ಬೆಂಗಳೂರು

ರಾಜಧಾನಿಯಲ್ಲಿ ಫುಟ್‌ಪಾತ್ ತೆರವು ಕಾರ್ಯ ಮತ್ತೆ ಆರಂಭ

footpath-clearance
footpath-clearance
ಆರ್.ತುಳಸಿಕುಮಾರ್
Published on: 

ಪ್ರಮುಖ ಮುಖ್ಯಾಂಶಗಳು

  • ಸೋಮವಾರ 14 ಕಿ.ಮೀ. ಉದ್ದದ ರಸ್ತೆಯಲ್ಲಿ ಕಾರ್ಯಾಚರಣೆ
  • ಭದ್ರತೆಗೆ ವಿವಿಧೆಡೆ ಹೆಚ್ಚಿನ ಸಂಖ್ಯೆಯ ಪೊಲೀಸರ ನಿಯೋಜನೆ
ಬೆಂಗಳೂರು: ಜಿಬಿಎ ವ್ಯಾಪ್ತಿಯ ವಿವಿಧ ನಗರ ಪಾಲಿಕೆಗಳ ಪ್ರದೇಶದಲ್ಲಿ ಸೋಮವಾರದಿಂದ ಫುಟ್‌ಪಾತ್ ಒತ್ತುವರಿ ತೆರವು ಕಾರ್ಯಾಚರಣೆ ಮತ್ತೆ ಆರಂಭಗೊಂಡಿದ್ದು, ಒಂದೇ ದಿನ 14 ಕಿ.ಮೀ. ಉದ್ದ ಪಾದಚಾರಿ ಮಾರ್ಗವನ್ನು ಒತ್ತುವರಿಮುಕ್ತ ಗೊಳಿಸಲಾಯಿತು.
ಕಳೆದ ವಾರ ಶಿವಾಜಿನಗರದಲ್ಲಿ ಪಾಲಿಕೆ ಸಿಬ್ಬಂದಿ ಮೇಲೆ ಹಲ್ಲೆ ನಡೆದ ಬಳಿಕ ಕಾರ್ಯಾಚರಣೆ ನಿಧಾನಗೊಂಡಿತ್ತು. ಜತೆಗೆ ವಾರಾಂತ್ಯ ಎರಡು ದಿನ ರಜೆ ಇದ್ದ ಕಾರಣ ಕಾರ್ಮಿಕರಿಗೆ ರಜೆ ನೀಡಲಾಗಿತ್ತು. ಸೋಮವಾರದಿಂದ ಐದೂ ಪಾಲಿಕೆಗಳಲ್ಲಿ ತೆರವು ಕಾರ್ಯ ಚುರುಕುಗೊಂಡಿದ್ದರೂ, ಪೂರ್ವ ಹಾಗೂ ಪಶ್ಚಿಮ ಕಾರ್ಪೋರೇಷನ್‌ಗಳ ವ್ಯಾಪ್ತಿಯಲ್ಲಿ ಸೀಮಿತ ಪ್ರಮಾಣದಲ್ಲಿ ನಡೆಯಿತು.

ಕೇಂದ್ರ ವ್ಯಾಪ್ತಿಯಲ್ಲಿ 14 ರಸ್ತೆಗಳಲ್ಲಿ ತೆರವು:

ಕೇಂದ್ರ ಪಾಲಿಕೆ ವ್ಯಾಪ್ತಿಯಲ್ಲಿ ಅತಿ ಹೆಚ್ಚು ಒತ್ತುವರಿ ಪ್ರಕರಣಗಳಿದ್ದು, ಈ ಭಾಗದಲ್ಲಿ ಹೆಚ್ಚಿನ ಗಮನ ಕೇಂದ್ರೀಕರಿಸಿರುವ ಜಿಬಿಎ, ಶಿವಾಜಿನಗರದ ಜನಿಬಿಡ ಸ್ಥಳಗಳಲ್ಲಿ ಸಾರ್ವಜನಿಕರು ಫುಟ್‌ಪಾತ್‌ಗಳಲ್ಲಿ ಸರಾಗವಾಗಿ ಓಡಾಡಲು ಅವಕಾಶ ಕಲ್ಪಿಸಲು ಮುಂದಾಗಿದೆ. ಈ ನಿಟ್ಟಿನಲ್ಲಿ 14 ರಸ್ತೆಗಳಲ್ಲಿ ಒಟ್ಟು 10.53 ಕಿ.ಮೀ. ಉದ್ದ ಫುಟ್‌ಪಾತ್ ಒತ್ತುವರಿಯನ್ನು ತೆರವುಗೊಳಿಸಲಾಯಿತು. ಇದಕ್ಕಾಗಿ 60 ಕಾರ್ಮಿಕರು, 4 ಜೆಸಿಬಿ, 6 ಟ್ರ್ಯಾಕ್ಟರ್ ಹಾಗೂ 4 ಟಿಪ್ಪರ್‌ಗಳನ್ನು ಬಳಸಿಕೊಳ್ಳಲಾಯಿತು. ಈ ವೇಳೆ 13 ತಳ್ಳುವ ಗಾಡಿಗಳು, 1 ಪೆಟ್ಟಿ ಅಂಗಡಿ, 16 ಕ್ಯಾನೋಪಿಗಳು, 7 ತಾತ್ಕಾಲಿಕ ಶೆಡ್, 15 ಮೆಟ್ಟಿಲುಗಳು ಹಾಗೂ 26 ಟನ್ ತ್ಯಾಜ್ಯವನ್ನು ತೆರವುಗೊಳಿಸಲಾಯಿತು.
ಶಿವಾಜಿನಗರ ವಿಭಾಗದ ರಸೆಲ್ ಮಾರುಕಟ್ಟೆ ರಸ್ತೆ, ನೊರೊನ್ಹಾ ರಸ್ತೆ, ಮೀಟ್ ಮಾರುಕಟ್ಟೆ ರಸ್ತೆ, ಜಾಮಾ ಮಸೀದಿಯ 6ನೇ ಕ್ರಾಸ್, ಧರ್ಮರಾಜ ಕೋಯಿಲ್ ಸ್ಟ್ರೀಟ್ ಹಾಗೂ ವಿಟ್ಟಲ್ ಮಲ್ಯ ರಸ್ತೆಯಲ್ಲಿ ತೆರವು ಕಾರ್ಯ ಕೈಗೊಳ್ಳಲಾಯಿತು. ನ್ಯೂ ಮಾರ್ಕೆಟ್ ರಸ್ತೆ ಹಾಗೂ ಜಾಮಾ ಮಸೀದಿ ರಸ್ತೆಯಲ್ಲಿ ಪಾದಚಾರಿ ಮಾರ್ಗದ ಮೇಲೆ ಮೆಟ್ಟಿಲು ನಿರ್ಮಿಸಿಕೊಂಡಿದ್ದವರು ಪಾಲಿಕೆ ಅಧಿಕಾರಿಗಳೊಂದಿಗೆ ವಾಗ್ವಾದ ನಡೆಸಿದರು. ಸ್ವಲ್ಪ ಪ್ರಮಾಣದಷ್ಟೇ ಮೆಟ್ಟಿಲು ನಿರ್ಮಿಸಿದ್ದು, ಇದರಿಂದ ಯಾರಿಗೂ ತೊಂದರೆ ಆಗುತ್ತಿಲ್ಲ. ಹಾಗಾಗಿ ಅವುಗಳನ್ನು ಹಾಗೆಯೆ ಬಿಡುವಂತೆ ಮಾಲೀಕರು ಮನವಿ ಮಾಡಿದರು. ಮನವಿಗೆ ಸೊಪ್ಪು ಹಾಕದ ಪಾಲಿಕೆ ಸಿಬ್ಬಂದಿ ತೆರವುಗೊಳಿಸಿದರು. ಹೆಚ್ಚಿನ ಪೊಲೀಸರ ನಿಯೋಜನೆಯಿಂದ ಯಾವುದೇ ಗಲಾಟೆ ನಡೆಯಲಿಲ್ಲ.
ಸರ್ ಸಿ.ವಿ. ರಾಮನ್‌ನಗರದಲ್ಲಿ 2.50 ಕಿ.ಮೀ., ಶಾಂತಿನಗರದಲ್ಲಿ 2.50 ಕಿ.ಮೀ., ಗಾಂಧಿನಗರದಲ್ಲಿ 2.50 ಕಿ.ಮೀ., ಚಾಮರಾಜಪೇಟೆಯಲ್ಲಿ 0.50 ಕಿ.ಮೀ. ಹಾಗೂ ಚಿಕ್ಕಪೇಟೆ ವಿಭಾಗದಲ್ಲಿ 1 ಕಿ.ಮೀ. ಉದ್ದದಷ್ಟು ತೆರವು ಕಾರ್ಯ ನಡೆಸಲಾಯಿತು.

ದಕ್ಷಿಣದಲ್ಲಿ 1.90 ಕಿ.ಮೀ. ತೆರವು:

ದಕ್ಷಿಣ ನಗರ ಪಾಲಿಕೆ ವ್ಯಾಪ್ತಿಯ ಜಯನಗರ 4ನೇ ಬ್ಲಾಕ್ ಹಾಗೂ ಎಚ್‌ಎಸ್‌ಆರ್ ಲೇಔಟ್‌ನ ವಿವಿಧೆಡೆ ಒಟ್ಟು 1.90 ಕಿ.ಮೀ. ಉದ್ದದಷ್ಟು ಒತ್ತುವರಿ ತೆರವುಗೊಳಿಸಲಾಯಿತು. 5 ಅಂಗಡಿ, 4 ಕೈಗಾಡಿ, 8 ತಾತ್ಕಾಲಿಕ ಶೆಡ್ ಹಾಗೂ 9 ಮೆಟ್ಟಿಲುಗಳ ನಿರ್ಮಾಣ ಭಾಗವನ್ನು ಕಾರ್ಮಿಕರು ತೆರವುಗೊಳಿಸಿದರು.
ಇದೇ ರೀತಿ ಉತ್ತರ ಪಾಲಿಕೆ ವ್ಯಾಪ್ತಿಯ ದಾಸರಹಳ್ಳಿ ವಿಭಾಗದ ವಿವಿಧೆಡೆ 0.70 ಕಿ.ಮೀ. ಉದ್ದ ಫುಟ್‌ಪಾತ್‌ಅನ್ನು ಒತ್ತುವರಿ ಮುಕ್ತಗೊಳಿಸಲಾಯಿತು. ಪೂರ್ವ ಪಾಲಿಕೆ ವ್ಯಾಪ್ತಿಯಲ್ಲಿ 1 ಕಿ.ಮೀ. ಉದ್ದದಷ್ಟು ಒತ್ತುವರಿ ತೆರವು ಮಾಡಲಾಯಿತು ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
"

ಫುಟ್‌ಪಾತ್ ಇರುವುದು ಪಾದಚಾರಿಗಳ ಓಡಾಟಕ್ಕೆ. ಆದರೂ, ನಗರದ ವಿವಿಧೆಡೆ ವ್ಯಾಪಾರದ ಹೆಸರಿನಲ್ಲಿ ಒತ್ತುವರಿ ಮಾಡಿಕೊಳ್ಳಲಾಗಿದೆ. ಇವುಗಳನ್ನು ತೆರವುಗೊಳಿಸುವ ಜಿಬಿಎ ಕ್ರಮಕ್ಕೆ ನಮ್ಮ ಬೆಂಬಲ ಇದೆ. ಇದೇ ರೀತಿ ಹಳೆಯ ವಾಹನಗಳನ್ನು ವರ್ಷಾನುಗಟ್ಟಲೆ ರಸ್ತೆಯಲ್ಲೇ ಅನಾಥವಾಗಿರುವುಗಳನ್ನು ಪತ್ತೆ ಹಚ್ಚಿ ವಿಲೇವಾರಿ ಮಾಡುವಂತೆ ಸೂಚಿಸಲಾಗಿದೆ.

- ಎನ್.ಎ. ಹ್ಯಾರಿಸ್, ಬಿಡಿಎ ಅಧ್ಯಕ್ಷ

ವಿಜಯವಾಣಿ ನಂ.1 ದಿನ ಪತ್ರಿಕೆ | Vijayavani | Kannada News
www.vijayavani.net