ನಟ ನಿರಂಜನ್​ ಮೇಲೆ ಬಿಯರ್​ ಬಾಟಲ್​ನಿಂದ ಹಲ್ಲೆ; 'ಆರ್ಟಿಸ್ಟ್ ಆದ್ರೆ ನಮ್ಗೇನು ನಮ್ ದುನಿಯಾ ಇದು' ಎಂದು ಕಿರಿಕ್.. Niranjan

ಬೆಂಗಳೂರು: ಒಡೆಯ (Odeya Kannada Cinema) ಚಿತ್ರದಲ್ಲಿ ನಟ ದರ್ಶನ್ ತಮ್ಮನ ಪಾತ್ರದಲ್ಲಿ ಅಭಿನಯಿಸಿದ್ದ ನಿರಂಜನ್ ಸದ್ಯ ಸಂಕಷ್ಟಕ್ಕೆ ಒಳಗಾಗಿದ್ದಾರೆ. ಬೆಂಗಳೂರಿನ ಬಾರ್​ವೊಂದರಲ್ಲಿ ಅವರ ಮೇಲೆ ಬಾಟಲ್​ನಿಂದ ಹಲ್ಲೆ ಮಾಡಿದ ಘಟನೆ ಬೆಳಕಿಗೆ ಬಂದಿದೆ. ಮಾರ್ಚ್​28ರಂದು ಈ ಘಟನೆ ನಡೆದಿದ್ದು, ತಡವಾಗಿ ಬೆಳಕಿಗೆ ಬಂದಿದೆ.

2017ರಲ್ಲಿ ಜಲ್ಸಾ ಸಿನಿಮಾದ ಮೂಲಕ ಕನ್ನಡ ಚಿತ್ರರಂಗಕ್ಕೆ ಕಾಲಿಟ್ಟ ನಿರಂಜನ್, ಟಗರು, ವಾಸು ಸೇರಿದಂತೆ ಹಲವು ಸಿನಿಮಾದಲ್ಲಿ ನಟಿಸಿ, ಚಿತ್ರರಂಗದಲ್ಲಿ ಚಿರಪರಿಚಿತರಾಗಿದ್ದಾರೆ.

ಉತ್ತರ ಹಳ್ಳಿಯ ಮಂತ್ರಿ ಅಲೈಯನ್ಸ್​ ಅಪಾರ್ಟ್​ಮೆಂಟ್​ ಬಳಿಯ ಕ್ಯಾಂಟನ್​ ಬಾರ್​ ಮತ್ತು ಕಿಚನ್​ ಬಾರ್​ನಲ್ಲಿ ಈ ಘಟನೆ ನಡೆದಿದೆ. ನಟ ನಿರಂಜನ್​ ದೂರಿನ ಆಧಾರದ ಮೇಲೆ ಸುಬ್ರಮಣ್ಯಪುರ ಪೊಲೀಸರು ಸದ್ಯ ಕೇಸ್​ ದಾಖಲಿಸಿಕೊಂಡಿದ್ದಾರೆ. ಘಟನೆಯಲ್ಲಿ ಭಾಗಿಯಾದವರಿಗಾಗಿ ತನಿಖೆ ಮುಂದುವರೆಸಿದ್ದಾರೆ.

ದೂರಿನ ಪ್ರಕಾರ, ನಿರಂಜನ್​ ಅವರು ಮಾ.28ರಂದು ಮಧ್ಯಾಹ್ನ 2 ಗಂಟೆಗೆ ಯಾವುದೋ ಕೆಲಸದ ವಿಚಾರಕ್ಕೆನಟ ಯಶಸ್ ಸೂರ್ಯ ಅವರ ನಿವಾಸಕ್ಕೆ ತೆರಳಿದ್ದರು. ಅಲ್ಲಿಂದ ವಾಪಸ್​ ಟೂವಿಲರ್​ನಲ್ಲಿ ಹೊರಟಿದ್ದಾಗ ದಾರಿ ಮಧ್ಯೆ ನೀರು ಕುಡಿಯಬೇಕು ಎನಿಸಿದ ಕಾರಣ ಅಲ್ಲಿ ಕಂಡುಬಂದ ಕ್ಯಾಂಟನ್​ ಬಾರ್​ ಮತ್ತು ಕಿಚನ್​ ಬಳಿ ಗಾಡಿ ನಿಲ್ಲಿಸಿದ್ದರಂತೆ. ಈ ವೇಳೆ ಅಲ್ಲಿಗೆ ಇನ್ನೋವಾ ಕಾರಿನಲ್ಲಿ ಬಂದ ಅಪರಿಚಿತ ವ್ಯಕ್ತಿ ಅವರನ್ನು ನೂಕಿದ್ದಾರೆ.