ಪತ್ನಿಯ ತಂಗಿಯನ್ನೇ ಪ್ರೇಮಿಸಿದ, ಮದ್ವೆ ಆಗ್ತೀನಂತ ಪತ್ನಿಗೆ ಹಿಂಸಿಸಿದ... ನಾದಿನಿಗಾಗಿ ಹಾತೊರೆದವ ಮಾಡಬಾರದ್ದು ಮಾಡಿ ಸಿಕ್ಕಿಬಿದ್ದ!

ಬೆಂಗಳೂರು: ಇಲ್ಲೊಬ್ಬ ಪಾಪಿ ಪತ್ನಿ ಇದ್ದರೂ ನಾದಿನಿಯನ್ನ ಮದುವೆ ಆಗುವ ದುರಾಸೆಯಲ್ಲಿ ಮಾಡಬಾರದ ಕೆಲಸ ಮಾಡಿ ಸಿಕ್ಕಿಬಿದ್ದಿದ್ದಾನೆ.

ಕೊಡಿಗೇಹಳ್ಳಿ ನಿವಾಸಿ 32 ವರ್ಷ ದೇವರಾಜ್​ಗೆ ನಾಲ್ಕು ವರ್ಷದ ಹಿಂದೆಯೇ ಮದುವೆ ಆಗಿದೆ. ನಗರದಲ್ಲಿ ಕೋಳಿ ವ್ಯಾಪಾರ ಮಾಡಿಕೊಂಡಿದ್ದ ದೇವರಾಜ್​, ತನ್ನ ಪತ್ನಿಯ ತಂಗಿ ಮಮತಾ ಎಂಬಾಕೆಯನ್ನು ಪ್ರೀತಿಸುತ್ತಿದ್ದ. ಅಕ್ಕನ ಗಂಡನ ಮೇಲೆ ನಾದಿನಿಯೂ ಆಕರ್ಷಿತಳಾಗಿದ್ದಳು. ಪತ್ನಿಗೆ ಕಿರುಕುಳ ಕೊಡುತ್ತಿದ್ದ ದೇವರಾಜ್​, ನಿನ್ನ ತಂಗಿಯನ್ನು 2ನೇ ಮದುವೆಯಾಗುತ್ತೇನೆ ಎಂದು ಹಠ ಹಿಡಿದಿದ್ದ. ಈ ವಿಚಾರ ಮನೆಯವರ ಗಮನಕ್ಕೆ ಬಂದು ಮಮತಾಗೆ ಬುದ್ಧಿಮಾತು ಹೇಳಿದ್ದರು. ನಂತರ ದೇವರಾಜ್​ ಜತೆ ಮಮತಾ ಅಂತರ ಕಾಯ್ದುಕೊಂಡಿದ್ದಳು. 3 ತಿಂಗಳಿನಿಂದ ಸಹಕಾರನಗರದ ಚಿಕ್ಕಪ್ಪನ ಮನೆಯಲ್ಲಿದ್ದುಕೊಂಡು ಮಾಲ್​ನಲ್ಲಿ ಕೆಲಸ ಮಾಡುತ್ತಿದ್ದಳು. ಆದರೆ, ದೇವರಾಜ್​ ಆಕೆಯನ್ನು ವಿವಾಹವಾಗಲು ಹಂಬಲಿಸುತ್ತಿದ್ದ.

ಅದಕ್ಕಾಗಿ ತನ್ನ ಸಹಚರರಾದ ಕುಮಾರ್​ ಮತ್ತು ನವೀನ್​ ಜತೆ ಸೇರಿ ಆಕೆಯನ್ನು ಅಪಹರಿಸಿ ವಿವಾಹವಾಗಲು ಸಂಚು ರೂಪಿಸಿದ್ದ. ಜ.22ರಂದು ರಾತ್ರಿ 10.30ರಲ್ಲಿ ಮಮತಾ ಕೆಲಸ ಮುಗಿಸಿಕೊಂಡು ಸಹಪಾಠಿ ಅಭಿಷೇಕ್​ ಜತೆ ಸ್ಕೂಟರ್​ನಲ್ಲಿ ಮನೆಗೆ ವಾಪಾಸ್ಸಾಗುತ್ತಿದ್ದಾಗ ಮಾರ್ಗಮಧ್ಯೆ ಕೊಡಿಗೇಹಳ್ಳಿಯ ಅಪಾರ್ಟ್​ಮೆಂಟ್​ವೊಂದರ​ ಮುಂಭಾಗ ಬಲವಂತವಾಗಿ ಕಾರಿನಲ್ಲಿ ಅಪಹರಿಸಿದ್ದರು. ಅಭಿಷೇಕ್​ ಪ್ರತಿರೋಧ ತೋರಿದಾಗ ಕುಮಾರ್​ ಮತ್ತು ನವೀನ್​ ಆತನಿಗೆ ಹಲ್ಲೆ ನಡೆಸಿ ಪರಾರಿಯಾಗಿದ್ದರು.

ಈ ಬಗ್ಗೆ ಮಮತಾಳ ತಂದೆ ಮುನಿಸ್ವಾಮಿಗೆ ಅಭಿಷೇಕ್​ ವಿವರಿಸಿದ್ದ. ಮುನಿಸ್ವಾಮಿ ಕೊಡಿಗೇಹಳ್ಳಿ ಪೊಲೀಸ್​ ಠಾಣೆಗೆ ದೂರು ನೀಡಿದ್ದರು. ಪ್ರಕರಣ ದಾಖಲಿಸಿಕೊಂಡ ಪೊಲೀಸರು ಕೃತ್ಯ ನಡೆದ ಆಸುಪಾಸಿನಲ್ಲಿದ್ದ ಸಿಸಿ ಕ್ಯಾಮರಾ ಪರಿಶೀಲಿಸಿದಾಗ, ಮಮತಾಳನ್ನು ದೇವರಾಜ್​ ಅಪಹರಿಸುವ ದೃಶ್ಯ ಕಂಡು ಬಂದಿತ್ತು. ಕೂಡಲೇ ಟವರ್​ ಲೊಕೇಶನ್​ ಮೂಲಕ ದೇವರಾಜ್​ ಮೊಬೈಲ್​ ಕಾರ್ಯ ನಿರ್ವಹಿಸುವ ಪ್ರದೇಶವನ್ನು ಪರಿಶೀಲಿಸಿದಾಗ ಆತ ಅರಸೀಕೆರೆಯಲ್ಲಿರುವ ಸುಳಿವು ಸಿಕ್ಕಿತ್ತು. ಸೋಮವಾರ ಬೆಳಗ್ಗೆ ಅರಿಸೀಕೆರೆಗೆ ತೆರಳಿದ ಪೊಲೀಸರ ತಂಡ ದೇವರಾಜ್​ ಹಾಗೂ ಈತನ ಸಹಚರರಾದ ಕುಮಾರ್​ (33) ಹಾಗೂ ನವೀನ್​ (31) ಸೇರಿ ಮೂವರನ್ನು ಬಂಧಿಸಿ ಜೈಲಿಗಟ್ಟಿದ್ದಾರೆ. ಮಮತಾಳನ್ನು ರಕ್ಷಣೆ ಮಾಡಿ ಆಕೆಯ ಪಾಲಕರಿಗೆ ಒಪ್ಪಿಸಿದ್ದಾರೆ.

https://www.vijayavani.net/a-headmaster-romance-with-a-student-at-school-hd-kote/

https://www.vijayavani.net/a-mandya-ananda-case-channapattana/

https://www.vijayavani.net/a-hosanagra-police-girl-acused-police-arrest/