ಡಿಸೆಂಬರ್​ಗೆ ನೀಲಿಮಾರ್ಗ ಸಂಚಾರಕ್ಕೆ ಸಜ್ಜು!| METRO

ನಮ್ಮ ಮೆಟ್ರೋದ ಬಹುನಿರೀಕ್ಷಿತ ನೀಲಿ ಮಾರ್ಗದ ಯೋಜನೆಗೆ ವೇಗ ಲಭಿಸಿದ್ದು, ಕೆಂಪೇಗೌಡ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣ ಮಾರ್ಗದಲ್ಲಿ ಸಂಚರಿಸಲಿರುವ ಮೊದಲ ಮೆಟ್ರೋ ರೈಲು ಗುರುವಾರ ಬೆಳಗ್ಗೆ ನಗರದ ಬೈಯಪ್ಪನಹಳ್ಳಿ ಮೆಟ್ರೋ ಡಿಪೋಗೆ ತಲುಪಿದೆ. 

ಸಿಲ್ಕ್​ ಬೋರ್ಡ್​ನಿಂದ ಕೆಂಪೇಗೌಡ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದವರೆಗೆ ಸಂಪರ್ಕ ಕಲ್ಪಿಸುವ ನಮ್ಮ ಮೆಟ್ರೋ ನೀಲಿ ಮಾರ್ಗ ಯೋಜನೆಯ ಕಾಮಗಾರಿ ವೇಗವಾಗಿ ಸಾಗುತ್ತಿದ್ದು, ಈ ವರ್ಷದ ಡಿಸೆಂಬರ್​ ವೇಳೆಗೆ ಮೊದಲ ಹಂತದ ಮಾರ್ಗವನ್ನು ಸಾರ್ವಜನಿಕ ಸಂಚಾರಕ್ಕೆ ಮುಕ್ತಗೊಳಿಸುವ ಗುರಿಯನ್ನು ಬೆಂಗಳೂರು ಮೆಟ್ರೋ ರೈಲು ನಿಗಮ ನಿಯಮಿತ (ಬಿಎಂಆರ್​ಸಿಎಲ್​) ಹೊಂದಿದೆ.

ಸುಮಾರು 58.19 ಕಿಲೋ ಮೀಟರ್​ ಉದ್ದದ ನೀಲಿ ಮಾರ್ಗಕ್ಕಾಗಿ ಬಿಎಂಆರ್​ಸಿಎಲ್​ ಒಟ್ಟು 38 ಚಾಲಕರಹಿತ ಮೆಟ್ರೋ ರೈಲುಗಳ ಪೂರೈಕೆಗೆ ಬೆಮೆಲ್​ ಸಂಸ್ಥೆಗೆ ಆದೇಶ ನೀಡಿದೆ. ಈ ಪೈಕಿ ಮೊದಲ ರೈಲು ಈಗ ಬೆಂಗಳೂರಿಗೆ ಆಗಮಿಸಿದ್ದು, ಮುಂದಿನ ದಿನಗಳಲ್ಲಿ ಪರೀಕ್ಷಾ ಸಂಚಾರ ಸೇರಿ ವಿವಿಧ ತಾಂತ್ರಿಕ ಪ್ರಕ್ರಿಯೆಗಳು ಆರಂಭವಾಗಲಿವೆ.

ಯೋಜನೆಯ ಮೊದಲ ಹಂತವಾಗಿ ಸೆಂಟ್ರಲ್​ ಸಿಲ್ಕ್​ ಬೋರ್ಡ್​ನಿಂದ ಕೆ.ಆರ್​.ಪುರಂವರೆಗಿನ 19.75 ಕಿಲೋಮೀಟರ್​ ಉದ್ದದ ಮಾರ್ಗದಲ್ಲಿ ಮೆಟ್ರೋ ಸಂಚಾರ ಆರಂಭಿಸಲು ಸಿದ್ಧತೆ ನಡೆಯುತ್ತಿದೆ. ಈ ವಿಭಾಗದಲ್ಲಿ ಒಟ್ಟು 13 ಮೆಟ್ರೋ ನಿಲ್ದಾಣಗಳು ನಿಮಾರ್ಣವಾಗುತ್ತಿವೆ. 14,788 ಕೋಟಿ ರೂ. ವೆಚ್ಚದ ಈ ಮಹತ್ವಾಕಾಂಕ್ಷಿ ಯೋಜನೆಯಲ್ಲಿ ಒಟ್ಟು 30 ನಿಲ್ದಾಣಗಳು ಇರಲಿವೆ.

ಇನ್ನು ಯೋಜನೆಯ ಎರಡನೇ ಹಂತವಾದ ಕೆ.ಆರ್​.ಪುರಂನಿಂದ ಕೆಂಪೇಗೌಡ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದವರೆಗಿನ ಸುಮಾರು 37 ಕಿಲೋಮೀಟರ್​ ಉದ್ದದ ಮಾರ್ಗವು 2027ರ ಡಿಸೆಂಬರ್​ ವೇಳೆಗೆ ಪೂರ್ಣಗೊಳ್ಳುವ ನಿರೀಕ್ಷೆಯಿದೆ. ಬ್ಲೂ ಲೈನ್​ ಪೂರ್ಣಗೊಂಡ ಬಳಿಕ ನಗರದ ಪೂರ್ವ ಭಾಗ ಹಾಗೂ ವಿಮಾನ ನಿಲ್ದಾಣ ನಡುವಿನ ಸಂಪರ್ಕ ಮತ್ತಷ್ಟು ಸುಗಮವಾಗಲಿದ್ದು, ಈ ಮಾರ್ಗದಲ್ಲಿನ ವಾಹನ ದಟ್ಟಣೆ ಗಮನಾರ್ಹವಾಗಿ ಕಡಿಮೆಯಾಗುವ ಸಾಧ್ಯತೆ ಇದೆ.