ಉಪನಗರ ರೈಲು ಯೋಜನೆಗೆ ಹಸಿರುನಿಶಾನೆ | k ride

ನಗರದ ಕೆಎಸ್​ಆರ್​ ರೈಲು ನಿಲ್ದಾಣದಿಂದ ಕೆಂಪೇಗೌಡ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣಕ್ಕೆ (ಕೆಐಎ)  ನಿರ್ಮಾಣವಾಗಲಿರುವ ಉಪನಗರ ರೈಲು ಸಂಪರ್ಕ ಯೋಜನೆಗೆ ಕೇಂದ್ರ ರೈಲ್ವೆ ಇಲಾಖೆ ಅನುಮೋದನೆ ನೀಡಿದ್ದು, ಯೋಜನೆಯ ಅಂತಿಮ ವಿನ್ಯಾಸಕ್ಕೆ ರೈಲ್ವೆ ಮೂಲಸೌಕರ್ಯ ಅಭಿವೃದ್ಧಿ ಕಂಪನಿ (ಕೆ-&ರೈಡ್​) ಒಪ್ಪಿಗೆ ಸೂಚಿಸಿದೆ.

ಕೆಎಸ್​ಆರ್​ ರೈಲು ನಿಲ್ದಾಣದಿಂದ ಯಶವಂತಪುರ, ಯಲಹಂಕ ಮೂಲಕ ಟ್ರಂಪೆಟ್​ ಇಂಟರ್​ಚೇಂಜ್​ ಬಳಿ ತಿರುವು ಪಡೆದು, ಬಿ.ಕೆ. ಹಳ್ಳಿ ಮತ್ತು ಏರೋಸ್ಪೇಸ್​ ಪಾರ್ಕ್​ ಮೂಲಕ ಕೆಂಪೇಗೌಡ ವಿಮಾನ ನಿಲ್ದಾಣವರೆಗೆ ರೈಲುಮಾರ್ಗ ನಿಮಾಣವಾಗಲಿದೆ. ಯೋಜನೆ 2030ರ ವೇಳೆಗೆ ಪೂರ್ಣಗೊಳ್ಳುವ ಸಾಧ್ಯತೆ ಇದೆ.

ಯೋಜನೆಯ ವೆಚ್ಚವನ್ನು 15,767 ಕೋಟಿ ರೂ.ನಿಂದ 16,876 ಕೋಟಿ ರೂ.ಗೆ ಹೆಚ್ಚಿಸಲು ರಾಜ್ಯ ಸಚಿವ ಸಂಪುಟ ಅನುಮೋದನೆ ನೀಡಿದೆ. ವಿಳಂಬದಿಂದ ಮತ್ತಷ್ಟು ವೆಚ್ಚ ಏರಿಕೆಯಾಗುವ ಸಾಧ್ಯತೆ ಇದೆ. ಎಲ್ಲ ಟೆಂಡರ್​ ಪ್ರಕ್ರಿಯೆಗಳು ಪೂರ್ಣಗೊಂಡ ಬಳಿಕ ಅಂತಿಮ ಅಂದಾಜು ನಿಗದಿಯಾಗಲಿದೆ. ಜರ್ಮನಿಯ ಕೆಎಫ್​ಡಬ್ಲ್ಯೂ ಮತ್ತು ಯುರೋಪಿಯನ್​ ಇನ್ವೆಸ್ಟ್​ಮೆಂಟ್​ ಬ್ಯಾಂಕ್​ ಸೇರಿ ವಿದೇಶಿ ಹಣಕಾಸು ಸಂಸ್ಥೆಗಳು ದೊಡ್ಡ ಪ್ರಮಾಣದಲ್ಲಿ ಹಣಕಾಸು ನೆರವು ನೀಡಲಿದ್ದರೂ, ಪ್ರಸ್ತುತ ಸರ್ಕಾರದ ಬಂಡವಾಳ ಹೂಡಿಕೆಯಿಂದಲೇ ಕಾಮಗಾರಿ ಮುಂದುವರಿಯಲಿದೆ. 

ಉಪನಗರ ರೈಲು ಸೇವೆ ಆರಂಭಕ್ಕೆ ಆರು ಕೋಚ್​ಗಳ ರೈಲುಗಳನ್ನು ಬಳಸಲಾಗುತ್ತಿದ್ದು, ಪ್ರಯಾಣಿಕರ ಬೇಡಿಕೆಯಂತೆ ಒಂಬತ್ತು ಕೋಚ್​ಗಳಿಗೆ ವಿಸ್ತರಣೆ ಮಾಡಲಾಗುತ್ತದೆ. ಕೆಎಸ್​ಆರ್​ ಉಪನಗರ ನಿಲ್ದಾಣವನ್ನು ಬಹುಮಾಧ್ಯಮ ಸಾರಿಗೆ ಕೇಂದ್ರವಾಗಿ ರೂಪಿಸುವ ಯೋಜನೆ ಇದ್ದು, ಮೆಟ್ರೋ ಮತ್ತು ಬಸ್​ ನಿಲ್ದಾಣಗಳಿಗೆ ಸ್ಕೈವಾಕ್​ ಹಾಗೂ ಎಸ್ಕಲೇಟರ್​ಗಳ ಮೂಲಕ ಸಂಪರ್ಕ ಕಲ್ಪಿಸಲಾಗುತ್ತದೆ.