ವಿಷಾನಿಲ ಸೇವಿಸಿ ಮಂಗಳೂರು ಮೂಲದ ದಂತ ವೈದ್ಯ ಸಾವು

ಬೆಂಗಳೂರು: ಕ್ಲಿನಿಕ್​ನಲ್ಲಿ ಜನರೇಟರ್ ಹೊಗೆ (ಕಾರ್ಬನ್ ಮಾನಾಕ್ಸೈಡ್) ಸೇವಿಸಿ ದಂತ ವೈದ್ಯ ಮೃತಪಟ್ಟಿರುವ ಪ್ರಕರಣ ತಡವಾಗಿ ಬೆಳಕಿಗೆ ಬಂದಿದೆ. ಮಂಗಳೂರು ಮೂಲದ ದಂತ ವೈದ್ಯ ಡಾ. ನಿತಿನ್ ಶೆಟ್ಟಿ (26) ಮೃತರು. ಸರ್ಜಾಪುರ ರಸ್ತೆಯಲ್ಲಿರುವ ಪಾರ್ಥ ಡೆಂಟಲ್ ಕ್ಲಿನಿಕ್ ಮಾಲೀಕ ಡಾ. ವಿಜಯ್ ಆನಂದ್ ಮತ್ತು ಅಧಿಕಾರಿ ಡಾ. ವೇಣು ಜಯರಾಮ್ ವಿರುದ್ಧ ಪ್ರಕರಣ ದಾಖಲಿಸಲಾಗಿದೆ ಎಂದು ಪೊಲೀಸರು ಹೇಳಿದ್ದಾರೆ.

4 ತಿಂಗಳ ಹಿಂದಷ್ಟೇ ವಿವಾಹವಾಗಿದ್ದ ನಿತಿನ್, ಪತ್ನಿ ಜತೆ ನಗರದಲ್ಲಿ ವಾಸಿಸುತ್ತಿದ್ದರು. ಪಾರ್ಥ ಡೆಂಟಲ್ ಕ್ಲಿನಿಕ್​ನಲ್ಲಿ ಡೆಂಟಿಸ್ಟ್ ಆಗಿದ್ದರು. ಕರೊನಾ ಲಾಕ್​ಡೌನ್ ಹಿನ್ನೆಲೆಯಲ್ಲಿ ಕ್ಲಿನಿಕ್ ಮುಚ್ಚಲಾಗಿತ್ತು. ಲಾಕ್​ಡೌನ್ ಸಡಿಲಿಕೆ ಬಳಿಕ ಮೇ 21ರಂದು ಬೆಳಗ್ಗೆ 9 ಗಂಟೆಗೆ ಕ್ಲಿನಿಕ್ ತೆರೆದಿದ್ದು, ವಿದ್ಯುತ್ ಇಲ್ಲದ ಕಾರಣ ಜನರೇಟರ್ ಅನ್ ಮಾಡಿದ್ದರು.

ಇದನ್ನೂ ಓದಿ:  ಜಡ್ಜ್​ಗಳ ವಸತಿಗೃಹದಲ್ಲಿ ಕಳವು

ಮಧ್ಯಾಹ್ನ ಊಟ ಮಾಡಿ ಕ್ಲಿನಿಕ್​ನಲ್ಲಿ ನಿದ್ದೆಗೆ ಜಾರಿದಾಗ ಜನರೇಟರ್​ನಿಂದ ಬಂದಿರುವ ಕಾರ್ಬನ್ ಮಾನಾಕ್ಸ್ಸೈಡ್ ಸೇವಿಸಿದ್ದಾರೆ. ರಾತ್ರಿ 7 ಗಂಟೆಯಾದರೂ ನಿತಿನ್ ಮನೆ ಬಂದಿರಲಿಲ್ಲ. ಪತ್ನಿ ಕರೆ ಮಾಡಿದಾಗ ಸ್ವೀಕರಿಸಿಲ್ಲ. ಆತಂಕಗೊಂಡ ಪತ್ನಿ, ತನ್ನ ಸಹೋದರನಿಗೆ ಕರೆ ಮಾಡಿ ವಿಷಯ ಮುಟ್ಟಿಸಿದ್ದಾರೆ. ರಾತ್ರಿ 9.30ಕ್ಕೆ ಕ್ಲಿನಿಕ್​ಗೆ ಬಂದು ನೋಡಿದಾಗ ಆಪರೇಷನ್ ಕೊಠಡಿಯಲ್ಲಿ ಪ್ರಜ್ಞಾಹೀನ ಸ್ಥಿತಿಯಲ್ಲಿ ನಿತಿನ್ ಬಿದ್ದಿದ್ದರು. ತಕ್ಷಣ ಕೊಲಂಬಿಯಾ ಏಷ್ಯಾ ಆಸ್ಪತ್ರೆಗೆ ದಾಖಲಿಸಿದ್ದು, ನಿತಿನ್​ರನ್ನು ಪರೀಕ್ಷಿಸಿದ ವೈದ್ಯರು ಮೃತಪಟ್ಟಿರುವುದು ದೃಢಪಡಿಸಿದ್ದಾರೆ ಎಂದು ಬೆಳ್ಳಂದೂರು ಠಾಣೆ ಪೊಲೀಸರು ತಿಳಿಸಿದ್ದಾರೆ.

https://www.vijayavani.net/padarayanapura-corporator-imran-pasha-in-police-custody/