ಖಾತಾ ಅಭಿಯಾನ ಗಡುವು ವಿಸ್ತರಿಸಲು ಸರ್ಕಾರಕ್ಕೆ ಜಿಬಿಎ ಮನವಿ

ಪಂಚ ಪಾಲಿಕೆಗಳ ವ್ಯಾಪ್ತಿಯಲ್ಲಿ ಅಂದಾಜು 7.5 ಲಕ್ಷ ಸ್ವತ್ತುಗಳು ಬಿ ಟು ಎ ಖಾತಾ ಪ್ರಮಾಣಪತ್ರ ಪಡೆಯುವ ಆಶಯವನ್ನು ಜಿಬಿಎ ಹೊಂದಿತ್ತು. ಆದರೆ, ಕಳೆದ 100 ದಿನಗಳ ಅವಧಿಯಲ್ಲಿ ಸಾರ್ವಜನಿಕರಿಂದ 49 ಸಾವಿರ ಅರ್ಜಿಗಳು ಮಾತ್ರ ಸಲ್ಲಿಕೆಯಾಗಿವೆ. ಈ ಪೈಕಿ ಅರ್ಧದಷ್ಟು ಅರ್ಜಿಗಳು ಮಾತ್ರ ವಿಲೇವಾರಿ ಆಗಿದ್ದು, ಇತರ ಅರ್ಜಿಗಳು ವಿವಿಧ ಕಾರಣಗಳಿಂದ ಮಾನ್ಯ ಹೊಂದಿಲ್ಲ. ಜತೆಗೆ ಪಾಲಿಕೆಗಳ ಅಧಿಕಾರಿಗಳು ಹಾಗೂ ಕೆಳ ಹಂತದ ಸಿಬ್ಬಂದಿ ಜನಗಣತಿಯ ಮನೆ ಮನೆ ಸಮೀಕ್ಷೆ ಹಾಗೂ ಎಸ್‌ಐಆರ್ ಪ್ರಕ್ರಿಯೆಯಲ್ಲಿ ಪಾಲ್ಗೊಂಡಿದ್ದ ಕಾರಣ ಅರ್ಜಿ ವಿಲೇವಾರಿ ನಿಧಾನವಾಗಿತ್ತು. ಇದಲ್ಲದೆ ಸ್‌ಟಾವೇರ್ ತಾಂತ್ರಿಕ ತೊಂದರೆಯಿಂದ ನಾಗರಿಕರಿಗೆ ಸೌಲಭ್ಯ ಪಡೆಯಲು ಸಾಧ್ಯವಾಗಿಲ್ಲ ಎಂಬುದನ್ನು ಅಧಿಕಾರಿಗಳೇ ಒಪ್ಪಿಕೊಂಡಿದ್ದಾರೆ.

ಈ ಕಾರಣದಿಂದ ಜಿಬಿಎ ಮುಖ್ಯಸ್ಥರು ನಗರಾಭಿವೃದ್ಧಿ ಇಲಾಖೆಯ ಹೆಚ್ಚುವರಿ ಮುಖ್ಯ ಕಾರ್ಯದರ್ಶಿ ಕಚೇರಿಗೆ ಮಾಹಿತಿ ನೀಡಿ ಗಡುವು ವಿಸ್ತರಿಸುವ ಇಂಗಿತ ವ್ಯಕ್ತಪಡಿಸಿದ್ದಾರೆ ಎಂದು ಸರ್ಕಾರದ ಮೂಲಗಳು ತಿಳಿಸಿವೆ.

ಬಿ ಟು ಎ ಖಾತಾ ಅಭಿಯಾನದಿಂದ ಪಾಲಿಕೆಗಳ ಬೊಕ್ಕಸಕ್ಕೆ 2 ಸಾವಿರ ಕೋಟಿ ರೂ. ಆದಾಯ ನಿರೀಕ್ಷಿಸಲಾಗಿತ್ತು. ಆದರೆ, ಸದ್ಯ 450 ಕೋಟಿ ರೂ. ಮಾತ್ರ ಆದಾಯ ಸಂಗ್ರಹವಾಗಿದೆ. ನಿರೀಕ್ಷಿಸಿದಷ್ಟು ವರಮಾನ ಬಾರದ ಕಾರಣ ಮತ್ತಷ್ಟು ಸಮಯವಾಕಾಶ ನೀಡಿ ಜನರಿಂದ ಕಾಲಮಿತಿಯೊಳಗೆ ಅರ್ಜಿ ಸ್ವೀಕರಿಸಿ ವಿಲೇವಾರಿ ಮಾಡುವ ಆಶಯವನ್ನು ಪಾಲಿಕೆಯ ಹಿರಿಯ ಅಧಿಕಾರಿಗಳು ವ್ಯಕ್ತಪಡಿಸಿದ್ದಾರೆ. ಜತೆಗೆ ಈ ವರ್ಷಾಂತ್ಯದವರೆಗೂ ಪಂಚ ಪಾಲಿಕೆಗಳ ಚುನಾವಣೆ ನಡೆಸಲು ಸುಪ್ರೀಂಕೋರ್ಟ್ ಕಾಲಾವಕಾಶ ನೀಡಿರುವುದರಿಂದ ಆ ಅವಧಿಯೊಳಗೆ ಅಭಿಯಾನವನ್ನು ಮರುಚಾಲನೆಗೊಳಿಸಿ ಜನರಿಗೆ ಸೌಲಭ್ಯ ನೀಡಲು ಮತ್ತೆ 100 ದಿನಗಳ ಗಡುವನ್ನು ವಿಧಿಸುವ ಬಗ್ಗೆ ಸರ್ಕಾರದ ಮಟ್ಟದಲ್ಲಿ ಚರ್ಚಿಸಿ ಅಂತಿಮ ನಿರ್ಧಾರ ಕೈಗೊಳ್ಳಲಾಗುತ್ತದೆ ಎಂದು ಹೇಳಲಾಗಿದೆ.