ಬಿಬಿಎಂಪಿ ಕೌನ್ಸಿಲರ್​ಗಳ ಸಂಖ್ಯೆ 243ಕ್ಕೆ ಏರಿಕೆ: ನಗರಾಭಿವೃದ್ಧಿ ಇಲಾಖೆ ಅಧಿಸೂಚನೆ

ಬೆಂಗಳೂರು : ಬಿಬಿಎಂಪಿ ಕೌನ್ಸಿಲರ್​ಗಳ ಸಂಖ್ಯೆಯನ್ನು 243ಕ್ಕೆ ನಿಗದಿ ಹಾಗೂ ವಾರ್ಡ್​ಗಳ ಮರು ವಿಂಗಡಣಾ ಸಮಿತಿ ರಚಿಸಿ ನಗರಾಭಿವೃದ್ಧಿ ಇಲಾಖೆ ಅಧಿಸೂಚನೆ ಹೊರಡಿಸಿದೆ.

1976ರ ಕರ್ನಾಟಕ ಮಹಾನಗರ ಪಾಲಿಕೆಗಳ ಅಧಿನಿಯಮ 7ನೇ ಪ್ರಕರಣದಡಿ ಬಿಬಿಎಂಪಿಗೆ ಕೌನ್ಸಿಲರ್​ಗಳ ಸಂಖ್ಯೆ ಹೆಚ್ಚಿಸಲಾಗಿದೆ. ವಾರ್ಡ್ ಮರು ವಿಂಗಡಣೆಗೆ ಪಾಲಿಕೆ ಆಯುಕ್ತ, ಬೆಂ. ನಗರ ಜಿಲ್ಲಾಧಿಕಾರಿ, ಬಿಡಿಎ ಆಯುಕ್ತ ಹಾಗೂ ಬಿಬಿಎಂಪಿ ಕಂದಾಯ ವಿಭಾಗದ ವಿಶೇಷ ಆಯುಕ್ತರು ಸೇರಿ 4 ಜನರನ್ನೊಳಗೊಂಡ ಸಮಿತಿ ರಚನೆ ಮಾಡಿ, ನಗರಾಭಿವೃದ್ಧಿ ಇಲಾಖೆ ಸರ್ಕಾರದ ಕಾರ್ಯದರ್ಶಿ ಕೆ.ಎ. ಹಿದಾಯತ್ ಉಲ್ಲಾ ಬುಧವಾರ ಅಧಿಸೂಚನೆ ಹೊರಡಿಸಿದ್ದಾರೆ.

ಇದನ್ನೂ ಓದಿ: ಅನಧಿಕೃತ ಬಡಾವಣೆಗಳು ನೆಲಸಮ : ಸರ್ಕಾರಿ ಭೂಮಿ ಸೇರಿ 14.38 ಎಕರೆ ಜಮೀನು ವಶಕ್ಕೆ

ಜನಗಣತಿ ನಡೆದರೆ ಚುನಾವಣೆ ಮುಂದಕ್ಕೆ: ಬಿಬಿಎಂಪಿ ವಾರ್ಡ್​ಗಳನ್ನು ಕನಿಷ್ಠ 225ರಿಂದ ಗರಿಷ್ಠ 250 ಮೀರದಂತೆ ರಚಿಸಲು ಸರ್ಕಾರ ಅವಕಾಶ ಕಲ್ಪಿಸಿತ್ತು. ಈಗ ಕೌನ್ಸಿಲರ್​ಗಳ ಸಂಖ್ಯೆಯನ್ನು 243ಕ್ಕೆ ನಿಗದಿಯಾಗಿರುವುದರಿಂದ ಆ ಕಾರ್ಯಕ್ಕೆ ಸ್ಪಷ್ಟ ರೂಪ ಲಭಿಸಿದೆ. ವಾರ್ಡ್​ಗಳ ಮರುವಿಂಗಡಣಾ ಸಮಿತಿಗೆ 6 ತಿಂಗಳ ಕಾಲಾವಕಾಶ ನೀಡಿದೆ. ಇದಾದ ನಂತರ ವಾರ್ಡ್​ಗಳಿಗೆ ಮೀಸಲಾತಿ ಪಟ್ಟಿ ಬಿಡುಗಡೆ ಮಾಡಲು ಕನಿಷ್ಠ 3 ತಿಂಗಳ ಕಾಲಾವಕಾಶ ಅಗತ್ಯವಿದೆ. ಇನ್ನೆರಡು ಕಳೆದರೆ 2021ರ ಜನಗಣತಿ ಆರಂಭವಾಗಲಿದೆ. ನಂತರ, ಬೆಂಗಳೂರಿನ ಸರ್ವತೋಮುಖ ಅಭಿವೃದ್ಧಿಗೆ ಹೊಸ ಜನಗಣತಿ ಆಧರಿಸಿ ಚುನಾವಣೆ ನಡೆಸಬೇಕು ಎಂದು ಸರ್ಕಾರ ನಿರ್ಧರಿಸಿದರೆ ಚುನಾವಣೆ ಕನಿಷ್ಠ 1 ವರ್ಷ ಮುಂದೂಡಿಕೆಯಾಗುವ ಸಾಧ್ಯತೆಯಿದೆ.

ಇದನ್ನೂ ಓದಿ: ‘ನಿಮ್ಮ ತಂದೆ- ತಾಯಿಗೆ ವಯಸ್ಸಾಗಿದ್ದು, 2.5 ಲಕ್ಷ ಪಾವತಿಸಿದ್ರೆ ಖಾಸಗಿ ಆಸ್ಪತ್ರೇಲಿ ಚೆನ್ನಾಗಿ ಚಿಕಿತ್ಸೆ ಕೊಡ್ತಾರೆ’!

ಹಣ ನೀರಲ್ಲಿ ಹೋಮ : ಬಿಬಿಎಂಪಿ ಸದಸ್ಯರ ಆಡಳಿತ ಸೆ.10ಕ್ಕೆ ಪೂರ್ಣಗೊಂಡ ಹಿನ್ನೆಲೆಯಲ್ಲಿ ಕಾಂಗ್ರೆಸ್​ನ ಕೆಲವು ನಾಯಕರು ಚುನಾವಣೆ ವಿಳಂಬವಾಗುತ್ತಿರುವ ಕುರಿತು ಸಾರ್ವಜನಿಕ ಹಿತಾಸಕ್ತಿ ಅರ್ಜಿಯನ್ನು ಸಲ್ಲಿಸಿದ್ದರು. ಚುನಾವಣೆ ವಿಳಂಬದ ಕುರಿತು ನ್ಯಾಯಾಲಯದ ಚಾಟಿಯಿಂದ ತಪ್ಪಿಸಿಕೊಳ್ಳಲು 198 ವಾರ್ಡ್​ಗಳ ವಿಂಗಡಣೆ ಮಾಡಿತ್ತು. ನಂತರ, ವಾರ್ಡ್​ಗಳ ಮೀಸಲಾತಿ ಪಟ್ಟಿಯನ್ನು ಕೂಡ ರಚಿಸಿತು. ಜತೆಗೆ, ರಾಜ್ಯ ಚುನಾವಣಾ ಆಯೋಗದಿಂದ ಜ.2020ರ ಆಧಾರಕ್ಕೆ ಅನುಗುಣವಾಗಿ ನ.30ರೊಳಗೆ ವಾರ್ಡ್​ವಾರು ಮತದಾರರ ಪಟ್ಟಿ ರಚಿಸಿ ಅಂತಿಮ ಪಟ್ಟಿ ರಚನೆ ಮಾಡಲು ಮುಂದಾಗಿತ್ತು. ಈ ಕಾರ್ಯಗಳಿಗೆ ಸರ್ಕಾರದಿಂದ ವೆಚ್ಚ ಕೋಟ್ಯಂತರ ರೂ. ವೆಚ್ಚ ಮಾಡಲಾಗಿದ್ದು. ಈ ಹಣ ನೀರಲ್ಲಿ ಹೋಮ ಮಾಡಿದಂತಾಗಿದೆ.

ಇದನ್ನೂ ಓದಿ: ‘ಸಾರ್ವಜನಿಕರ ಆರೋಪಗಳಿಗೆ ಯಾವುದೇ ಆಧಾರಗಳಿರುವುದಿಲ್ಲ, ತನಿಖೆ ಮಾಡಿದರೆ ಸಮಯ ವ್ಯರ್ಥ’!

ವಾರ್ಡ್ ಪುನರ್​ವಿಂಗಡಣಾ ಸಮಿತಿ: ಬಿಬಿಎಂಪಿ ಆಯುಕ್ತ ಎನ್. ಮಂಜುನಾಥ್ ಪ್ರಸಾದ್ ಸಮಿತಿಯ ಅಧ್ಯಕ್ಷರಾಗಿದ್ದಾರೆ. ಬೆಂಗಳೂರು ನಗರ ಜಿಲ್ಲಾಧಿಕಾರಿ ಶಿವಮೂರ್ತಿ ಹಾಗೂ ಬಿಡಿಎ ಆಯುಕ್ತ ಮಹದೇವ್ ಮತ್ತು ಬಿಬಿಎಂಪಿ ವಿಶೇಷ ಆಯುಕ್ತ ಎಸ್. ಬಸವರಾಜ್ ಸಮಿತಿಯ ಸದಸ್ಯರಾಗಿದ್ದಾರೆ.

https://www.vijayavani.net/ccb-questions-shivaprakashs-parents/