ಕಡಿತಗೊಂಡಿದ್ದ ಮಹಿಳಾ ಮೀಸಲು ಮರುನಿಗದಿ ನಿಶ್ಚಿತ

ಈ ತಿಂಗಳ 8ರಂದು ಸರ್ಕಾರ ಕರಡು ಮೀಸಲು ಪಟ್ಟಿ ಪ್ರಕಟಿಸಿ ಆಕ್ಷೇಪಣೆ ಸಲ್ಲಿಸಲು 15 ದಿನಗಳ ಕಲಾವಕಾಶ ನೀಡಿತ್ತು. ಇದರನ್ವಯ ಐದೂ ಪಾಲಿಕೆಗಳಲ್ಲಿ 2011ರ ಜನಸಂಖ್ಯೆ ಅಧರಿಸಿ ಒಟ್ಟು 369 ವಾರ್ಡ್‌ಗಳಿಗೆ ಮೀಸಲು ನಿಗದಿ ಮಾಡಲಾಗಿದೆ. ಆದರೆ, ನಿಯಮದಂತೆ ಶೇ.50ರಷ್ಟನ್ನು (185 ಸ್ಥಾನ) ಮಹಿಳೆಯರಿಗೆ ನಿಗದಿ ಮಾಡಬೇಕಿದ್ದರೂ, 176 ಸ್ಥಾನಗಳನ್ನಷ್ಟೇ ಕರಡುಪಟ್ಟಿ ಪ್ರಕಟಿಸಲಾಗಿತ್ತು. ಇದರಿಂದಾಗಿ 9 ಸ್ಥಾನಗಳು ಖೋತಾ ಆಗಿರುವುದರಿಂದ ಮಹಿಳಾ ವಲಯದಿಂದ ಭಾರಿ ಟೀಕೆ ವ್ಯಕ್ತವಾಗಿದೆ. ಆಯಾ ಪಕ್ಷಗಳಲ್ಲಿರುವ ಮಹಿಳಾ ಟಿಕೆಟ್ ಆಕಾಂಕ್ಷಿತರು ತಪ್ಪನ್ನು ಸರಿಪಡಿಸುವಂತೆ ಸರ್ಕಾರಕ್ಕೆ ಆಗ್ರಹಿಸಿದ್ದರು.

ಈ ವಿಷಯವಾಗಿ ಹಲವು ಮಂದಿ ಈಗಾಗಲೇ ತಮ್ಮ ಆಕ್ಷೇಪಣೆಗಳನ್ನು ನಗರಾಭಿವೃದ್ಧಿ ಇಲಾಖೆಯ ಮುಖ್ಯಸ್ಥರಿಗೆ ಸಲ್ಲಿಸಿದ್ದಾರೆ. ಆಕ್ಷೇಪ ಸಲ್ಲಿಸಲು ಜ.23ರಂದೇ ಕೊನೆಗೊಂಡಿದ್ದು, ಮುಂದಿನ ವಾರ ಅಂತಿಮ ಪಟ್ಟಿ ಹೊರಬೀಳುವ ಸಾಧ್ಯತೆ ಇದೆ. ಅಷ್ಟರೊಳಗೆ ಆಕ್ಷೇಪಣೆಗಳನ್ನು ಪರಾಮರ್ಶಿಸಿ ಆಗಿರುವ ತಪ್ಪುಗಳನ್ನು ಸರಿಪಡಿಸಿ ಮಹಿಳಾ ಕೋಟಾವನ್ನು ಶೇ.50 ನಿಗದಿ ಮಾಡಲು ಅಧಿಕಾರಿ ವರ್ಗ ತಯಾರಿ ನಡೆಸಿದ್ದಾರೆ.

ಜಿಬಿಎ ವ್ಯಾಪ್ತಿಯಲ್ಲಿರುವ 28 ವಿಧಾನಸಭಾ ಕ್ಷೇತ್ರಗಳಲ್ಲಿ 12 ಕ್ಷೇತ್ರಗಳು ಪಾಲಿಕೆ ಗಡಿ ಭಾಗದಲ್ಲಿದ್ದು, ಜನಸಂಖ್ಯೆ ಹಾಗೂ ವಿಸ್ತೀರ್ಣದಲ್ಲಿ ದೊಡ್ಡದಾಗಿವೆ. ಈ ಕ್ಷೇತ್ರಗಳಲ್ಲೇ ಮೀಸಲು ನಿಗದಿ ಪ್ರತಿಶತ 100ರಷ್ಟು ನಿಗದಿಯಾಗಿಲ್ಲ. ಅದರಲ್ಲೂ ಸಚಿವರು ಪ್ರತಿನಿಧಿಸುವ ಬ್ಯಾಟರಾಯನಪುರ, ಹೆಬ್ಬಾಳ ಹಾಗೂ ಬಿಟಿಎಂ ಲೇಔಟ್ ಕ್ಷೇತ್ರಗಳಲ್ಲಿ ಮಹಿಳೆಯರಿಗೆ ಕಡಿಮೆ ಸ್ಥಾನಗಳನ್ನು ನಿಗದಿ ಮಾಡಲಾಗಿದೆ. ಹಾಗಾಗಿ ಇಂತಹ ಕ್ಷೇತ್ರಗಳಲ್ಲೇ ಮಹಿಳೆಯರಿಗೆ ಖೋತಾ ಆಗಿರುವ ಸ್ಥಾನಗಳನ್ನು ಮರುನಿಗದಿ ಮಾಡಲಾಗುತ್ತದೆ. ಉತ್ತರ, ದಕ್ಷಿಣ, ಪೂರ್ವ ಪಾಲಿಕೆಗಳಲ್ಲಿ ತಲಾ 2 ಸ್ಥಾನ ಮತ್ತು ಪಶ್ಚಿಮ, ಕೇಂದ್ರ ಪಾಲಿಕೆಗಳಲ್ಲಿ ತಲಾ ಒಂದು ಸ್ಥಾನ ಸೇರಿ ಒಟ್ಟು 8 ಸ್ಥಾನಗಳು ಮಹಿಳೆಯರಿಗೆ ಮೀಸಲಿಡಲಾಗುತ್ತದೆ. ಆದರೆ, ಕಡಿಮೆಯಾಗಿದ್ದ 9ರಲ್ಲಿ ಒಂದು ಸ್ಥಾನವನ್ನು ತಾಂತ್ರಿಕ ಕಾರಣಕ್ಕಾಗಿ ಮೀಸಲಿಡಲು ಸಾಧ್ಯವಾಗದು. ಹಾಗಾಗಿ ಸ್ತ್ರೀಯರಿಗೆ ಮೀಸಲಾಗಿರುವ 176 ಸ್ಥಾನಗಳ ಸಂಖ್ಯೆಯು 185ರ ಬದಲು 184ಕ್ಕೆ ಮರುನಿಗದಿಯಾಗಲಿದೆ ಎಂದು ಸರ್ಕಾರದ ಮೂಲಗಳು ತಿಳಿಸಿವೆ.

ಕರಡು ಮೀಸಲು ಪಟ್ಟಿಯಲ್ಲಿ ಮಹಿಳಾ ಸ್ಥಾನಗಳು ಕಡಿಮೆಯಾದಂತೆ ಹಿಂದುಳಿದ ವರ್ಗಕ್ಕೂ ಖೋತಾ ಆಗಿದೆ. ಹಿಂದುಳಿದ ‘ಎ’ ಹಾಗೂ ‘ಬಿ’ ವರ್ಗಕ್ಕೆ ಒಟ್ಟು 369 ಸ್ಥಾನಗಳಲ್ಲಿ 121 ನಿಗದಿಪಡಿಸಲಾಗಿದೆ. ನಿಯಮದಂತೆ ಈ ಸಂಖ್ಯೆ 132 ಆಗಬೇಕಿತ್ತು. ಕಡಿಮೆಯಾಗಿರುವ 11 ಸ್ಥಾನಗಳಲ್ಲಿ 3-4 ಸ್ಥಾನಗಳನ್ನು ಮಹಿಳಾ ಕೋಟಾಗೆ ಸೇರಿಸಲು ಕಸರತ್ತು ನಡೆದಿದೆ. ಉಳಿದ ಸ್ಥಾನಗಳನ್ನು ಸೇರಿಸಲು ಮೀನಮೇಷ ಎಣಿಸಲಾಗುತ್ತಿದೆ ಎಂಬ ಆಕ್ಷೇಪ ವ್ಯಕ್ತವಾಗಿದೆ. ಆಡಳಿತ ಪಕ್ಷದ ಮುಖಂಡರು ಸಚಿವರ ಮೇಲೆ ಒತ್ತಡ ಹೇರಿ ನಿರ್ದಿಷ್ಟ ವಾರ್ಡ್‌ಗಳ ಮೀಸಲನ್ನು ಬದಲಿಸದಂತೆ ಒತ್ತಡ ಹಾಕುತ್ತಿರುವುದೇ, ಹಿಂದುಳಿದ ವರ್ಗಕ್ಕೆ ಸಿಗಬೇಕಿರುವ ಸ್ಥಾನಗಳ ಮರುನಿಗದಿ ಸಾಧ್ಯವಾಗುತ್ತಿಲ್ಲ. ಈ ವಿಚಾರವಾಗಿ ಮುಂದಿನ ವಾರ ಡಿಸಿಎಂ ಬಳಿ ನಗರದ ಸಚಿವರು ಚರ್ಚೆ ನಡೆಸಿ ಸೂಕ್ತ ತೀರ್ಮಾನ ಕೈಗೊಳ್ಳಲಿದ್ದಾರೆ ಎಂದು ಹೇಳಲಾಗಿದೆ.

ಜಿಬಿಎ ವ್ಯಾಪ್ತಿಯ ಗಡಿ ಭಾಗದಲ್ಲಿರುವ ಪ್ರದೇಶಗಳಲ್ಲಿ ಬಿಜೆಪಿ/ಜೆಡಿಎಸ್ ಪ್ರಬಲವಾಗಿವೆ. ಇದನ್ನು ಅರಿತೇ ಅಂತಹ ವಾರ್ಡ್‌ಗಳಲ್ಲಿ ಆಡಳಿತ ಪಕ್ಷದ ಅಭ್ಯರ್ಥಿಗಳಿಗೆ ಅನುಕೂಲ ಆಗುವಂತೆ ಮೀಸಲು ನಿಗದಿ ಮಾಡಲು ಸಫಲತೆ ಹೊಂದಲಾಗಿದೆ. ಆದರೀಗ ಮಹಿಳೆ ಹಾಗೂ ಹಿಂದುಳಿದ ವರ್ಗಕ್ಕೆ ಹಂಚಿಕೆ ಆಗಬೇಕಿರುವ ಸ್ಥಾನಗಳನ್ನು ಯಾವ ವಾರ್ಡ್‌ಗಳಿಗೆ ಮರುನಿಗದಿ ಮಾಡಬೇಕೆಂಬ ಜಿಜ್ಞಾಸೆ ಎದ್ದಿದೆ. ಆಡಳಿತ ಕಾಂಗ್ರೆಸ್‌ನ ಕೆಲ ಮುಖಂಡರು ತಾವು ಸ್ಪರ್ಧಿಸಬೇಕಿರುವ ವಾರ್ಡ್ ಹೊರತುಪಡಿಸಿ ಬೇರೆಡೆ ಮರುನಿಗದಿ ಮಾಡಬಹುದು ಎಂಬ ಸಲಹೆ ನೀಡಿದ್ದಾರೆ. ಇದರ ಹೊರತಾಗಿಯೂ ಮೀಸಲು ನಿಗದಿ ಸಮರ್ಪಕವಾಗಿ ನಡೆಯದಿದ್ದಲ್ಲಿ ಬಿಜೆಪಿ ಹಾಗೂ ಕಾಂಗ್ರೆಸ್‌ನ ಕೆಲ ಮುಖಂಡರು ಕೋರ್ಟ್ ಮೊರೆ ಹೋಗಲು ಸಿದ್ಧತೆ ನಡೆಸಿದ್ದಾರೆ ಎಂದು ತಿಳಿದುಬಂದಿದೆ.

ಉತ್ತರ 72 36 34 36

ದಕ್ಷಿಣ 72 36 34 36

ಪೂರ್ವ 50 25 23 25

ಪಶ್ಚಿಮ 112 56 55 56

ಕೇಂದ್ರ 63 32 30 31