ಕನೆಕ್ಟಿವಿಟಿ ಸಮಸ್ಯೆಯಿಂದ ಮೆಟ್ರೋ ಪ್ರಯಾಣಿಕರ ಕೊರತೆ

ನಿರೀಕ್ಷಿತ ಪ್ರಮಾಣದಲ್ಲಿ ಪ್ರಯಾಣಿಕರನ್ನು ಸೆಳೆಯಲು ನಮ್ಮ ಮೆಟ್ರೋ ವಿಫಲವಾಗಿರುವುದಕ್ಕೆ ಬಸ್​ ಸೇವೆಯೊಂದಿಗೆ ಸಮರ್ಪಕ ಸಮನ್ವಯದ ಕೊರತೆ, ಕೊನೆಯ ಹಂತದ ಸಂಪರ್ಕ ವ್ಯವಸ್ಥೆಯಲ್ಲಿನ ಲೋಪ ಹಾಗೂ ನಿಲ್ದಾಣಗಳಲ್ಲಿ ಅಗತ್ಯ ಪಾರ್ಕಿಂಗ್​ ಸೌಲಭ್ಯಗಳಿಲ್ಲದಿರುವುದು ಪ್ರಮುಖ ಕಾರಣ ಎಂದು ಮಹಾಲೆಕ್ಕಪರಿಶೋಧಕರ (ಸಿಎಜಿ) ವರದಿ ತಿಳಿಸಿದೆ.

ಸೋಮವಾರ ಸಂಸತ್ತಿನಲ್ಲಿ ಮಂಡನೆಯಾದ ಸಿಎಜಿಯ 2026ರ ಕಾರ್ಯಕ್ಷಮತಾ ಲೆಕ್ಕಪರಿಶೋಧನಾ ವರದಿ ಸಂಖ್ಯೆ&7ರಲ್ಲಿ ಮೆಟ್ರೋ ಯೋಜನೆಯ ಹಲವು ಲೋಪಗಳನ್ನು ಉಲ್ಲೇಖಿಸಲಾಗಿದೆ. 2007ರ ಡಿಪಿಆರ್​ನಲ್ಲಿ ಅಂದಾಜಿಸಿದ್ದ ಪ್ರಯಾಣಿಕರ ಸಂಖ್ಯೆ ಹಾಗೂ ಪೀಕ್​ ಅವರ್​ ಪೀಕ್​ ಡೈರೆಕ್ಷನ್​ ಟ್ರಾಫಿಕ್​ ಪ್ರಮಾಣವನ್ನು 2023ರಲ್ಲಿಯೂ ಸಾಧಿಸಲು ಸಾಧ್ಯವಾಗಿಲ್ಲ. ಹಂತ&1ರಲ್ಲಿ 2021ರ ಗರಿಷ್ಠ ಸಮಯದ ಗರಿಷ್ಠ ದಿಕ್ಕಿನ ಸಂಚಾರ(ಪಿಎಚ್​ಪಿಡಿಟಿ) 15 ಸಾವಿರಕ್ಕೂ ಅಧಿಕ ಇರಲಿದೆ ಎಂದು ಅಂದಾಜಿಸಿದ್ದರೂ, ವಾಸ್ತವಿಕ ಪ್ರಮಾಣ 6,429ರಿಂದ 8,852ರಷ್ಟೇ ಇತ್ತು.

ಪ್ರಯಾಣಿಕರ ಸಂಖ್ಯೆ ನಿರೀಕ್ಷಿತ ಮಟ್ಟಕ್ಕಿಂತ ಕಡಿಮೆಯಾಗಲು ಕಾರಣವೇನು ಎಂಬುದನ್ನು ಪತ್ತೆಹಚ್ಚಿ, ಸಂಖ್ಯೆ ಹೆಚ್ಚಿಸಲು ಅಗತ್ಯ ಅಧ್ಯಯನವನ್ನೂ ನಡೆಸಲಾಗಿಲ್ಲ ಎಂದು ಸಿಎಜಿ ಆಕ್ಷೇಪಿಸಿದೆ.

ಸಮಗ್ರ ಸಾರಿಗೆ ಯೋಜನೆಯೇ ಇಲ್ಲ!:

2006ರಲ್ಲೇ ಕೇಂದ್ರ ಸರ್ಕಾರ ನಿರ್ದೇಶನ ನೀಡಿದ್ದರೂ, ಮೆಟ್ರೋಗೆ ಪ್ರಯಾಣಿಕರನ್ನು ಸಂಪರ್ಕಿಸುವ ಸಮಗ್ರ ಸಾರಿಗೆ ಯೋಜನೆಯನ್ನು ರಾಜ್ಯ ಸರ್ಕಾರ ರೂಪಿಸಿರಲಿಲ್ಲ. ಹಂತ&2ರ ಡಿಪಿಆರ್​ಗಳನ್ನೂ ಸಮಗ್ರ ಚಲನಶೀಲತಾ ಯೋಜನೆ, ಟ್ರಾನ್ಸಿಟ್​ ಓರಿಯೆಂಟೆಡ್​ ಡೆವಲಪ್​ಮೆಂಟ್​ ಹಾಗೂ ಭೂ ಬಳಕೆ ನೀತಿಯ ಸಮರ್ಪಕ ಚೌಕಟ್ಟಿಲ್ಲದೆ ಸಿದ್ಧಪಡಿಸಲಾಗಿತ್ತು. ಪರಿಣಾಮ ಮೆಟ್ರೋ&ಬಸ್​&ಕೊನೆಯ ಹಂತದ ಸಂಪರ್ಕ ದುರ್ಬಲವಾಗಿದೆ.

6,603 ಕೋಟಿ ರೂ. ಭೂಸ್ವಾಧಿನ ಹೆಚ್ಚಳ:

ಭೂಸ್ವಾಧಿನ ವೆಚ್ಚದಲ್ಲಿ 2023ರ ಮಾರ್ಚ್​ ವೇಳೆಗೆ 6,603 ಕೋಟಿ ಹೆಚ್ಚಳವಾಗಿದ್ದು, ತಪ್ಪು ಭೂದರ ಅನ್ವಯದಿಂದ 294.72 ಕೋಟಿ ್ಟಖಿ. ಹೆಚ್ಚುವರಿ ಪರಿಹಾರ ಪಾವತಿಸಲಾಗಿದೆ. ಅಧಿಸೂಚನೆ ವಿಳಂಬದಿಂದ 186.86 ಕೋಟಿ ರೂ. ಬಡ್ಡಿ ನೀಡಲಾಗಿದೆ. 9 ಸಿವಿಲ್​ ಗುತ್ತಿಗೆಗಳಲ್ಲಿ ತೆರಿಗೆ ಲೆಕ್ಕಾಚಾರದಿಂದಲೇ 1,222.40 ಕೋಟಿ ರೂ. ಯೋಜನಾ ವೆಚ್ಚ ಹೆಚ್ಚಾಗಿದೆ. ಕೆಲ ಭೂಹಸ್ತಾಂತರ ವಿಳಂಬ 1,305 ದಿನಗಳವರೆಗೂ ಮುಂದುವರಿದಿತ್ತು ಎಂದು ವರದಿ ತಿಳಿಸಿದೆ.

ಬಿಎಂಟಿಸಿಯ ದೈನಂದಿನ ಪ್ರಯಾಣಿಕರ ಸಂಖ್ಯೆ 2014&15ರ 51.30 ಲಕ್ಷದಿಂದ 2022&23ರಲ್ಲಿ 27.49 ಲಕ್ಷಕ್ಕೆ ಕುಸಿದಿದೆ. ಹೀಗಾಗಿ ಮೆಟ್ರೋ ವಿಸ್ತರಣೆಯಷ್ಟೇ ಅಲ್ಲ, **ಮೆಟ್ರೋಗೆ ಪ್ರಯಾಣಿಕರನ್ನು ತಲುಪಿಸುವ ಬಸ್​, ಪಾರ್ಕಿಂಗ್​ ಹಾಗೂ ಫೀಡರ್​ ವ್ಯವಸ್ಥೆ ಬಲಪಡಿಸುವುದೇ ಮುಂದಿನ ಪ್ರಮುಖ ಸವಾಲು ಎಂದು ವರದಿ ಸೂಚಿಸಿದೆ.

2013&14ರಿಂದ 2021&22ರವರೆಗೆ ಬೆಂಗಳೂರು ಮೆಟ್ರೋ ರೈಲು ನಿಗಮ ನಿಯಮಿತ (ಬಿಎಂಆರ್​ಸಿಎಲ್​) ನಿರಂತರ ನಷ್ಟದಲ್ಲಿದ್ದು, ಸಾಲ ಮರುಪಾವತಿಗೆ ಸರ್ಕಾರದ ನೆರವನ್ನೇ ಅವಲಂಬಿಸಿತ್ತು. ನಿಲ್ದಾಣಗಳ 2.46 ಲಕ್ಷ ಚದರ ಅಡಿ ವಾಣಿಜ್ಯ ಸ್ಥಳದಲ್ಲಿ 2.23 ಲಕ್ಷ ಚದರ ಅಡಿ ಖಾಲಿಯೇ ಉಳಿದಿತ್ತು. ಇದರಿಂದ 2019&22ರ ಅವಧಿಯಲ್ಲಿ 38.53 ಕೋಟಿ ರೂ. ಬಾಡಿಗೆ ಆದಾಯ ನಷ್ಟವಾಗಿದೆ ಎಂದು ವರದಿ ತಿಳಿಸಿದೆ.