ದುರ್ಬಲ ಮರಗಳ ಪತ್ತೆಗೆ ಹೈಟೆಕ್​ ತಂತ್ರಜ್ಞಾನ| gba

ರಾಜಧಾನಿಯಲ್ಲಿ ಮಳೆ, ಬಿರುಗಾಳಿ ಬಂದಾಗ ಮರಗಳು ಬಿದ್ದು, ಪ್ರಾಣಹಾನಿ ಮತ್ತು ಆಸ್ತಿ ನಷ್ಟ ಸಾಮಾನ್ಯವಾಗುತ್ತಿದೆ. ಈ ಬಾರಿಯು ಒಂದೆರಡು ಮಳೆಗೆ ಹಲವು ಘಟನೆಗಳು ನಗರದಲ್ಲಿ ಪದೇಪದೆ ವರದಿಯಾಗುತ್ತಿವೆ. ಇಂತಹ ಅವಘಡಗಳನ್ನು ಸಮರ್ಪಕವಾಗಿ ತಡೆಯಲು ಗ್ರೇಟರ್​ ಬೆಂಗಳೂರು ಪ್ರಾಧಿಕಾರ (ಜಿಬಿಎ) ಇದೀಗ ಮರಗಳ ಆರೋಗ್ಯ ತಪಾಸಣೆಗೆ ಅತ್ಯಾಧುನಿಕ ತಂತ್ರಜ್ಞಾನದ ಮೊರೆಹೋಗಿದೆ.

ಮಾನವನ ದೇಹದ ಸ್ಕಾ$ನಿಂಗ್​ ಮಾದರಿಯಲ್ಲೇ ಮರಗಳ ಒಳಭಾಗವನ್ನು ಪರೀಕ್ಷಿಸಿ ಅವುಗಳ ಸ್ಥಿರತೆ, ಆರೋಗ್ಯ ಹಾಗೂ ಆಯುಷ್ಯವನ್ನು ಅಂದಾಜಿಸುವ ಯೋಜನೆ ತರಲು ಚಿಂತನೆ ನಡೆಸಿದೆ.

ನಗರದ ಅನೇಕ ಮರಗಳು ದಶಕಗಳಷ್ಟು ಹಳೆಯದಾಗಿವೆ. ಹೊರನೋಟಕ್ಕೆ ಗಟ್ಟಿಯಾಗಿರುವಂತೆ ಕಂಡರೂ ಒಳಭಾಗದಲ್ಲಿ ಬೇರುಗಳು ದುರ್ಬಲವಾಗಿರುವ ಸಾಧ್ಯತೆ ಇದೆ. ಶಿಲೀಂಧ್ರ ಸೋಂಕು ತಗುಲಿರುವುದು ಅಥವಾ ಕಾಂಡದೊಳಗೆ ಬಿರುಕುಗಳು ಉಂಟಾಗಿರುವುದನ್ನು ಸಾಮಾನ್ಯ ಪರಿಶೀಲನೆಯಿಂದ ಪತ್ತೆಹಚ್ಚುವುದು ಕಷ್ಟ. ಈ ಹಿನ್ನೆಲೆಯಲ್ಲಿ ಇನ್​ಸ್ಟಿಟ್ಯೂಟ್​ ಆಫ್​ ವುಡ್​ ಸೈನ್ಸ್​ ಆ್ಯಂಡ್​ ಟೆಕ್ನಾಲಜಿ (ಐಡಬ್ಲ್ಯುಎಸ್​ಟಿ) ಜಿಬಿಎಗೆ ವಿಶೇಷ ಪ್ರಸ್ತಾವನೆ ಸಲ್ಲಿಸಿದೆ.

ಪ್ರಾಯೋಗಿಕ ಹಂತದಲ್ಲಿ ಐದು ನಗರ ಪಾಲಿಕೆ ವ್ಯಾಪ್ತಿಗಳಲ್ಲಿ 1,500 ಮರಗಳ ಪರೀಕ್ಷೆಗೆ ಐಡಬ್ಲ್ಯುಎಸ್​ಟಿ ಮುಂದಾಗಿದೆ. ಪ್ರತಿ ನಗರ ಪಾಲಿಕೆಯಲ್ಲಿ ಸುಮಾರು 300 ಮರಗಳನ್ನು ಆಯ್ಕೆ ಮಾಡಲಾಗುತ್ತದೆ. ಈ ಕಾರ್ಯಕ್ಕೆ 4.40 ಕೋಟಿ ರೂ. ವೆಚ್ಚದ ಅಂದಾಜು ಮಾಡಲಾಗಿದೆ. ಬೆಂಗಳೂರು ಕೇಂದ್ರ ಪಾಲಿಕೆಗೆ 69.41 ಲಕ್ಷ ರೂ., ಪೂರ್ವ&96 ಲಕ್ಷ ರೂ., ಉತ್ತರ&1.04 ಕೋಟಿ ರೂ., ದಕ್ಷಿಣ&90.65 ಲಕ್ಷ ರೂ. ಹಾಗೂ ಪಶ್ಚಿಮ ಪಾಲಿಕೆಗೆ 79.15 ಲಕ್ಷ ರೂ. ವೆಚ್ಚದ ಪ್ರಸ್ತಾವನೆ ಸಲ್ಲಿಸಲಾಗಿದೆ.

ರೆಸಿಸ್ಟೋಗ್ರಾಫ್​, ಸೋನಿಕ್​ ಟೊಮೊಗ್ರಫಿ, ಎಲೆಕ್ಟ್ರಿಕಲ್​ ರೆಸಿಸ್ಟೆನ್ಸ್​ ಟೊಮೊಗ್ರಫಿ ಹಾಗೂ ಟ್ರೀ-ಮೋಷನ್​ ವಿಶ್ಲೇಷಣೆ ಸೇರಿ ಹಲವು ನೂತನ ತಂತ್ರಜ್ಞಾನಗಳ ಮೂಲಕ ಮರಗಳ ಒಳರಚನೆ, ಬೇರುಗಳ ಬಲ, ಕಾಂಡದ ಸ್ಥಿರತೆ ಹಾಗೂ ಗಾಳಿಯ ಒತ್ತಡವನ್ನು ತಡೆದುಕೊಳ್ಳುವ ಸಾಮರ್ಥ್ಯವನ್ನು ಪರೀಕ್ಷಿಸಲಾಗುತ್ತದೆ. ಈ ಪರೀಕ್ಷೆಗಳ ಆಧಾರದ ಮೇಲೆ ಯಾವ ಮರಗಳು ಅಪಾಯದ ಸ್ಥಿತಿಯಲ್ಲಿವೆ, ಯಾವ ಮರಗಳಿಗೆ ವಿಶೇಷ ನಿರ್ವಹಣೆಯ ಅಗತ್ಯ ಮತ್ತು ಯಾವ ಮರಗಳನ್ನು ತೆರವುಗೊಳಿಸಬೇಕಾಗಬಹುದು ಎಂಬುದನ್ನು ನಿರ್ಧರಿಸಬಹುದು.

ಯೋಜನೆಯ ಭಾಗವಾಗಿ ವಾರ್ಡ್​ವಾರು "ಟ್ರೀ ರಿಸ್ಕ್​ ರಿಜಿಸ್ಟರ್​' ಸಿದ್ಧಪಡಿಸಲಾಗುತ್ತದೆ. ಇದರಲ್ಲಿ ಅಪಾಯದ ಮಟ್ಟದ ಆಧಾರದ ಮೇಲೆ ಮರಗಳ ಪಟ್ಟಿ ಮಾಡಲಾಗುತ್ತದೆ. ಜತೆಗೆ ಮರಗಳ ನಿರ್ವಹಣೆಗಾಗಿ ಪ್ರಮಾಣಿತ ಕಾರ್ಯಾಚರಣಾ ವಿಧಾನಗಳನ್ನು (ಎಸ್​ಒಪಿ) ರೂಪಿಸಿ ನಗರ ಸ್ಥಳಿಯ ಸಂಸ್ಥೆಗಳಿಗೆ ಮಾರ್ಗಸೂಚಿ ನೀಡಲಾಗುತ್ತದೆ.

ಐಡಬ್ಲ್ಯುಎಸ್​ಟಿ ಅಧ್ಯಯನದ ಪ್ರಕಾರ, ಮರಗಳು ಬೀಳಲು ಹಲವು ಕಾರಣಗಳಿವೆ. ನೈಸರ್ಗಿಕ ಕಾರಣಗಳ ಜತೆ ಮರದ ಬುಡದ ಸುತ್ತ ಕಾಂಕ್ರೀಟ್​ ನಿಮಾರ್ಣ ಹಾಗೂ ರಸ್ತೆ ಕಾಮಗಾರಿಗಳ ವೇಳೆ ಬೇರುಗಳಿಗೆ ಆಗುವ ಹಾನಿ ಪ್ರಮುಖ ಕಾರಣವಾಗಿದೆ. ವಿಶೇಷವಾಗಿ ರಸ್ತೆಬದಿಯ ಶೇ.90ಕ್ಕೂ ಹೆಚ್ಚು ಮರಗಳಿಗೆ ಅಗತ್ಯ ಸಂರಕ್ಷಣಾ ವಲಯವೇ ಇಲ್ಲದಿರುವುದು ಅಪಾಯವನ್ನು ಮತ್ತಷ್ಟು ಹೆಚ್ಚಿಸಿದೆ.