ಬೆಂಗಳೂರು ಉತ್ತರ ಜಿಲ್ಲಾ ಬಿಜೆಪಿ ಪ್ರಧಾನ ಕಾರ್ಯದರ್ಶಿಯಾಗಿದ್ದ ಅನಂತರಾಜು, ಮೇ 12ರಂದು ಮನೆಯಲ್ಲಿ ನೇಣು ಬಿಗಿದುಕೊಂಡು ಆತ್ಮಹತ್ಯೆ ಮಾಡಿಕೊಂಡಿದ್ದರು. ಥೈರಾಯಿಡ್ ಸಮಸ್ಯೆಯಿಂದ ಸಾವಿನ ನಿರ್ಧರಕ್ಕೆ ಬಂದಿದ್ದಾರೆ ಎಂದು ಮೊದಲು ದೂರು ನೀಡಲಾಗಿತ್ತು. ಆನಂತರ ಪತ್ನಿ ಸುಮಾ, ನನ್ನ ಗಂಡನನ್ನು ಹನಿಟ್ರ್ಯಾಪ್ ಮಾಡಿ ಕೊಂದಿದ್ದಾರೆ. ಕೆ.ಆರ್. ಪುರದ ರೇಖಾ, ಈಕೆಯ ಪತಿ ವಿನೋದ್ ಮತ್ತು ಸ್ನೇಹಿತೆ ಸ್ಪಂದನಾಳ ಕಿರುಕುಳ ಸಹಿಸಲಾಗದೆ ನನ್ನ ಗಂಡ ಸತ್ತಿದ್ದಾರೆ ಎಂದು ದೂರು ನೀಡಿದ್ದರು. ಇದರ ಆಧಾರದ ಮೇಲೆ ರೇಖಾಳನ್ನು ಪೊಲೀಸರು ಬಂಧಿಸಿದ್ದರು. ಇಷ್ಟೆಲ್ಲಾ ಬೆಳವಣಿಗೆ ನಡುವೆ ಬುಧವಾರ ಆಡಿಯೋವೊಂದು ವೈರಲ್ ಆಗಿತ್ತು. ‘ನಾನೇ ಅನಂತರಾಜುಗೆ ಟಾರ್ಚರ್ ಕೊಟ್ಟು ಸಾಯ್ತೀನಿ. ನಾನು ಕೊಡೋ ಟಾರ್ಚರ್ಗೆ ಹಾರ್ಟ್ಅಟ್ಯಾಕ್ ಆಗಿ ಅವನು ಸಾಯ್ಬೇಕು' ಎಂದು ಫೋನ್ನಲ್ಲಿ ರೇಖಾಗೆ ಸುಮಾ ಆಕ್ರೋಶದಿಂದ ಹೇಳುತ್ತಾ ಗಂಡನಿಗೆ ಬೈಯ್ಯುತ್ತಾ ಹೊಡೆಯುತ್ತಿದ್ದ ಹಿನ್ನೆಲೆ ಈ ಆಡಿಯೋದಲ್ಲಿತ್ತು. 'ಪ್ಲೀಸ್ ಸುಮಾ… ಅವರಿಗೆ ಏನೂ ಮಾಡ್ಬೇಡ ಸುಮಾ, ನಿನ್ನ ಕಾಲು ಹಿಡ್ಕೋತೀನಿ ಸುಮಾ, ಐ ವೆರಿ ಸಾರಿ ಸುಮಾ, ನಾನು ದೂರ ಇರ್ತೀನಿ. ಪ್ಲೀಸ್ ಸುಮಾ ಅವರಿಗೆ ಏನು ಮಾಡ್ಬೇಡ' ಎಂದು ರೇಖಾ ಕಣ್ಣೀರು ಹಾಕುತ್ತಾ ಗೋಗರೆದರೂ ಸುಮಾ, 'ಅವನು ಸಾಯಬೇಕು' ಎನ್ನುವುದು ಆಡಿಯೋದಲ್ಲಿದೆ. ಇದರ ಬೆನ್ನಲ್ಲೇ 2ನೇ ಆಡಿಯೋ ವೈರಲ್ ಆಗಿದ್ದು, ಇದು ಕೂಡ ಅನಂತರಾಜ್ ಪತ್ನಿ ಸುಮಾ ಮತ್ತು ರೇಖಾ ನಡುವಿನ ಸಂಭಾಷಣೆ ಎನ್ನಲಾಗಿದೆ.
