ಶಿವರಾಮ ಕಾರಂತ ಬಡಾವಣೆ ಸೈಟ್ ಬೆಲೆ ದುಬಾರಿ

2023ರಲ್ಲಿ ಕಾರಂತ ಲೇಔಟ್ ನಿರ್ಮಾಣ ವೆಚ್ಚ ಅಧಿಕಗೊಂಡ ಕಾರಣ ಸೈಟ್‌ಗಳ ದರವನ್ನು ಪ್ರತಿ ಚದರ ಅಡಿಗೆ 4,900 ರೂ.ಗೆ ಹೆಚ್ಚಿಸಲಾಗಿತ್ತು. ಇದಕ್ಕೆ ನಾಗರಿಕರಿಂದ ಆಕ್ಷೇಪ ವ್ಯಕ್ತವಾದರೂ, ಪ್ರಾಧಿಕಾರ ತನ್ನ ನಿಲುವು ಬದಲಿಸಲಿಲ್ಲ. ಪ್ರಾಧಿಕಾರಕ್ಕೆ ಅತ್ಯಧಿಕ ಹೊರೆ ತಗಲುತ್ತಿರುವ ಕಾರಣ ದರ ಏರಿಕೆ ಅನಿವಾರ್ಯ ಎಂದು ಪ್ರತಿಪಾದಿಸಿತ್ತು. ಮೂರು ವರ್ಷಗಳ ಬಳಿಕವೂ ಸೈಟ್ ಹಂಚಿಕೆ ಮಾಡದ ಬಿಡಿಎ, ಮತ್ತೆ ಈಗ ಪ್ರತಿ ಚದರ ಅಡಿಗೆ 1,100 ರೂ. ಹೆಚ್ಚಿಸಿ ನಿವೇಶನಾಕಾಂಕ್ಷಿಗಳಿಗೆ ಬರೆ ಎಳೆದಿದೆ.

ಬಡಾವಣೆ ನಿರ್ಮಾಣ, ಭೂಮಾಲೀಕರಿಗೆ ಪರಿಹಾರ ವಿತರಣೆ ಹಾಗೂ ಮೂಲಸೌಕರ್ಯ ಕಲ್ಪಿಸಲು ದೊಡ್ಡ ಮೊತ್ತ ಖರ್ಚು ಮಾಡಲಾಗುತ್ತಿದ್ದು, ಸೈಟ್ ದರವನ್ನು ಅನಿವಾರ್ಯವಾಗಿ ಹೆಚ್ಚಿಸಬೇಕಿದೆ. ಈ ಪ್ರಸ್ತಾಪಕ್ಕೆ ಪ್ರಾಧಿಕಾರದ ಆಡಳಿತ ಮಂಡಳಿ ಸಭೆ ಒಪ್ಪಿಗೆ ನೀಡಿದೆ ಎಂದು ಬಿಡಿಎ ಹಿರಿಯ ಅಧಿಕಾರಿಗಳು ತಿಳಿಸಿದ್ದಾರೆ.

ಕಾರಂತ ಬಡಾವಣೆಯು ಯಲಹಂಕ ಸುತ್ತಮುತ್ತಲಿನ 17 ಹಳ್ಳಿಗಳಲ್ಲಿ ಹರಿಡಿಕೊಂಡಿರುವ ಒಟ್ಟು 3,546 ಎಕರೆ ವಿಸ್ತೀರ್ಣದಲ್ಲಿ ನಿರ್ಮಾಣಗೊಳ್ಳುತ್ತಿದೆ. ಈ ಬಡಾವಣೆಯಲ್ಲಿ 34 ಸಾವಿರ ಸೈಟ್‌ಗಳನ್ನು ರಚಿಸಲಿದ್ದು, ಲೇಔಟ್‌ಗಾಗಿ ಜಮೀನು ಬಿಟ್ಟುಕೊಟ್ಟಿರುವ ರೈತರಿಗೆ ಪರಿಹಾರ ರೂಪದಲ್ಲಿ 18 ಸಾವಿರ ನಿವೇಶನಗಳನ್ನು ವಿತರಿಸಬೇಕಿದೆ. ಸಾರ್ವಜನಿಕರಿಗೆ 6 ಸಾವಿರ ಸೈಟ್‌ಗಳನ್ನು ಹಂಚಿಕೆ ಮಾಡಲಾಗುತ್ತದೆ. ಉಳಿದ 10 ಸಾವಿರ ಸೈಟ್‌ಗಳು ಮೂಲೆ ನಿವೇಶನ, ಮಧ್ಯಂತರ ನಿವೇಶನ, ಸಿ.ಎ. ನಿವೇಶನ ಇತ್ಯಾದಿ ಸೈಟ್‌ಗಳನ್ನು ಪ್ರಾಧಿಕಾರದ ಬಳಿಯೇ ಉಳಿಯಲಿವೆ.

ಕಾರಂತ ಲೇಔಟ್‌ನಲ್ಲಿ ಹಿಂದಿನ ವರ್ಷವೇ ಸಿವಿಲ್ ಕಾಮಗಾರಿ ಪೂರ್ಣಗೊಂಡಿದ್ದು, ಸೈಟ್‌ಗಳ ಗುರುತು ಹಾಕಲಾಗಿತ್ತು. ಈ ಮಧ್ಯೆ ರೈತರು ಮೊದಲು ತಮಗೆ ಪರಿಹಾರದ ಸೈಟ್‌ಗಳನ್ನು ವಿತರಿಸುವಂತೆ ನ್ಯಾಯಾಲಯದ ಮೊರೆ ಹೋಗಿದ್ದರು. ಜತೆಗೆ ಇತರ ರೈತರು ಕೂಡ ಭೂಸ್ವಾಧೀನ ಪ್ರಶ್ನಿಸಿ ಹೈಕೋರ್ಟ್‌ನಲ್ಲಿ ಹಲವು ದಾವೆ ಹೂಡಿದ್ದರು. ಕಳೆದ ತಿಂಗಳ ಸೈಟ್ ಹಂಚಿಕೆಗೆ ಸಂಬಂಧಿಸಿ ಇದ್ದ ತಡಯಾಜ್ಞೆಯನ್ನು ತೆರವುಗೊಳಿಸಿರುವ ನ್ಯಾಯಾಲಯವು ರೈತರಿಗೆ ಆದ್ಯತೆ ಮೇರೆಗೆ ನಿವೇಶನಗಳನ್ನು ವಿತರಿಸುವಂತೆ ಸೂಚಿಸಿದೆ. ಆನಂತರವೇ ಸಾರ್ವಜನಿಕರಿಗೆ ಹಂಚಿಕೆ ಮಾಡಲಾಗುತ್ತದೆ. ಇದೀಗ ಪ್ರಾಧಿಕಾರವು ರೈತರಿಗೆ ಸೈಟ್ ವಿತರಿಸಲು ಸಾಫ್ಟ್​​​​ವೇರ್ ಸಿದ್ಧಪಡಿಸಿದ್ದು, ಶೀಘ್ರವೇ ಚಾಲನೆ ನೀಡಲು ಮುಂದಾಗಿದೆ.

ಸಾರ್ವಜನಿಕರಿಗೆ 20/30, 30/40, 40/60 ಹಾಗೂ 50/80 ಅಡಿ ವಿಸ್ತೀರ್ಣದ ಸೈಟ್‌ಗಳನ್ನು ಹಂಚಿಕೆ ಮಾಡಲಿದ್ದು, ಇವುಗಳ ಪೈಕಿ 30/40 ಅಡಿ ನಿವೇಶನಗಳು ಹೆಚ್ಚಿನ ಸಂಖ್ಯೆಯಲ್ಲಿರಲಿವೆ. ಹೊಸ ದರದಿಂದ 30/40 ಅಡಿ ಸೈಟ್ ದರ 72 ಲಕ್ಷ ರೂ.ಗೆ ಏರಲಿದೆ. 40/60 ಸೈಟ್ ದರ 1.44 ಕೋಟಿ ರೂ.ಗೆ ಏರಿಕೆಯಾಗಲಿದ್ದು, ಕಾರಂತ ಲೇಔಟ್ ಸೈಟ್‌ಗಳು ನಾಗರಿಕರಿಗೆ ದುಬಾರಿ ಆಗಲಿವೆ ಎಂಬ ಆಕ್ಷೇಪ ವ್ಯಕ್ತವಾಗಿದೆ.