ನಗರದ ಕೆಲವೆಡೆ ನೀರು ಪೂರೈಕೆ ಅಸಮರ್ಪಕ |bwssb

ಮುಂಗಾರು ಮಳೆ ನಿರೀಕ್ಷಿತ ಪ್ರಮಾಣದಲ್ಲಿ ಸುರಿಯದಿರುವುದು ಹಾಗೂ ಅಂತರ್ಜಲ ಮಟ್ಟ ಕುಸಿಯುತ್ತಿರುವ ಹಿನ್ನೆಲೆಯಲ್ಲಿ ಬೆಂಗಳೂರಿನಲ್ಲಿ ಕಾವೇರಿ ನೀರಿನ ಬಳಕೆಗೆ ಬೆಂಗಳೂರು ನೀರು ಸರಬರಾಜು ಮತ್ತು ಒಳಚರಂಡಿ ಮಂಡಳಿ (ಬಿಡಬ್ಲ್ಯುಎಸ್​ಎಸ್​ಬಿ) ಕಟ್ಟುನಿಟ್ಟಿನ ರ್ನಿಬಂಧಗಳನ್ನು ಜಾರಿಗೊಳಿಸಿದೆ. ಈಗಾಗಲೇ ಹಲವೆಡೆ ಅಸಮರ್ಪಕ ನೀರು ಪೂರೈಕೆ, ಕಡಿಮೆ ಒತ್ತಡ, ಖಾಸಗಿ ಟ್ಯಾಂಕರ್​ಗಳ ಅವಲಂಬನೆ ಸೇರಿ ಹಲವು ಸಮಸ್ಯೆಗಳನ್ನು ಎದುರಿಸುತ್ತಿರುವ ನಾಗರಿಕರಿಗೆ ಈ ಕ್ರಮ ಮತ್ತಷ್ಟು ಆತಂಕ ಮೂಡಿಸಿದೆ.

ಬಿಡಬ್ಲ್ಯುಎಸ್​ಎಸ್​ಬಿ ಕಾಯ್ದೆಯ ಸೆಕ್ಷನ್​ 33 ಮತ್ತು 34ರಡಿ ಹೊರಡಿಸಿರುವ ಆದೇಶದಂತೆ ಕುಡಿಯುವ ನೀರನ್ನು ಕಟ್ಟಡ ನಿಮಾರ್ಣ, ರಸ್ತೆ ಕಾಮಗಾರಿ, ವಾಹನ ತೊಳೆಯುವುದು, ಮನರಂಜನಾ ಚಟುವಟಿಕೆಗಳು ಸೇರಿ ಅನಿವಾರ್ಯವಲ್ಲದ ಉದ್ದೇಶಗಳಿಗೆ ಬಳಸುವುದನ್ನು ಸಂಪೂರ್ಣ ನಿಷೆೇಧಿಸಲಾಗಿದೆ. ಅಪಾರ್ಟ್​ಮೆಂಟ್​ಗಳು, ವಾಣಿಜ್ಯ ಕಟ್ಟಡಗಳು, ಶಾಪಿಂಗ್​ ಮಾಲ್​ಗಳು, ಸರ್ಕಾರಿ ಕಚೇರಿಗಳು, ಹೋಟೆಲ್​ಗಳು, ಉಪಾಹಾರ ಗೃಹ ಹಾಗೂ ಸಾರ್ವಜನಿಕ ಕಟ್ಟಡಗಳಲ್ಲಿ ಜು.31ರೊಳಗೆ ನೀರು ಉಳಿತಾಯ ಮಾಡುವ ಫ್ಲೋ ರಿಸ್ಟ್ರಿಕ್ಟರ್​ ಅಥವಾ ಏರೇಟರ್​ ಅಳವಡಿಸಬೇಕು ಎಂದು ಸೂಚಿಸಲಾಗಿದೆ.

ಆದರೆ, ರಾಜಧಾನಿಯ ಕೆಲವು ಭಾಗದಲ್ಲಿ ನೀರು ಪೂರೈಕೆಯೇ ಅಸಮರ್ಪಕವಾಗಿದೆ. ಎತ್ತರದ ಪ್ರದೇಶಗಳಲ್ಲಿ ನೀರಿನ ಒತ್ತಡ ಕಡಿಮೆ ಇದ್ದು, ಈ ಹಿಂದೆ ದಿನಕ್ಕೆ ಸರಾಸರಿ ಬರುವ ನೀರು ಸಾಕಾಗುತ್ತಿತ್ತು. ಆದರೆ, ನೀರಿನ ಲಭ್ಯತೆಯ ಹಿನ್ನೆಲೆಯಲ್ಲಿ ಇತ್ತೀಚೆಗೆ ರಾಊರೈಕೆಯ ಅವಧಿ ಕಡಿತವಾಗುತ್ತಿದ್ದು, ಕೆಲವು ಭಾಗದ ಜನರಿಗೆ ಅಗತ್ಯಕ್ಕೆ ಬೇಕಾದ ನೀರು ಕೂಡ ಸಿಗುತ್ತಿಲ್ಲ ಎಂಬ ಪರಿಸ್ಥಿತಿ ನಿರ್ಮಾಣವಾಗಿದೆ.

 ಜಲಮಂಡಳಿಗೆ ಸವಾಲು:

ನಗರ ಹೊರವಲಯದ ಅನೇಕ ಬಡಾವಣೆಗಳಲ್ಲಿ ಕಾವೇರಿ ನೀರು ಇನ್ನೂ ಸಮರ್ಪಕವಾಗಿ ತಲುಪದಿರುವುದು, ಕೆಲವೆಡೆ ವಾರಕ್ಕೊಮ್ಮೆ ಮಾತ್ರ ನೀರು ಪೂರೈಕೆ ಆಗುತ್ತಿರುವುದು, ಕಡಿಮೆ ಒತ್ತಡದಿಂದ ಮೇಲಂತಸ್ತುಗಳಿಗೆ ನೀರು ತಲುಪದಿರುವುದು ಹಾಗೂ ಖಾಸಗಿ ಟ್ಯಾಂಕರ್​ಗಳಿಗೆ ಸಾವಿರಾರು ರೂಪಾಯಿ ವೆಚ್ಚ ಮಾಡುವ ಪರಿಸ್ಥಿತಿ ನಿಮಾರ್ಣವಾಗಿರುವುದು ನಿವಾಸಿಗಳ ಅಸಮಾಧಾನಕ್ಕೆ ಕಾರಣವಾಗಿದೆ. ಮಳೆ ಕೊರತೆಯ ನಡುವೆ ನೀರಿನ ಸಂರಕ್ಷಣೆಗೆ ಒತ್ತು ನೀಡುವ ಜತೆಗೆ ಪೂರೈಕೆ ವ್ಯವಸ್ಥೆಯನ್ನು ಬಲಪಡಿಸುವ ಸವಾಲು ಕೂಡ ಜಲಮಂಡಳಿ ಎದುರಿಸುತ್ತಿದೆ.

ಈ ವರ್ಷ ಜುಲೈ ತಿಂಗಳಲ್ಲಿ ಬೆಂಗಳೂರಿನಲ್ಲಿ ಸಾಮಾನ್ಯಕ್ಕಿಂತ ಶೇ.28 ಮಳೆ ಕೊರತೆಯಾಗಿದೆ ಎಂದು ಭಾರತೀಯ ಹವಾಮಾನ ಇಲಾಖೆ ಮಾಹಿತಿ ನೀಡಿದೆ. ಎಲ್​ನಿನೊ ಪರಿಣಾಮ, ದುರ್ಬಲ ನೈಋತ್ಯ ಮುಂಗಾರು ಹಾಗೂ ಅಸಮ ಪ್ರಮಾಣದ ಮಾರುತಗಳಿಂದ ರಾಜ್ಯದ ಹಲವು ಭಾಗಗಳಲ್ಲಿ ಮಳೆ ಕೊರತೆ ಉಂಟಾಗಿದ್ದು, ಅದರ ಪರಿಣಾಮ ಅಂತರ್ಜಲ ಮಟ್ಟವೂ ಇಳಿಕೆಯಾಗಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.