ಪಾಲಿಕೆ ವಾರ್ಡ್ ರಸ್ತೆಗಳಿಗೆ ಶೀಘ್ರ ಡಾಂಬರು ಭಾಗ್ಯ

ಸರಿಸುಮಾರು 6 ವರ್ಷದಿಂದ ಸ್ಥಳೀಯ ಆಡಳಿತ ಇಲ್ಲದ ಕಾರಣ ನಗರದೊಳಗಿನ ವಾರ್ಡ್ ಮಟ್ಟದ ರಸ್ತೆಗಳು ಗುಂಡಿ ಬಿದ್ದು ಹಾಳಾಗಿವೆ. ಇವುಗಳಿಗೆ ತೇಪೆ ಹಾಕಿದ್ದರೂ, ಪ್ರತೀ ಮಳೆಗಾಲದಲ್ಲಿ ಬಾಯ್ತೆರೆದು ಅಪಾಯಕ್ಕೆ ಆಹ್ವಾನಿಸುತ್ತಿವೆ. ಅನುದಾನ ಕೊರತೆ, ನಿರ್ವಹಣೆಗೆ ಗಮನ ನೀಡದ ಕಾರಣ ವಾರ್ಡ್‌ಗಳಲ್ಲಿ ರಸ್ತೆ ಸಂಚಾರ ಹೈರಾಣವಾಗಿಸಿದೆ. ಇದಕ್ಕೀಗ ಒಮ್ಮಲೆ ಪರಿಹಾರ ಕೈಗೊಳ್ಳಲು ಸರ್ಕಾರ 2 ಸಾವಿರ ಕೋಟಿ ರೂ. ವೆಚ್ಚದಲ್ಲಿ ರಸ್ತೆಜಾಲವನ್ನು ವೃದ್ಧಿಸಲು ಪಣ ತೊಟ್ಟಿದೆ.

ಡಿ.ಕೆ. ಶಿವಕುಮಾರ್ ಮುಖ್ಯಮಂತ್ರಿಯಾಗಿ ಪ್ರಮಾಣವಚನ ಸ್ವೀಕರಿಸಿದ ಬಳಿಕ ನಡೆಸಿದ ಮೊದಲ ಸಂಪುಟ ಸಭೆಯಲ್ಲಿ ಬೆಂಗಳೂರಿನ ರಸ್ತೆಗಳ ಅಭಿವೃದ್ಧಿಗೆ 2 ಸಾವಿರ ಕೋಟಿ ರೂ. ಮೊತ್ತದ ನೆರವು ಘೋಷಿಸಿದ್ದರು. ಈ ಮೊತ್ತದಲ್ಲಿ ಬಿಡಿಎ ಹಾಗೂ ಐದೂ ಪಾಲಿಕೆಗಳು ತಲಾ ಒಂದು ಸಾವಿರ ಕೋಟಿ ರೂ. ಹಣವನ್ನು ವೆಚ್ಚ ಮಾಡಲಿದೆ. ಅಷ್ಟೂ ಹಣವನ್ನು ವಾರ್ಡ್ ಮಟ್ಟದಲ್ಲೇ ಖರ್ಚು ಮಾಡಲಾಗುತ್ತಿದೆ. ವಾರ್ಡ್ ರಸ್ತೆಗಳಲ್ಲದೆ ಹಾಳಾದ ರಸ್ತೆಗಳಿಗೆ ಮೇಲ್ಪದರದ ಡಾಂಬರು ಹಾಕುವುದು, ಚರಂಡಿ/ಕಲ್ವರ್ಟ್ ನಿರ್ಮಾಣವೂ ಸೇರಿದೆ. ಇದರಿಂದ ಸ್ಥಳೀಯ ರಸ್ತೆಜಾಲವನ್ನು ಇನ್ನಷ್ಟು ಸದೃಢಗೊಳಿಸಲು ಜಿಬಿಎ ಮುಂದಾಗಿದೆ.

ಎರಡು ಸಾವಿರ ಕೋಟಿ ರೂ. ವೆಚ್ಚದಲ್ಲಿ ಕೈಗೆತ್ತಿಕೊಳ್ಳುವ ವಾರ್ಡ್ ಮಟ್ಟದ ರಸ್ತೆಜಾಲ ಅಭಿವೃದ್ಧಿಪಡಿಸಲು ವಿವರವಾದ ಕ್ರಿಯಾಯೋಜನೆ ಸಿದ್ಧಪಡಿಸುವಂತೆ ನಗರಾಭಿವೃದ್ಧಿ ಇಲಾಖೆಯು ಜಿಬಿಎಗೆ ಸೂಚಿಸಿದೆ. ನಗರದ 28 ವಿಧಾನಸಭಾ ಕ್ಷೇತ್ರವಾರು ಕಾಮಗಾರಿಗಳ ಪಟ್ಟಿಯನ್ನು ಕ್ರೊಡೀಕರಿಸಿ ಪ್ರಸ್ತಾವನೆಯನ್ನು ಈ ವಾರಾಂತ್ಯದೊಳಗೆ ಸರ್ಕಾರಕ್ಕೆ ಸಲ್ಲಿಸಲು ಗಡುವು ನೀಡಲಾಗಿದೆ. ಜತೆಗೆ ಹಾಲಿ ಚಾಲ್ತಿಯಲ್ಲಿರುವ ‘ನಮ್ಮ ರಸ್ತೆ ಕೈಪಿಡಿ’ ಅನ್ವಯ ಕಾಮಗಾರಿಗಳ ಅಂದಾಜು ಪಟ್ಟಿ ರೂಪಿಸಲು ಮಾರ್ಗಸೂಚಿಯನ್ನು ಕಡ್ಡಾಯವಾಗಿ ಪಾಲಿಸಬೇಕು. ಹಿಂದೆ ಕೈಗೊಂಡಿರುವ ಕಾಮಗಾರಿಗಳನ್ನು ಮತ್ತೆ ಸೇರಿಸದಂತೆ ನಿಗಾ ವಹಿಸಲು ಖಡಕ್ ಸೂಚನೆ ನೀಡಲಾಗಿದೆ.

ಕ್ರಿಯಾ ಯೋಜನೆಯಲ್ಲಿ ಒಳಗೊಂಡಿರುವ ಕಾಮಗಾರಿಗಳು ಈ ಹಿಂದೆ ಯಾವುದೇ ಯೋಜನೆಯಲ್ಲಿ ಒಳಗೊಂಡಿರುವುದಿಲ್ಲ ಎಂಬುದನ್ನು ಆಯಾ ಪಾಲಿಕೆಗಳ ಮುಖ್ಯ ಇಂಜಿನಿಯರ್‌ಗಳು ದೃಢೀಕರಣ ಪಡೆದು ಖಾತರಿಪಡಿಸಿಕೊಳ್ಳಬೇಕು. ಆ ಬಳಿಕವೇ ಅಂದಾಜು ಪಟ್ಟಿಗೆ ರಸ್ತೆಗಳನ್ನು ಸೇರಿಸುವಂತೆ ಸರ್ಕಾರ ಜಿಬಿಎಗೆ ನಿರ್ದೇಶನ ನೀಡಿದೆ.

ನಿಕಟಪೂರ್ವ ಬಿಬಿಎಂಪಿ ವ್ಯಾಪ್ತಿಗೆ ಸೇರ್ಪಡೆಯಾಗಿದ್ದ ಹೊಸ ಪ್ರದೇಶಗಳಲ್ಲಿ ಸಮರ್ಪಕವಾದ ರಸ್ತೆಜಾಲವೇ ಇಲ್ಲ. ಕೆಲವೊಂದು ರಸ್ತೆಗಳಷ್ಟೇ ಸಂಚಾರಯೋಗ್ಯವಾಗಿವೆ. ಹಿಂದಿನ ಐದು ವಲಯಗಳಲ್ಲಿ ವಾರ್ಡ್ ರಸ್ತೆಗಳ ಅಭಿವೃದ್ಧಿಗೆ ವಾರ್ಷಿಕ 200-300 ಕೋಟಿ ರೂ. ಹಂಚಿಕೆಯಾದರೂ, ಅರ್ಧದಷ್ಟೂ ಬಿಡುಗಡೆ ಆಗುತ್ತಿರಲಿಲ್ಲ. ಜಿಬಿಎ ಅಸ್ತಿತ್ವಕ್ಕೆ ಬಂದ ನಂತರ ಇಂತಹ ರಸ್ತೆಗಳ ಅಭಿವೃದ್ಧಿಗೆ 500 ಕೋಟಿ ರೂ. ಮೀಸಲಿಟ್ಟರೂ, ಕಾಮಗಾರಿಗೆ ಬಳಸಿಕೊಂಡಿದ್ದು ಅತ್ಯಲ್ಪ. ಇದರಿಂದ ಹೊಸ ಏರಿಯಾದ ವಸತಿ ಪ್ರದೇಶಗಳ ರಸ್ತೆ ಮೇಲ್ದರ್ಜೆಗೇರದೆ ಸಮಸ್ಯೆ ಕಗ್ಗಂಟಾಗಿದೆ.

ವಾರ್ಡ್ ಮಟ್ಟದ ರಸ್ತೆಗಳನ್ನು ಏಕಕಾಲದಲ್ಲಿ ಅಭಿವೃದ್ಧಿಪಡಿಸಲು ಅಲ್ಪಾವಧಿ ಟೆಂಡರ್ ಆಹ್ವಾನಿಸಿ ಕಾಮಗಾರಿ ಕೈಗೊಳ್ಳಲು ಸರ್ಕಾರ ಸೂಚಿಸಿದೆ. ಇದರಿಂದಾಗಿ ಜಿಬಿಎ ನಿಗಾದಲ್ಲಿ ಆಯಾ ಪಾಲಿಕೆಗಳು ಟೆಂಡರ್ ಆಹ್ವಾನಿಸಿ ಕಾಲಮಿತಿಯೊಳಗೆ ಕಾಮಗಾರಿ ಪೂರ್ಣಗೊಳಿಸಲು ಸಹಕಾರಿಯಾಗಲಿದೆ ಎಂದು ಪಾಲಿಕೆ ಅಧಿಕಾರಿಯೊಬ್ಬರು ಪ್ರತಿಕ್ರಿಯಿಸಿದ್ದಾರೆ.

ಒಟ್ಟು ರಸ್ತೆಜಾಲ - 13,873 ಕಿ.ಮೀ.

ವಾರ್ಡ್ ರಸ್ತೆಗಳು - 11,533 ಕಿ.ಮೀ.

ಆರ್ಟೀರಿಯಲ್/ಸಬ್ ಆರ್ಟೀರಿಯಲ್ ರಸ್ತೆ - 1,682 ಕಿ.ಮೀ.

ಹೆದ್ದಾರಿ, ಎಂಡಿಆರ್, ಇತರ ರಸ್ತೆ - 658 ಕಿ.ಮೀ.

ಬೆಂಗಳೂರಿನ ರಸ್ತೆ ಅಭಿವೃದ್ಧಿ ಸಂಬಂಧ ಮುಖ್ಯಮಂತ್ರಿ ಡಿ.ಕೆ. ಶಿವಕುಮಾರ್ ಜೂ.3ರಂದು 2 ಸಾವಿರ ಕೋಟಿ ರೂ. ನೆರವು ಪ್ರಕಟಿಸಿದ್ದರು. ಇದಾಗಿ ಐದೇ ದಿನದಲ್ಲಿ (ಜೂ.8) ವಾರ್ಡ್ ಮಟ್ಟದ ರಸ್ತೆಗಳನ್ನು ಅಭಿವೃದ್ಧಿಪಡಿಸಲು ಕ್ರಿಯಾಯೋಜನೆ ಸಿದ್ಧಪಡಿಸಿ ಪ್ರಸ್ತಾವನೆ ಸಲ್ಲಿಸಲು ಸರ್ಕಾರ ಆದೇಶ ಹೊರಡಿಸಿದೆ.

* ‘ನಮ್ಮ ರಸ್ತೆ ಕೈಪಿಡಿ’ ಅನ್ವಯ ಕಾಮಗಾರಿ ಅಂದಾಜು ಪಟ್ಟಿ ಸಿದ್ಧಸುವಾಗ ಮುಖ್ಯ ಅಭಿಯಂತರರಿಂದ ದೃಢೀಕರಣ ಅಗತ್ಯ

* ಅಂದಾಜು ಪಟ್ಟಿಯನ್ನು ಪಿಡಬ್ಲ್ಯುಡಿ ಇಲಾಖೆಯ ಎಸ್‌ಆರ್ ದರದಂತೆ ಸಿದ್ಧಪಡಿಸುವುದು

* ಅಂದಾಜು ಪಟ್ಟಿಯ ಶೇ.5 ಟೆಂಡರ್ ಪ್ರೀಮಿಯಂಗೆ ಕಡ್ಡಾಯ ಅವಕಾಶ ಕಲ್ಪಿಸುವುದು

* ಉದ್ದೇಶಿತ ಕಾಮಗಾರಿಗಳು ನಾಗರಿಕರ ಸುಗಮ ಸಂಚಾರಕ್ಕಾಗಿ ಅವಶ್ಯದ ಬಗ್ಗೆ ದೃಢೀಕರಿಸುವುದು

* ಕಾಮಗಾರಿಗಳು ಪುನರಾವರ್ತನೆ ಆಗದಂತೆ ಖಾತರಿಪಡಿಸುವುದು

* ಕಾಮಗಾರಿಗಳಿಗೆ ನಿಗದಿಪಡಿಸುವ ಅಂದಾಜು ಮೊತ್ತ ಎಲ್ಲ ಪಾಲಿಕೆಗಳಲ್ಲಿ ಏಕರೂಪತೆ, ಏಕವಿನ್ಯಾಸಕ್ಕೆ ಆದ್ಯತೆ.