಕ

*

ರಾಮನಗರ

ಬಸ್​ ಶೆಲ್ಟರ್​ ನಿರ್ಮಾಣಕ್ಕೆ ಭೂಮಿಪೂಜೆ ನೆರವೇರಿಸಲು ಆಗಮಿಸಿದ ಶಾಸಕ ಎಚ್​.ಎ.ಇಕ್ಬಾಲ್​ ಹುಸೇನ್​ ರಸ್ತೆ ಪಕ್ಕದ ಕಟ್ಟಡಗಳ ಮಾಲೀಕರ ವಿರೋಧದಿಂದ ಕಾಮಗಾರಿಗೆ ಚಾಲನೆ ನೀಡದೆ ವಾಪಸ್​ ತೆರಳಿದರು.

ರಾಮನಗರದ ಐಜೂರು ಬಸ್​ ನಿಲ್ದಾಣದ ಮೈಸೂರು ಕಡೆ ತೆರಳುವ ಪ್ರಯಾಣಿಕರ ನೆರಳಿನ ಅನುಕೂಲಕ್ಕಾಗಿ ರಾಮನಗರ ನಗರಾಭಿವೃದ್ಧಿ ಪ್ರಾಧಿಕಾರದಿಂದ ಸುಮಾರು 20 ಲಕ್ಷ ರೂ. ವೆಚ್ಚದಲ್ಲಿ ಬಸ್​ ಶೆಲ್ಟರ್​ ನಿರ್ಮಾಣಕ್ಕೆ ಶನಿವಾರ ಭೂಮಿಪೂಜೆ ನೆರವೇರಿಸಲು ಇಕ್ಬಾಲ್​ ಹುಸೇನ್​ ಸ್ಥಳಕ್ಕೆ ಆಗಮಿಸಿದ್ದರು.

ಪೆಟ್ರೋಲ್​ ಬಂಕ್​ ಪಕ್ಕದಲ್ಲಿ ಬಸ್​ ಶೆಲ್ಟರ್​ ನಿರ್ಮಾಣಕ್ಕೆ ಚಾಲನೆ ನೀಡಲು ಎಲ್ಲ ಸಿದ್ಧತೆ ಮಾಡಿಕೊಳ್ಳಲಾಗಿತ್ತು.

ಆದರೆ ಉದ್ದೇಶಿತ ಶೆಲ್ಟರ್​ ಹಿಂಭಾಗದ ರಸ್ತೆ ಪಕ್ಕದ ಕಟ್ಟಡ ಮಾಲೀಕರು ಶೆಲ್ಟರ್​ ನಿರ್ಮಾಣದಿಂದ ವ್ಯಾಪಾರಕ್ಕೆ ತೊಂದರೆಯಾಗುತ್ತದೆ. ಹಾಗಾಗಿ ಉದ್ದೇಶಿತ ಸ್ಥಳದಿಂದ ನೂರು ಮೀಟರ್​ ಹಿಂದಕ್ಕೆ ಶೆಲ್ಟರ್​ ನಿರ್ಮಿಸಿ, ಅಲ್ಲಿ ಜಾಗ ಸಹ ಖಾಲಿ ಇದೆ. ಪ್ರಯಾಣಿಕರಿಗೂ ಅನುಕೂಲ, ವ್ಯಾಪಾರಿಗಳಿಗೂ ಅನುಕೂಲ ಎಂದು ಒತ್ತಾಯಿಸಿದರು. ಕಟ್ಟಡ ಮಾಲೀಕರ ವಿರೋಧಕ್ಕೆ ಜೆಡಿಎಸ್​ ಮುಖಂಡರು ಸಹ ಧ್ವನಿಗೂಡಿಸಿದ ಕಾರಣ ಶಾಸಕರು ಭೂಮಿಪೂಜೆ ನೆರವೇರಿಸದೆ ವಾಪಸ್​ ಹೋದರು.

ಶಾಸಕ ಇಕ್ಬಾಲ್​ ಹುಸೇನ್​ ಮಾತನಾಡಿ, ಪ್ರಾಧಿಕಾರದ 20 ಲಕ್ಷ ರೂ. ಅನುದಾನದಲ್ಲಿ ಸುಸಜ್ಜಿತವಾದ ಬಸ್​ ಶೆಲ್ಟರ್​ ನಿರ್ಮಾಣಕ್ಕೆ ಪಕ್ಕದ ಮಾಲೀಕರು ವಿರೋಧ ಮಾಡುತ್ತಿದ್ದಾರೆ, ಪ್ರಯಾಣಿಕರಿಗೆ ಮೂಲಸೌಲಭ್ಯ ಕಲ್ಪಿಸುವುದು ನಮ್ಮ ಜವಾಬ್ದಾರಿ. ಈ ನಿಟ್ಟಿನಲ್ಲಿ ಕ್ರಮವಹಿಸಲಾಗುವುದು. ಸಾರ್ವಜನಿಕರ ಹಿತ ಗಮನದಲ್ಲಿಟ್ಟುಕೊಳ್ಳಬೇಕು ಮಾಲೀಕರು ಸಹಕಾರ ನೀಡಬೇಕು ಎಂದರು. ಸದ್ಯ ಪ್ರಸ್ತಾಪಿಸಿರುವ ಜಾಗದ ಪಕ್ಕದಲ್ಲಿ ನಿರ್ಮಿಸುವಂತೆ ಕೆಲವರು ಸಲಹೆ ನೀಡಿದ್ದಾರೆ, ಐಜೂರು ಸರ್ಕಲ್​ ಸಿಗ್ನಲ್​, ಕನಕಪುರ ಸರ್ಕಲ್​ ಹಾಗೂ ಹಳೇ ಬಸ್​ ನಿಲ್ದಾಣ ಸರ್ಕಲ್​ ಅಭಿವೃದ್ಧಿಗಾಗಿ ಯೋಜನೆ ರೂಪಿಸಲಾಗುತ್ತಿದೆ, ಅದರ ಜತೆಗೆ ಈ ಶೆಲ್ಟರ್​ ನಿರ್ಮಾಣಕ್ಕೂ ಹೊಸದಾಗಿ ರೂಪುರೇಷೆ ಸಿದ್ಧಪಡಿಸಲಾಗುವುದು ಎಂದರು.

ನಗರಾಭಿವೃದ್ಧಿ ಪ್ರಾಧಿಕಾರದ ನೀಲಿನೆಯಂತೆ ಕಟ್ಟಡಗಳ ಮುಂಭಾಗದಲ್ಲಿಯೇ ಶೆಲ್ಟರ್​ ನಿರ್ಮಾಣಕ್ಕೆ ಯೋಜಿಸಲಾಗಿದೆ, ಅದಕ್ಕೆ ವ್ಯಾಪಾರಿಗಳು, ಕಟ್ಟಡ ಮಾಲೀಕರು ಸಹಕಾರ ನೀಡಬೇಕು ಎಂದು ಇಕ್ಬಾಲ್​ ಹುಸೇನ್​ ಮನವೊಲಿಸಲು ಯತ್ನಿಸಿದರಾದರೂ ಕಟ್ಟಡ ಮಾಲೀಕರು ಅದಕ್ಕೆ ಒಪ್ಪಲಿಲ್ಲ, ನಾವು ಇಲ್ಲಿ ಶೆಲ್ಟರ್​ ನಿರ್ಮಾಣಕ್ಕೆ ಅವಕಾಶ ಕೊಡುವುದಿಲ್ಲ ಎಂದು ಪಟ್ಟು ಹಿಡಿದಿದ್ದರು. ಈ ವೇಳೆ ಕಟ್ಟಡ ಮಾಲೀಕರಾದ ಜಯರಾಮೇಗೌಡ ಹಾಗೂ ಹರೀಶ್​ ಮಾತನಾಡಿ, ಬಸ್​ ಶೆಲ್ಟರ್​ ನಿರ್ಮಾಣಕ್ಕೆ ನಮ್ಮ ವಿರೋಧವಿಲ್ಲ. ಶೆಲ್ಟರ್​ ನಿರ್ಮಾಣದಿಂದ ವ್ಯಾಪಾರಕ್ಕೆ ಅಡಚಣೆ ಮಾಡುವುದು ಬೇಡ. ಪಕ್ಕದಲ್ಲಿ ಶೆಲ್ಟರ್​ ನಿರ್ಮಿಸಲಾಗಿದೆ, ಅದರ ಪಕ್ಕದಲ್ಲಿಯೂ ವಿಶಾಲ ಜಾಗವಿದೆ ಅಲ್ಲಿ ನಿರ್ಮಿಸಿದರೆ ಪ್ರಯಾಣಿಕರಿಗೆ ಅನುಕೂಲವಾಗುತ್ತದೆ ಎಂದರು.