ಘನತ್ಯಾಜ್ಯ ಟೆಂಡರ್‌ಗೆ ತಾತ್ಕಾಲಿಕ ಬ್ರೇಕ್

ಟೆಂಡರ್‌ನಿಂದಾಗಿ ಕಾಂಗ್ರೆಸ್ ನಾಯಕರಿಗೆ ದೊಡ್ಡ ಮೊತ್ತದ ಕಿಕ್‌ಬ್ಯಾಕ್ ಪಡೆಯಲಾಗಿದೆ ಎಂಬ ಪ್ರತಿಪಕ್ಷಗಳ ಆರೋಪದ ಬೆನ್ನಲ್ಲೇ, ಸಿಎಂ ಈ ಕ್ರಮಕ್ಕೆ ಸೂಚಿಸಿದ್ದಾರೆ. ಕಳೆದ ವಾರ ಆರೋಪ ಕೇಳಿಬಂದ ವೇಳೆ, ಹೆಚ್ಚುವರಿ ಮುಖ್ಯ ಕಾರ್ಯದರ್ಶಿ ಅಂಜುಂ ಪರ್ವೇಜ್ ನೇತೃತ್ವದ ನಾಲ್ವರು ಹಿರಿಯ ಅಧಿಕಾರಿಗಳ ತಂಡದ ಮೂಲಕ ತನಿಖೆ ನಡೆಸಿ ವಾರದೊಳಗೆ ವರದಿ ಸಲ್ಲಿಸುವಂತೆ ಆದೇಶ ಹೊರಡಿಸಲಾಗಿತ್ತು. ಈ ವರದಿಯು ಸರ್ಕಾರಕ್ಕೆ ಇನ್ನೂ ಸಲ್ಲಿಕೆಯಾಗಿಲ್ಲ. ಹಾಗಾಗಿ ವರದಿ ಕೈಸೇರಿದ ಬಳಿಕ, ಅದರೊಳಗಿರುವ ಅಂಶಗಳು ಹಾಗೂ ಶಿಫಾರಸು ಆಧರಿಸಿ ಮುಂದಿನ ಕ್ರಮ ಕೈಗೊಳ್ಳಲು ಸಿಎಂ ಮುಂದಾಗಿದ್ದಾರೆ ಎಂದು ಮೂಲಗಳು ತಿಳಿಸಿವೆ.

ಬೆಂಗಳೂರು ಘನತ್ಯಾಜ್ಯ ನಿರ್ವಹಣಾ ನಿಗಮ (ಬಿಎಸ್​​ಡಬ್ಲ್ಯುಎಂಎಲ್​) ಜಿಬಿಎ ವ್ಯಾಪ್ತಿಯ ಐದೂ ಪಾಲಿಕೆಗಳಲ್ಲಿ ಮುಂದಿನ ಏಳು ವರ್ಷಕ್ಕೆ ಕಸ ಸಂಗ್ರಹ ಹಾಗೂ ವಿಲೇವಾರಿ ಸಂಬಂಧ 39,437 ಕೋಟಿ ರೂ. ಮೊತ್ತದ ಟೆಂಡರ್​​ ಅಂತಿಮಗೊಳಿಸಿದೆ. ಇದರ ಒಪ್ಪಿಗೆಗಾಗಿ ಸರ್ಕಾರದ ಅನುಮೋದನೆ ರವಾನಿಸಿದ್ದು, ಶೀಘ್ರವೇ ಒಪ್ಪಿಗೆ ನೀಡುವ ಸಾಧ್ಯತೆ ಇದೆ. ಆದರೆ, ಪ್ರತಿಪಕ್ಷಗಳು ಟೆಂಡರ್​​​ನಲ್ಲಿ ಕಿಕ್​ಬ್ಯಾಕ್​​ ಆರೋಪ ಮಾಡಿರುವ ಹಿನ್ನೆಲೆಯಲ್ಲಿ ಟೆಂಡರ್​​ ಅನ್ನು ಯಶಸ್ವಿ ಬಿಡ್​​ದಾರರಿಗೆ ಗುತ್ತಿಗೆ ವಹಿಸಿ ಕಾರ್ಯಾದೇಶ ನೀಡಲು ಸರ್ಕಾರ ಯಥಾಸ್ಥಿತಿ ಕಾಯ್ದುಕೊಳ್ಳುವತ್ತ ದೃಷ್ಟಿಹರಿಸಿದೆ. ಜತೆಗೆ ತನಿಖಾ ವರದಿ ಬಂದ ನಂತರ ಸ್ಪಷ್ಟ ನಿರ್ಧಾರ ಕೈಗೊಳ್ಳಲಾಗುತ್ತದೆ ಎಂದು ತಿಳಿದುಬಂದಿದೆ.