ಜಿಬಿಎ ವ್ಯಾಪ್ತಿಯ ಐದು ಪಾಲಿಕೆಗಳ ವ್ಯಾಪ್ತಿಯಲ್ಲಿ ನರ್ಸರಿಯಿಂದ ಕಾಲೇಜು ಹಂತದವರೆಗೆ 169 ಶಿಕ್ಷಣ ಸಂಸ್ಥೆಗಳು ಕಾರ್ಯಾಚರಿಸುತ್ತಿವೆ. ಇವುಗಳಲ್ಲಿ 15 ಸಾವಿರಕ್ಕೂ ಹೆಚ್ಚು ವಿದ್ಯಾರ್ಥಿಗಳು ವ್ಯಾಸಂಗ ಮಾಡುತ್ತಿದ್ದು, 850 ಅತಿಥಿ ಶಿಕ್ಷಕ/ಉಪನ್ಯಾಸಕರು ಬೋಧನೆಯಲ್ಲಿ ತೊಡಗಿಸಿಕೊಂಡಿದ್ದಾರೆ. ನಿಯಮದ ಪ್ರಕಾರ ಪ್ರತೀ ತಿಂಗಳೂ ಬೋಧಕರಿಗೆ ಗೌರವಧನ ನೀಡಲು ಜಿಬಿಎ ಒಪ್ಪಿದ್ದರೂ, ಈವರೆಗೂ ಒಮ್ಮೆಯೂ ಮಾಸಿಕ ಗೌರವಧನ ಬಿಡುಗಡೆ ಮಾಡಿಲ್ಲ. ಬದಲಾಗಿ ತ್ರೈಮಾಸಿಕವಾರು ಬಿಲ್ ಪಾವತಿಸುವ ಪದ್ಧತಿ ಅಳವಡಿಸಿಕೊಂಡಿದೆ. ಸದ್ಯ ದಕ್ಷಿಣ ಪಾಲಿಕೆ ಗೌರವಧನ ಬಿಡುಗಡೆ ಮಾಡಿದ್ದರೂ, ಉತ್ತರ, ಪಶ್ಚಿಮ ಹಾಗೂ ಕೇಂದ್ರ ಕಾರ್ಪೋರೇಷನ್ (ಪೂರ್ವದಲ್ಲಿ ಪಾಲಿಕೆ ಶಾಲೆಗಳಿಲ್ಲ) ಬೋಧಕರಿಗೆ ಬಟವಾಡೆ ಮಾಡಿಲ್ಲ. ಆಯಾ ಪಾಲಿಕೆಗಳ ಲೆಕ್ಕಪತ್ರ ವಿಭಾಗದಲ್ಲಿ ಕಡತ ವಿಲೇವಾರಿ ಆಮೆವೇಗದಲ್ಲಿ ನಡೆಯುತ್ತಿದೆ ಎಂಬ ಆಕ್ಷೇಪ ಕೇಳಿಬಂದಿದೆ. ಜಿಬಿಎ ಸೂಚನೆ ನೀಡಿದರೂ, ಕೆಳ ಹಂತದ ಅಧಿಕಾರಿಗಳು ಬಿಲ್ ಪಾವತಿಸುತ್ತಿಲ್ಲ ಎಂಬ ಆರೋಪ ಕೇಳಿಬಂದಿದೆ.
