ಇಂದಿನಿಂದ ಬೆಂಗಳೂರು ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದಿಂದಲೂ ಪ್ರಾದೇಶಿಕ ವಿಮಾನ ಯಾನ ಶುರುವಾಗಿದ್ದು, ಪ್ರವೇಶ ಪೂರ್ವ ಪರಿಶೀಲನೆ, ಸುರಕ್ಷಾ ಪರಿಶೀಲೆಯಿಂದ ಹಿಡಿದು ವಿಮಾನ ಪ್ರವೇಶಿಸುವ ತನಕ ಎಲ್ಲವೂ ಸ್ಪರ್ಶ ರಹಿತ ವ್ಯವಸ್ಥೆಯಿಂದ ಕೂಡಿದೆ. ಕರೊನಾ ವೈರಸ್ COVID19 ಕಾರಣಕ್ಕೆ ವಿಮಾನ ನಿಲ್ದಾಣದ ಸಿಬ್ಬಂದಿ ಮತ್ತು ಪ್ರಯಾಣಿಕರ ನಡುವಿನ ಸಂವಹನವನ್ನು ಕಡಿಮೆ ಮಾಡಲು ಬಿಐಎಎಲ್ ಈ ವ್ಯವಸ್ಥೆಯನ್ನು ಜಾರಿಗೊಳಿಸಿದೆ. ಕಾಂಟ್ಯಾಕ್ಟ್ಲೆಸ್ ಎಂದು ಹೇಳುವಂಥದ್ದು ಕೆಂಪೇಗೌಡ ಇಂಟರ್ನ್ಯಾಷನಲ್ ಏರ್ಪೋರ್ಟ್ನಲ್ಲಿ ಬಝ್ವರ್ಡ್ ಆಗಿರಲಿದೆ ಎಂದು ಬಿಐಎಎಲ್ ಭಾನುವಾರ ಬಿಡುಗಡೆ ಮಾಡಿದ್ದ ಪ್ರಕಟಣೆಯಲ್ಲಿ ಘೋಷಿಸಿತ್ತು. ಈ ಟೆಕ್ನಾಲಜಿ ಬಳಕೆಯನ್ನು ಈ ಸಂಕಷ್ಟದ ಅವಧಿಯ ನಂತರವೂ ಮುಂದುವರಿಯಲಿದ್ದು, ಅಡಚಣೆ ಇಲ್ಲದ ಪ್ರಯಾಣದ ಅನುಭವವನ್ನು ಪ್ರಯಾಣಿಕರಿಗೆ ನೀಡಲು ತೀರ್ಮಾನಿಸಿರುವುದಾಗಿ ಬಿಐಎಎಲ್ ಹೇಳಿಕೊಂಡಿದೆ.
