ಜಿಕೆವಿಕೆಯಲ್ಲಿ ಕೃಷಿ ವಿದ್ಯಾರ್ಥಿಗಳ ಪ್ರತಿಭಟನೆ

ರಾಜ್ಯ ಕೃಷಿ ಇಲಾಖೆಯಯ ಎಒ ಹಾಗೂ ಎಒಒ ಹುದ್ದೆಗಳು ಈವರೆಗೆ ಕೃಷಿ ಪಧವೀಧರರಿಗೆ ಮಾತ್ರ ಮೀಸಲಾಗಿತ್ತು. ಆದರೀಗ ಕೆಇಎ ಆಹ್ವಾನಿಸಿರುವ ಅಧಿಸೂಚನೆಯಲ್ಲಿ ಖಾಸಗಿ ವಿವಿ ಹಾಗೂ ಬಯೋಟೆಕ್ ಇಂಜಿನಿಯರಿಂಗ್ ಪದವೀಧರರಿಗೂ ಅವಕಾಶ ಕಲ್ಪಿಸಲಾಗಿದೆ. ಇದು ಕೃಷಿ ಇಲಾಖೆಯ ನಿಯಮಗಳಿಗೆ ವಿರುದ್ಧವಾಗಿದ್ದು, ತಕ್ಷಣವೇ ಈ ಎರಡೂ ಬಗೆಯ ಪದವೀಧರರಿಗೆ ಪರೀಕ್ಷೆ ಬರೆಯಲು ನೀಡಿರುವ ಅರ್ಹತೆಯನ್ನು ಹಿಂಪಡೆಯಬೇಕು ಅಥವಾ ಪರೀಕ್ಷೆಯನ್ನು ರದ್ದುಪಡಿಸಬೇಕು ಎಂದು ಕೃಷಿ ಮತ್ತು ಕೃಷಿ ಸಂಬಂಧಿತ ಪದವಿ ವಿದ್ಯಾರ್ಥಿಗಳು ಹಾಗೂ ಪದವೀಧರರು ಆಗ್ರಹಿಸಿದ್ದಾರೆ.

ಪ್ರತಿಭಟನೆ ವೇಳೆ ಮಾತನಾಡಿದ ಕೃಷಿ ಪದವೀಧರರು, ಕೆಇಎ ಅಧಿಸೂಚನೆ ಹೊರಡಿಸಿದ ಬಳಿಕ ಪರಿಷ್ಕೃತ ರೂಪದಲ್ಲಿ ಖಾಸಗಿ ವಿವಿಯವರಿಗೆ ಪರೀಕ್ಷೆ ಬರೆಯಲ್ಲಿ ಅವಕಾಶ ಕಲ್ಪಿಸಲಾಗಿದೆ. ಜತೆಗೆ ಬಯೋಟೆಕ್ ಇಂಜಿನಿಯರಿಂಗ್ ಪದವೀಧರರು ಉನ್ನತ ಶಿಕ್ಷಣಕ್ಕೆ ಸಮಾನವಾಗಿದ್ದು, ಅವರನ್ನೂ ನಮ್ಮ ವಿದ್ಯಾರ್ಹತೆಗೆ ಹೋಲಿಸಿ ಪರೀಕ್ಷೆ ನಡೆಸಲಾಗುತ್ತಿದೆ. ಈ ಬಗ್ಗೆ ಸರ್ಕಾರಕ್ಕೆ ಹಿಂದೆಯೇ ವಾಸ್ತವವನ್ನು ಮನವರಿಕೆ ಮಾಡಿಕೊಡಲಾಗಿತ್ತು. ಆದರೆ, ಈಗ ಏಕಾಏಕಿ ಕೆಇಎ ಮೂಲಕ ವಿವಿಧ ಕೋರ್ಸ್‌ಗಳ ಪದವೀಧರರೆಲ್ಲರಿಗೂ ಎಕ್ಸಾಂ ಬರೆಯಲು ಅರ್ಹತೆ ನಿಗದಿ ಮಾಡಲಾಗಿದೆ. ಈ ಅಧಿಸೂಚನೆಯನ್ನು ವಾಪಸ್ ಪಡೆದು ಪರಿಷ್ಕೃತ ರೂಪದಲ್ಲಿ ಹಿಂದಿದ್ದಂತೆ ಪರೀಕ್ಷೆ ನಡೆಸಬೇಕು. ಇಲ್ಲದಿದ್ದರೆ ರಾಜ್ಯಾದ್ಯಂತ ಹೋರಾಟ ಮಾಡಲಾಗುವುದು ಎಂದು ವಿದ್ಯಾರ್ಥಿಗಳು ಎಚ್ಚರಿಕೆ ಸಂದೇಶ ರವಾನಿಸಿದ್ದಾರೆ.

ಎಒ ಹಾಗೂ ಎಒಒ ಹುದ್ದೆಗಳಿಗೆ ಅನ್ಯ ಕೋರ್ಸ್‌ಗಳ ಪದವೀಧರರಿಗೆ ಪರೀಕ್ಷೆ ಬರೆಯಲು ಅವಕಾಶ ಕಲ್ಪಿಸಿರುವುದನ್ನು ವಾಪಸ್ ಪಡೆಯಬೇಕು. ಪರೀಕ್ಷೆ ಅಧಿಸೂಚನೆಯ ಹೆಚ್ಚುವರಿ ಸುತ್ತೋಲೆಯನ್ನು ಹಿಂಪಡೆದು ಎಂದಿನಂತೆ ಕೃಷಿ ಪದವೀಧರರಿಗೆ ಮಾತ್ರ ಎಕ್ಸಾಂ ಬರೆಯಲು ಅನುವು ಮಾಡಿಕೊಡಬೇಕು ಎಂದು ಪ್ರತಿಭಟನೆ ನಡೆಸಿದ ವಿದ್ಯಾರ್ಥಿಗಳ ನಿಯೋಗವು ಕೃಷಿ ಆಯುಕ್ತರು ಹಾಗೂ ಬೆಂಗಳೂರು ಕೃಷಿ ವಿವಿ ಕುಲಪತಿಯವರಿಗೆ ಪ್ರತ್ಯೇಕವಾಗಿ ಮನವಿಪತ್ರ ಸಲ್ಲಿಸಿದೆ.