"ಡಿಕ್ಲಟರ್​' ಸಮಸ್ಯೆ ಮುಂದುವರಿಕೆ!|BSWML

ಮೇ 16ರಂದು ಆರಂಭವಾದ ಈ ಆ್ಯಪ್​ ಕೇವಲ ಮೂರು ದಿನಗಳಲ್ಲಿ 5 ಸಾವಿರಕ್ಕೂ ಅಧಿಕ ಡೌನ್​ಲೋಡ್​ಗಳನ್ನು ದಾಖಲಿಸಿದ್ದು, ಸುಮಾರು 500ಕ್ಕೂ ಹೆಚ್ಚು ಬುಕಿಂಗ್​ಗಳು ಬಂದಿತ್ತು. ಇದುವರೆಗೆ ಸುಮಾರು 15 ಸಾವಿರ ಮಂದಿ ಆ್ಯಪ್​ ಡೌನ್​ಲೋಡ್​ ಮಾಡಿದ್ದು, ಹಳೆಯ ಸೋಫಾ, ಹಾಸಿಗೆ, ಮಂಚ, ಫ್ರಿಜ್​, ವಾಷಿಂಗ್​ ಮಷಿನ್​, ಬಟ್ಟೆ ಸೇರಿ ದೊಡ್ಡ ಗಾತ್ರದ ಗೃಹ ತ್ಯಾಜ್ಯವನ್ನು ಉಚಿತವಾಗಿ ಮನೆ ಬಾಗಿಲಿನಿಂದಲೇ ಸಂಗ್ರಹಿಸುವ ವ್ಯವಸ್ಥೆಗೆ ಸಾರ್ವಜನಿಕರು ಮೆಚ್ಚುಗೆ ಸೂಚಿಸಿದ್ದರು. ಆದರೆ, ಸಂಸ್ಥೆಯಿಂದ ಸರಿಯಾದ ಸ್ಪಂದನೆ ಲಭಿಸದ ಹಿನ್ನೆಲೆಯಲ್ಲಿ ಗ್ರಾಹಕರು ಆಕ್ರೋಶ ವ್ಯಕ್ತಪಡಿಸುತ್ತಿದ್ದಾರೆ.

ಈ ಹಿಂದೆ ಕೆಲವು ನಾಗರಿಕರು ಆ್ಯಪ್​ನಲ್ಲಿ ಬುಕಿಂಗ್​ ಮಾಡಿದರೂ ನಿಗದಿತ ದಿನಾಂಕಕ್ಕೆ ವಾಹನ ಬಾರದಿರುವುದು, ಸಂಗ್ರಹ ದಿನಾಂಕದ ಮಾಹಿತಿ ದೊರೆಯದಿರುವುದು ಹಾಗೂ ಮನವಿಗಳ ಸ್ಥಿತಿಗತಿ ತಿಳಿಯದಿರುವ ಬಗ್ಗೆ ದೂರು ನೀಡಿದ್ದಾರೆ. "ಮನವಿ ಸಲ್ಲಿಸಿ ಹಲವು ದಿನಗಳಾದರೂ ತ್ಯಾಜ್ಯ ಇನ್ನೂ ಮನೆಯಲ್ಲೇ ಇದೆ' ಎಂದು ಕೆಲವರು ಸಾಮಾಜಿಕ ಜಾಲತಾಣಗಳು ಹಾಗೂ ಮಾಧ್ಯಮಗಳ ಮೂಲಕ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.

ಪ್ರಸ್ತುತ ಡಿಕ್ಲಟರ್​ ಮೂಲಕ ತ್ಯಾಜ್ಯ ಸಂಗ್ರಹ ಕಾರ್ಯವನ್ನು ಮುಖ್ಯವಾಗಿ ಭಾನುವಾರಗಳಲ್ಲಿ ಮಾತ್ರ ನಡೆಸಲಾಗುತ್ತಿದ್ದು, ಮನವಿಗಳ ಸಂಖ್ಯೆ ಹೆಚ್ಚಿದಂತೆ ಇತರ ದಿನಗಳಿಗೂ ಸೇವೆ ವಿಸ್ತರಿಸುವ ಬಗ್ಗೆ ಈ ಹಿಂದೆ ಹಿರಿಯ ಅಧಿಕಾರಿಗಳು ತಿಳಿಸಿದ್ದರು. ಅದೇ ರೀತಿ ವ್ಯವಸ್ಥೆಯ ನಿರ್ವಹಣೆಗೆ ಆಗಿರುವ ಅಡೆತಡೆಗಳನ್ನು ನಿವಾರಿಸಿ, ಸ್ವಚ್ಛ ಬೆಂಗಳೂರು ನಿರ್ಮಾಣಕ್ಕೆ ಎಲ್ಲರೂ ಕೈಜೋಡಿಸಬೇಕೆಂದು ಜನರು ಆಗ್ರಹಿಸಿದ್ದಾರೆ.