ಮೆಟ್ರೋ ಕಾಮಗಾರಿ ಮುಗಿವ ಮುನ್ನವೇ ವೈಟ್​ ಟಾಪಿಂಗ್​!

ಸಿಲ್ಕ್​ಬೋರ್ಡ್​ನಿಂದ ಕೆ.ಆರ್​. ಪುರ ಸಂಪರ್ಕಿಸುವ ಮೆಟ್ರೋ ನೀಲಿ ಮಾರ್ಗದ ಕಾಮಗಾರಿ ಮುಕ್ತಾಯದ ಗಡುವು ಮತ್ತಷ್ಟು ವಿಸ್ತರಿಸುವ ಸಾಧ್ಯತೆ ಇದ್ದು, ಗ್ರೇಟರ್​ ಬೆಂಗಳೂರು ಪ್ರಾಧಿಕಾರವು (ಜಿಬಿಎ) ಹೊರವರ್ತುಲ ರಸ್ತೆಯಲ್ಲಿ 450 ಕೋಟಿ ರೂ. ವೆಚ್ಚದಲ್ಲಿ ವೈಟ್​ಟಾಪಿಂಗ್​ ಕೈಗೆತ್ತಿಕೊಳ್ಳಲು ಮುಂದಾಗಿರುವುದು ಈ ಭಾಗದಲ್ಲಿ ಸಂಚಾರ ಸಂಕಷ್ಟ ಉಲ್ಬಣಿಸುವ ಆತಂಕ ಮೂಡಿಸಿದೆ.

ಹೊರವರ್ತುಲ ರಸ್ತೆಯಲ್ಲಿ ಜಿಬಿಎ ವೈಟ್​ಟಾಪಿಂಗ್​ ಕಾಮಗಾರಿ ಯೋಜನೆಯ ಪ್ರಸ್ತಾವನೆಗೆ ಶೀಘ್ರದಲ್ಲೇ ಸಚಿವ ಸಂಪುಟದ ಅನುಮೋದನೆ ನೀಡುವ ನಿರೀಕ್ಷೆಯಿದೆ. ಕಾಮಗಾರಿ ಅವಧಿಯಲ್ಲಿ ಒಆರ್​ಆರ್​ ವ್ಯಾಪ್ತಿಯ ಕಂಪನಿಗಳಲ್ಲಿ ಶೇ.50 ವರ್ಕ್​ ಫ್ರಂ ಹೋಮ್​ ವ್ಯವಸ್ಥೆ ಕಲ್ಪಿಸುವ ಸಾಧ್ಯತೆ ಪರಿಶೀಲಿಸುವಂತೆ ಗ್ರೇಟರ್​ ಬೆಂಗಳೂರು ಅಭಿವೃದ್ಧಿ ಸಚಿವ ಕೃಷ್ಣಬೈರೇಗೌಡ ಅಧಿಕಾರಿಗಳಿಗೆ ಸೂಚಿಸಿದ್ದಾರೆ. ಒಆರ್​ಆರ್​ ಸುತ್ತಮುತ್ತ ನೂರಾರು ಐಟಿ ಕಂಪನಿಗಳಲ್ಲಿ ಅಂದಾಜು 8&10 ಲಕ್ಷ ಮಂದಿ ಉದ್ಯೋಗದಲ್ಲಿದ್ದು, ಈಗಾಗಲೇ ಸಂಚಾರ ಸಿಕ್ಕಿನಲ್ಲಿ ಸಿಲುಕಿ ಬಳಲುತ್ತಿದ್ದಾರೆ. ಈ ಕಾರಿಡಾರ್​ನಲ್ಲಿ ಮೆಟ್ರೋ ಕಾಮಗಾರಿ ಪೂರ್ಣಗೊಳ್ಳುವ ಮುನ್ನವೇ ವೈಟ್​ ಟಾಪಿಂಗ್​ ಆರಂಭವಾದರೆ, ನಿತ್ಯದ ಪ್ರಯಾಣ ಮತ್ತಷ್ಟು ಹೈರಾಣಾಗಿಸಬಹುದು ಎನ್ನುತ್ತಾರೆ ನಾಗರಿಕರು.

2027ರ ಜೂನ್​ನಲ್ಲಿ ಚಾಲನೆ?:

19 ಕಿ.ಮೀ. ಉದ್ದದ ಕೆ.ಆರ್​. ಪುರ& ಸಿಲ್ಕ್​ಬೋರ್ಡ್​ ಮಾರ್ಗದಲ್ಲಿ ವಯಾಡಕ್ಟ್​, ನಿಲ್ದಾಣ ಹಾಗೂ ಸಿಸ್ಟಂ ಕಾಮಗಾರಿಗಳು ಇನ್ನೂ ಹಲವು ಕಡೆ ಬಾಕಿ ಉಳಿದಿವೆ. ಕೆ.ಆರ್​. ಪುರದಿಂದ ಎಚ್​ಎಸ್​ಆರ್​ ಲೇಔಟ್​ವರೆಗೆ ಅಕ್ಟೋಬರ್​ನಲ್ಲಿ ಪ್ರಾಯೋಗಿಕ ಸಂಚಾರ ಆರಂಭಿಸುವ ಗುರಿಯನ್ನು ಬಿಎಂಆರ್​ಸಿಎಲ್​ ಹೊಂದಿದ್ದರೂ, ಅದು ಸಾಕಾರವಾಗುವುದು ಕಷ್ಟ ಎನ್ನಲಾಗುತ್ತಿದೆ. ಹೀಗಾಗಿ ಕಾಮಗಾರಿ 2027ರ ಜೂನ್​ವರೆಗೂ, ಮುಂದೂಡುವ ಸಾಧ್ಯತೆ ಇದೆ ಎಂಬುದು ಅಧಿಕಾರಿಗಳ ವಲಯದಲ್ಲಿ ಕೇಳಿಬರುತ್ತಿದೆ.

ಹಲವು ತೊಡಕು:

ಬೈಯಪ್ಪನಹಳ್ಳಿ ಡಿಪೋಗೆ ನೀಲಿ ಮಾರ್ಗ ಸಂಪರ್ಕ ಕಲ್ಪಿಸುವ ಕಾಮಗಾರಿ ಇನ್ನೂ ಪೂರ್ಣಗೊಂಡಿಲ್ಲ. ಮಾರತ್ತಹಳ್ಳಿ ಮತ್ತು ಸೆಂಟ್ರಲ್​ ಸಿಲ್ಕ್​ಬೋರ್ಡ್​ ಬಳಿ ವಯಾಡಕ್ಟ್​ ಕಾಮಗಾರಿ ಬಾಕಿಯಿದ್ದು, ಕೆಲ ನಿಲ್ದಾಣಗಳ ನಿಮಾರ್ಣವೂ ತಾಂತ್ರಿಕ ಹಾಗೂ ಸ್ಥಳಿಯ ಸಮಸ್ಯೆಗಳಿಂದ ನಿಧಾನಗೊಂಡಿದೆ. ಇಬ್ಬಲೂರು ನಿಲ್ದಾಣದ ಬಳಿ ಗೇಲ್​ ಅನಿಲ ಕೊಳವೆ, ನೀರಿನ ಪೈಪ್​ಲೈನ್​ ಸೇರಿ ಹಲವು ಭೂಗತ ಜಾಲಗಳಿದ್ದ ಕಾರಣ ಕಾಮಗಾರಿ ತಡವಾಗಿ ಆರಂಭವಾಗಿದೆ. ಭೂಸ್ವಾಧಿನ ಸಮಸ್ಯೆ ಹಾಗೂ ಪ್ರಸ್ತಾವಿತ ಸರ್ಜಾಪುರ& ಹೆಬ್ಬಾಳ ಮೆಟ್ರೋ ಮಾರ್ಗದೊಂದಿಗೆ ನೀಲಿ ಮಾರ್ಗ ಸಂಯೋಜನೆಗೆ ಸಂಬಂಧಿಸಿದ ವಿನ್ಯಾಸ ಅಂತಿಮಗೊಳಿಸುವಲ್ಲಿನ ವಿಳಂಬವೂ ಯೋಜನೆ ಮೇಲೆ ಪರಿಣಾಮ ಬೀರಿದೆ.

ನಮ್ಮ ಮೆಟ್ರೋ ನೀಲಿ ಮಾರ್ಗ ನಿಲ್ದಾಣವನ್ನು ಕಾರ್ಯಾಚರಣೆಯಲ್ಲಿರುವ ಹಳದಿ ಮಾರ್ಗದ ನಿಲ್ದಾಣಕ್ಕೆ ಸಂಪರ್ಕಿಸುವ ಟ್ರಾವೆಲೇಟರ್​ ಕಾಮಗಾರಿ ಇನ್ನೂ ಆರಂಭವಾಗಿಲ್ಲ. ಸದ್ಯ ಟೆಂಡರ್​ ಹಂತದಲ್ಲಿದೆ. ಮತ್ತೊಂದೆಡೆ, ಹಳದಿ ಮಾರ್ಗದ ರೈಲುಗಳ ಕೊರತೆಯಿಂದ ವಿಳಂಬವಾಗಿದ್ದರೆ, ನೀಲಿ ಮಾರ್ಗದ ರೈಲು ಸೆಟ್​ಗಳು ಈಗಾಗಲೇ ಬರಲಾರಂಭಿಸಿರುವುದು ಉತ್ತಮ ಬೆಳವಣಿಗೆ.