ಮೊದಲ ದಿನ 60,368 ಮತದಾರರಿಗೆ ನಮೂನೆ ವಿತರಣೆ

ಮೊದಲ ದಿನ ಮಹಾನಗರದ ಎಲ್ಲ ಬೂತ್‌ಗಳಲ್ಲಿ (8,972) ಆಯಾ ಮತಗಟ್ಟೆ ಮಟ್ಟದ ಅಧಿಕಾರಿಗಳು (ಬಿಎಲ್‌ಒ) ತಮಗೆ ವಹಿಸಿರುವ ಮತಪಟ್ಟಿಯಂತೆ ಮತದಾರರ ಮನೆಗೆ ತೆರಳಿ ನಮೂನೆಗಳನ್ನು ಹಸ್ತಾಂತರಿಸಿದರು. ಹಲವು ಮನೆಗಳಿಗೆ ತೆರಳಿದಾಗ ಕುಟುಂಬ ಸದಸ್ಯರಿಲ್ಲದ ಕಾರಣ ವಾಪಸ್ ಮರಳಬೇಕಾಯಿತು. ಇನ್ನೂ ಕೆಲವೆಡೆ ನಮೂನೆ ಪಡೆಯುವ ಸಂಬಂಧ ಜನರು ಬಿಎಲ್‌ಒಗಳನ್ನು ಹಲವು ಪ್ರಶ್ನೆಗಳನ್ನು ಕೇಳಿದ್ದು, ನಮ್ಮ ವೋಟು ಕಸಿದುಕೊಳ್ಳುವುದಿಲ್ಲವೇ ಎಂಬುದನ್ನು ಖಾತರಿಪಡಿಸಿಕೊಂಡರು.

ಉತ್ತರ ಪಾಲಿಕೆಯ ಬಿಎಲ್‌ಒ ಕರ್ನಾಟಕದ ಮುಖ್ಯ ಚುನಾವಣಾಧಿಕಾರಿ (ಸಿಇಒ) ಅನ್ಬುಕುಮಾರ್ ಅವರು ವಾಸವಿರುವ ಜಕ್ಕೂರಿನ ನಿವಾಸಕ್ಕೆ ತೆರಳಿ ನಮೂನೆ ವಿತರಿಸಿದರು. ಇದೇ ರೀತಿ ನಗರದ ವಿವಿಧೆಡೆ ಗಣ್ಯ ಮತದಾರರ ಮನೆಗಳಿಗೆ ತೆರಲಿ ಗಣತಿ ಾರಂ ಹಸ್ತಾಂತರಿಸಿದರು. ಜಿಬಿಎ ಮುಖ್ಯ ಆಯುಕ್ತ ಎಂ.ಮಹೇಶ್ವರ ರಾವ್, ನಟಿ ಭಾರತಿ, ವಿಶ್ರಾಂತ ಲೋಕಾಯುಕ್ತ ನ್ಯಾ. ಸಂತೋಷ್ ಹೆಗ್ಡೆ, ಕಲಾವಿದರಾದ ಸಿಹಿ ಕಹಿ ಚಂದ್ರು, ಸುಂದರರಾಜ್ ಹಾಗೂ ಇತರರ ನಿವಾಸಕ್ಕೆ ಬಿಎಲ್‌ಒಗಳು ಖುದ್ದು ತೆರಳಿದ್ದು, ಭರ್ತಿ ಮಾಡಿದ ಫಾರಂಗಳನ್ನು ಮತ್ತೊಂದು ಸುತ್ತಿನ ಭೇಟಿ ವೇಳೆ ಹಿಂದಿರುಗಿಸುವಂತೆ ಮಾಹಿತಿ ನೀಡಿ ವಾಪಸಾದರು.

ಎಸ್‌ಐಆರ್ ಹಿನ್ನೆಲೆ ಜು.29ರ ತನಕ ಮತದಾರರಿಗೆ ನಮೂನೆಗಳನ್ನು ವಿತರಿಸಲಾಗುತ್ತದೆ. ಭರ್ತಿ ಮಾಡಿದ ನಮೂನೆಯನ್ನು ಅಗತ್ಯ ದಾಖಲೆಗಳೊಂದಿಗೆ ಬಿಎಲ್‌ಒಗಳಿಗೆ ಸಲ್ಲಿಸಿ ಸಹಕರಿಸುವಂತೆ ಜಿಬಿಎ ಮುಖ್ಯ ಆಯುಕ್ತರು ಹಾಗೂ ಜಿಲ್ಲಾ ಚುನಾವಣಾಧಿಕಾರಿ ಎಂ.ಮಹೇಶ್ವರ ರಾವ್ ಮನವಿ ಮಾಡಿದ್ದಾರೆ.

ಕರ್ನಾಟಕದ ಮುಖ್ಯ ಚುನಾವಣಾಧಿಕಾರಿ (ಸಿಇಒ) ಅನ್ಬುಕುಮಾರ್ ಅವರ ನಿವಾಸಕ್ಕೆ ಬಿಎಲ್‌ಒಗಳು ತೆರಳಿ ಗಣತಿ ನಮೂನೆ ವಿತರಿಸಿದರು. ಈ ವೇಳೆ ಅನ್ಬು ಕುಮಾರ್ ಅವರು ಮತದಾರರಿಂದ ಸಮರ್ಪಕವಾದ ಮಾಹಿತಿಯನ್ನು ಸಂಗ್ರಹಿಸಬೇಕು. ಜನರಿಗೆ ಅನುಮಾನಗಳಿದ್ದಲ್ಲಿ ಅವುಗಳಿಗೆ ಸಮಾಧಾನದಿಂದ ಉತ್ತರಿಸಿ ಪರಿಹಾರ ಒದಗಿಸಬೇಕು. ಯಾವುದೇ ಗೊಂದಲ ಮಾಡಿಕೊಳ್ಳದಂತೆ ಕೆಲಸ ನಿರ್ವಹಿಸಬೇಕು. ಸಮಸ್ಯೆ ಎದುರಾದಲ್ಲಿ ಮೇಲ್ವಿಚಾರಕರು ಅಥವಾ ಹಿರಿಯ ಅಧಿಕಾರಿಗಳ ಮಾರ್ಗದರ್ಶನ ಪಡೆದುಕೊಳ್ಳುವಂತೆ ಅವರು ಕಿವಿಮಾತು ಹೇಳಿದರು.

ಕೇಂದ್ರ ಜಿಲ್ಲೆ -12,122

ಉತ್ತರ ಜಿಲ್ಲೆ -23,221

ದಕ್ಷಿಣ ಜಿಲ್ಲೆ -10,620

ಬೆಂ. ನಗರ ಜಿಲ್ಲೆ -14,405

ಒಟ್ಟು -60,368