ಬೆಂ.ಗ್ರಾಮಾಂತರ ಜಿಲ್ಲೆಯಲ್ಲಿ ಕ್ಷಯರೋಗಿಗಳ ದತ್ತು!; 2025ರೊಳಗೆ ಕ್ಷಯಮುಕ್ತ ಭಾರತ ನಿರ್ಮಾಣ ಗುರಿ

| ಶಿವರಾಜ ಎಂ. ಬೆಂಗಳೂರು ಗ್ರಾಮಾಂತರ

ಸಂಪೂರ್ಣವಾಗಿ ಗುಣವಾಗುವ, ಆದರೂ ಪ್ರಾಣಕ್ಕೆ ಮಾರಕವಾಗಬಹುದಾದ ಕ್ಷಯರೋಗ ನಿಮೂಲನೆಗೆ ಪಣತೊಟ್ಟಿರುವ ಜಿಲ್ಲಾ ಆರೋಗ್ಯ ಇಲಾಖೆ ರೋಗಿಗಳ ದತ್ತು ಸ್ವೀಕಾರದಂಥ ಹೊಸ ಕಾರ್ಯಕ್ರಮವೊಂದಕ್ಕೆ ಮುನ್ನುಡಿ ಬರೆದಿದೆ. ಇದು ರಾಜ್ಯ ಆರೋಗ್ಯ ಇಲಾಖೆಯ ಗಮನ ಸೆಳೆದಿದ್ದು, ರಾಜ್ಯಾದ್ಯಂತ ವಿಸ್ತರಿಸಲು ರಾಜ್ಯ ಕ್ಷಯರೋಗ ಘಟಕ ಮುಂದಾಗಿದೆ. ಜಿಲ್ಲೆಯಲ್ಲಿ 421 ರೋಗಿಗಳು ಚಿಕಿತ್ಸೆ ಪಡೆಯುತ್ತಿದ್ದಾರೆ. ಇವರಲ್ಲಿ ಶೇ.65 ಮಂದಿ ಬಡತನ ರೇಖೆಗಿಂತ ಕೆಳಗಿರುವವರು. ಈಗಾಗಲೆ 6 ತಿಂಗಳ ಅವಧಿಗೆ 32 ರೋಗಿಗಳನ್ನು ದತ್ತು ಪಡೆಯಲಾಗಿದೆ. ದಾನಿಗಳು 1 ತಿಂಗಳ ಮಟ್ಟಿಗೆ 60 ರೋಗಿಗಳಿಗೆ ಸಹಾಯಹಸ್ತ ಚಾಚಿದ್ದಾರೆ.

6 ತಿಂಗಳ ಪಾಲನೆ ಹೊಣೆ: ಕ್ಷಯಕ್ಕೆ ಉಚಿತ ಔಷಧ ನೀಡಲಾಗುತ್ತಿದೆ. ಜತೆಗೆ ಪ್ರತಿ ತಿಂಗಳು 500 ರೂ. ಗೌರವಧನ ನೀಡಲಾಗುತ್ತಿದೆ. ಆದರೆ ಇಂಥ ರೋಗಿಗಳು ಔಷಧೋಪಚಾರಕ್ಕೆ ಸ್ಪಂದಿಸಲು ಪ್ರಮುಖವಾಗಿ ಪೌಷ್ಟಿಕಾಂಶಯುಕ್ತ ಆಹಾರ ಪದ್ಧತಿ ಆವಶ್ಯಕ. ಈ ದೃಷ್ಟಿಯಿಂದ ಸರ್ಕಾರ ನೀಡುವ ಅತ್ಯಲ್ಪ ಗೌರವಧನ ಸಾಲುವುದಿಲ್ಲ. ರೋಗ ತಗುಲಿದ ವ್ಯಕ್ತಿಗೆ ಕನಿಷ್ಠ 6 ತಿಂಗಳು ಚಿಕಿತ್ಸೆ ನೀಡಬೇಕು. ದತ್ತು ಸ್ವೀಕರಿಸಿದವರು ಅಷ್ಟೂ ದಿನದವರೆಗೆ ರೋಗಿಗಳ ಪಾಲನೆ ಹೊಣೆ ಹೊರುತ್ತಾರೆ. ಇದರಿಂದ ಸೋಂಕಿತರು ಸಂಪೂರ್ಣ ಗುಣಮುಖರಾಗಲು ಸಾಧ್ಯವಾಗುತ್ತದೆ ಎಂಬುದು ಇಲಾಖೆ ಅಭಿಪ್ರಾಯವಾಗಿದೆ.

ಪಂಚಾಯಿತಿವಾರು ಕಾರ್ಯಕ್ರಮ: ಪ್ರತಿ ಪಂಚಾಯಿತಿವಾರು ಕಾರ್ಯಕ್ರಮ ಆಯೋಜಿಸುತ್ತಿದ್ದು, ಜನಪ್ರತಿನಿಧಿಗಳಿಂದ ಹಿಡಿದು, ಕೈಗಾರಿಕೋದ್ಯಮಿಗಳು ಮತ್ತಿತರ ದಾನಿಗಳ ಗಮನಸೆಳೆಯಲು ಯತ್ನಿಸಲಾಗುತ್ತಿದೆ. ಆರ್ಥಿಕ ನೆರವು ಪಡೆದು ದವಸ-ಧಾನ್ಯದ ಆಹಾರಕಿಟ್ ರೂಪದಲ್ಲಿ ರೋಗಿಗಳ ಮನೆಬಾಗಿಲಿಗೇ ತಲುಪಿಸುವ ಕಾರ್ಯವನ್ನು ಇಲಾಖೆ ಆರಂಭಿಸಿದೆ.

https://www.vijayavani.net/rrr-movie-release-postponed-again/

https://www.vijayavani.net/corona-cases-crossed-thousand-mark-again-after-three-and-half-months/