ಉತ್ತಮ ಜೀವನ ರೂಪಿಸಿಕೊಳ್ಳಲು ಶಿಸ್ತು ಮುಖ್ಯ

ಬೆಂಗಳೂರು: ಪಠ್ಯದ ಜತೆಗೆ ಪಠ್ಯೇತರ ಚಟುವಟಿಕೆಗಳಲ್ಲಿ ಮಕ್ಕಳು ತೊಡಗಿಸಿಕೊಳ್ಳುವುದರಿಂದ ಶಿಸ್ತು, ದೈಹಿಕ ಶಕ್ತಿ, ಉತ್ತಮ ಮನಸ್ಥಿತಿ ಬೆಳೆಯಲು ಸಹಕಾರಿಯಾಗುತ್ತದೆ, ಇದರಿಂದ ಉತ್ತಮ ಜೀವನ ರೂಪಿಸಿಕೊಳ್ಳಬಹುದು ಎಂದು ಸಚಿವ ರಾಮಲಿಂಗಾರೆಡ್ಡಿ ಹೇಳಿದ್ದಾರೆ.

ನಗರದ ಕೊಂಡಜ್ಜಿ ಬಸಪ್ಪ ಸಭಾಗಂಣದಲ್ಲಿ ಕೃಷ್ಣಯ್ಯ ಚೆಟ್ಟಿ ಜುವೆಲ್ಲರ್ಸ್​ ಸಂಸ್ಥೆಯ ವತಿಯಿಂದ ಶನಿವಾರ ಹಮ್ಮಿಕೊಂಡಿದ್ದ ಭಾರತ್​ ಸ್ಕೌಟ್ಸ್​ ಮತ್ತು ಗೈಡ್ಸ್​ ಸಂಸ್ಥೆಯ 650 ವಿದ್ಯಾರ್ಥಿಗಳಿಗೆ ಸಮವಸ್ತ್ರ ವಿತರಣಾ ಕಾರ್ಯಕ್ರಮದಲ್ಲಿ ಮಾತನಾಡಿದರು. ಹಿಂದೆ ಶಾಲಾ, ಕಾಲೇಜು ಹಂತಗಳಲ್ಲಿ ಎನ್​ಸಿಸಿ, ಸ್ಕೌಟ್ಸ್​-ಗೈಡ್ಸ್​ ಹಾಗೂ ಕ್ರೀಡೆ ಕಡ್ಡಾಯವಾಗಿತ್ತು ಎಂದರು.

ಹಿಂದೆಲ್ಲ ಎನ್​ಸಿಸಿಯಲ್ಲಿ ಎಲ್ಲರೂ ಕಡ್ಡಾಯವಾಗಿ ಭಾಗವಹಿಸುವ ವಾತಾವರಣವಿತ್ತು. ಇತ್ತೀಚಿನ ದಿನಗಳಲ್ಲಿ ನಾನಾ ಕಾರಣಗಳಿಂದ ಈ ರೀತಿಯ ಚಟುವಟಿಕೆಗಳಿಗೆ ಸೇರುವ ಮಕ್ಕಳ ಸಂಖ್ಯೆ ಕಡಿಮೆಯಾಗುತ್ತಿದೆ. ಶಿಕ್ಷಣವೆಂದರೆ ಬರಿ ಓದಿಗೆ ಸಿಮೀತವಲ್ಲ. ಜತೆಗೆ ಕ್ರೀಡೆ, ಸಾಂಸತಿಕ ಚಟುವಟಿಕೆಗಳಲ್ಲಿ ಭಾಗವಹಿಸುವುದು ಮುಖ್ಯ ಎಂದು ತಿಳಿಸಿದರು.

ಸ್ಕೌಟ್ಸ್​&ಗೈಡ್ಸ್​ ಸಂಸ್ಥೆಯು ಪ್ರತಿಯೊಬ್ಬ ವಿದ್ಯಾರ್ಥಿಗೂ ಸೂಕ್ತ ವೇದಿಕೆಯಾಗಿದೆ. ಪಾಲಕರು ತಮ್ಮ ಮಕ್ಕಳನ್ನು ಕಡ್ಡಾಯವಾಗಿ ಇಂತಹ ಸಂಸ್ಥೆಗಳಿಗೆ ಸೇರಿಸಬೇಕು ಎಂದು ಕಿವಿಮಾತು ಹೇಳಿದರು.

ಸಿ.ಕೃಷ್ಣಯ್ಯ ಶೆಟ್ಟಿ ಫೌಂಡೇಶನ್​ನ ಟ್ರಸ್ಟಿ ಡಾ.ವಿನೋದ್​ ಹಯಗ್ರೀವ ಮಾತನಾಡಿ, ತಂತ್ರಜ್ಞಾನ ಬೆಳೆದಂತೆ ನಗರಗಳು, ಉದ್ಯೋಗದ ಮಾರ್ಗಗಳು ಬದಲಾಗಬಹುದು. ಆದರೆ ಸ್ಕೌಟ್ಸ್​ ಮತ್ತು ಗೈಡ್ಸ್​ ಸಂಸ್ಥೆಯ ಮೂಲ ಸಿದ್ಧಾಂತಗಳು ಮಾತ್ರ ಎಂದಿಗೂ ಬದಲಾಗುವುದಿಲ್ಲ. ಇದರಿಂದ ನಾಯಕರಾಗಿರುವವರು ಸಾಕಷ್ಟು ಮಂದಿ ಇದ್ದಾರೆ ಎಂದರು.

ಕೃಷ್ಣಯ್ಯ ಶೆಟ್ಟಿ ಫೌಂಡೇಶನ್​ನ ಟ್ರಸ್ಟಿ ತ್ರೀವೇಣಿ ವಿನೋದ್​, ಜೈನ್​ ವಿಶ್ವವಿದ್ಯಾಲಯದ ಕುಲಪತಿ ಡಾ.ಆರ್​.ಚನ್ನರಾಜ್​ ಜೈನ್​, ಸೌಟ್ಸ್​ ಮತ್ತು ಗೈಡ್ಸ್​ ಸಂಸ್ಥೆಯ ಉಪಾಧ್ಯಕ್ಷರಾದ ಕೊಂಡಜ್ಜಿ ಬಿ. ಷಣ್ಮುಖಪ್ಪ, ಎ.ಎನ್​. ಮಹೇಶ್​, ಪದಾಧಿಕಾರಿಗಳಾದ ಎಂ.ಎಂ. ಖಾಲೀದ್​, ಚಿನ್ನಸ್ವಾಮಿ ರೆಡ್ಡಿ, ಗಂಗಪ್ಪ ಗೌಡ ಉಪಸ್ಥಿತರಿದ್ದರು.

ಕೋಟ್​..

ಮಕ್ಕಳಲ್ಲಿ ಸೇವಾ ಮನೋಭಾವ ಮೂಡಿಸುವುದು, ಭವಿಷ್ಯ ನಾಯಕರನ್ನು ಸೃಷ್ಟಿಸುವುದು ಸಂಸ್ಥೆಯ ಮೂಲ ಉದ್ದೇಶ. ವಿವಿಧ ಸಂಸ್ಥೆಗಳವರು, ಉದ್ಯಮಿಗಳು ಸಂಸ್ಥೆಯ ಚಟುವಟಿಕೆಗಳಿಗೆ ಸಹಕಾರ ನೀಡುತ್ತಿರುವುದು ಶ್ಲಾನೀಯ.