ಕೆಮ್ಮಿನ ಸಿರಪ್, ಸೈಕೋಟ್ರೋಪಿಕ್ ಔಷಧ ಸೇಲ್​ಗೆ ಬ್ರೇಕ್: ವೈದ್ಯರ ಚೀಟಿ ಇಲ್ಲದೆ ಮಾರಿದರೆ ಶಿಕ್ಷೆ

| ಕೀರ್ತಿನಾರಾಯಣ ಸಿ. ಬೆಂಗಳೂರು

ಔಷಧ ಅಂಗಡಿಗಳಲ್ಲಿ ವೈದ್ಯರ ಚೀಟಿ ಇಲ್ಲದೆ ಕೆಮ್ಮಿನ ಸಿರಪ್, ಸೈಕೋಟ್ರೋಪಿಕ್ (ಮಾನಸಿಕ ಖಿನ್ನತೆ) ಔಷಧಗಳ ಮಾರಾಟ ಹಾಗೂ ಸ್ಟೇಷನರಿ ಅಂಗಡಿಗಳಲ್ಲಿ ಅಪ್ರಾಪ್ತರಿಗೆ ಲಿಕ್ವಿಡ್ ಎರೇಸರ್​ಗಳ ಮಾರಾಟಕ್ಕೆ ಇನ್ನುಮುಂದೆ ಕಡಿವಾಣ ಬೀಳಲಿದೆ. ಇವನ್ನು ಅಕ್ರಮವಾಗಿ ಮಾರಾಟ ಮಾಡುವ ಮೆಡಿಕಲ್ ಶಾಪ್​ಗಳ ವಿರುದ್ಧ ಡ್ರಗ್ಸ್ ಕಂಟ್ರೋಲರ್ ಮೂಲಕ ಶಿಕ್ಷಾರ್ಹ ಕ್ರಮಗಳನ್ನು ಕೈಗೊಳ್ಳುವಂತೆ ರಾಜ್ಯ ಪೊಲೀಸ್ ಮಹಾನಿರ್ದೇಶಕ ಡಾ.ಅಲೋಕ್ ಮೋಹನ್ ಪೊಲೀಸರಿಗೆ ಸೂಚನೆ ನೀಡಿದ್ದಾರೆ. ಕೋವಿಡ್ ಮತ್ತು ವಿಧಾನಸಭೆ ಚುನಾವಣೆ ಹಿನ್ನೆಲೆಯಲ್ಲಿ ಕಾನೂನು ಮತ್ತು ಸುವ್ಯವಸ್ಥೆಯ ಕರ್ತವ್ಯಗಳಿಂದಾಗಿ ಡ್ರಗ್ಸ್ ಸಮಸ್ಯೆಗಳ ಬಗ್ಗೆ ಪೊಲೀಸರು ಹೆಚ್ಚಿನ ಗಮನಹರಿಸದಿರುವುದು ಕಂಡುಬಂದಿದೆ. ಮಾದಕ ದ್ರವ್ಯಗಳ ಅಕ್ರಮ ಸಾಗಣೆ ತಡೆಗಟ್ಟುವಿಕೆ ಮತ್ತು ಸೈಕೋಟ್ರೋಪಿಕ್ ವಸ್ತುಗಳ ಕಾಯ್ದೆ 1988 (ಪಿಐಟಿ-ಎನ್​ಡಿಪಿಎಸ್) ಹಾಗೂ ಕರ್ನಾಟಕ ಸಂಘಟಿತ ಅಪರಾಧಗಳ ನಿಯಂತ್ರಣ ಕಾಯ್ದೆ 2000 (ಕೋಕಾ) ಕಾಯ್ದೆಯಡಿ ಪ್ರಕರಣ ದಾಖಲಿಸುವ ಮುಖೇನ ಅಕ್ರಮ ಮಾರಾಟ ನಿಯಂತ್ರಣಕ್ಕೆ ಸೂಚಿಸಲಾಗಿದೆ.

ವೈದ್ಯಕೀಯ ಬಳಕೆಯ ಉದ್ದೇಶದಿಂದ ಸೈಕೋಟ್ರೋಪಿಕ್ ಔಷಧಗಳನ್ನು ತಯಾರಿಸಲಾಗುತ್ತದೆ. ಆದರೆ, ಮಾರಾಟ ಪ್ರಕ್ರಿಯೆಯಲ್ಲಿ ಸಮರ್ಪಕ ಮೇಲ್ವಿಚಾರಣೆ ಇಲ್ಲದ ಕಾರಣಕ್ಕೆ ಔಷಧಗಳು ಅಕ್ರಮವಾಗಿ ಬಳಕೆಯಾಗುತ್ತಿರುವುದು ದೃಢಪಟ್ಟಿದೆ. ಹೀಗಾಗಿ ಡ್ರಗ್ಸ್ ಕಂಟ್ರೋಲರ್ ಸಹಾಯ ಪಡೆದು ಔಷಧ ತಯಾರಿಕಾ ಘಟಕಗಳು ಹಾಗೂ ಮಾರಾಟ ಮಳಿಗೆಗಳ ಮೇಲೆ ನಿಯಂತ್ರಣ ಹೇರುವ ಜವಾಬ್ದಾರಿಯನ್ನು ಆಯಾ ಘಟಕಗಳ ಪೊಲೀಸ್ ಅಧಿಕಾರಿಗಳಿಗೆ ನೀಡಿ ಅಲೋಕ್ ಮೋಹನ್ ಆದೇಶಿಸಿದ್ದಾರೆ.

ಏನೆಲ್ಲ ಔಷಧ ಮಾರಾಟ?: ಬಾಡಿ ಬಿಲ್ಡಿಂಗ್​ಗಾಗಿ ಸ್ಟೆರಾಯ್್ಡ ಮಾನಸಿಕ ಖಿನ್ನತೆಗೆ ತೆಗೆದುಕೊಳ್ಳುವ ಮಾತ್ರೆಗಳು, ನೋವು ನಿವಾರಕ ಮಾತ್ರೆ/ಇಂಜೆಕ್ಷನ್​ಗಳು, ನಿದ್ರೆಮಾತ್ರೆಗಳು ಹಾಗೂ ಸ್ಟೇಷನರಿ ಅಂಗಡಿಗಳಲ್ಲಿ ದ್ರವರೂಪದ ಪದಾರ್ಥಗಳ ಮಾರಾಟ.

ಅಕ್ರಮ ಮಾರಾಟ ಏಕೆ?

• ಔಷಧ/ಮಾತ್ರೆಗಳ ಮೇಲಿನ ಎಂಆರ್​ಪಿಗಿಂತ ಹೆಚ್ಚು ಹಣ ಪಡೆದು ಮಾರಾಟ
• ಬಾಡಿ ಬಿಲ್ಡಿಂಗ್​ಗಾಗಿ ಸ್ಟೆರಾಯ್್ಡಳು, ಕೆಲ ಮಾತ್ರೆಗಳ ಹೆಚ್ಚು ಮಾರಾಟ ಕಾರಣಕ್ಕೆ

ಮೆಡಿಕಲ್ ಶಾಪ್​ಗಳಿಗೆ ಸೂಚನೆ

• ಸ್ಥಳೀಯ ಪೊಲೀಸರು ವಿತರಿಸಿರುವ ನೋಟಿಸನ್ನು ಮಳಿಗೆ ಮುಂಭಾಗ ಅಂಟಿಸಿ.
• ವೈದ್ಯರ ಚೀಟಿ ಇಲ್ಲದೆ ಔಷಧ ಕೊಡುವಂತೆ ಒತ್ತಾಯಿಸಿದರೆ ಪೊಲೀಸರ ಗಮನಕ್ಕೆ ತನ್ನಿ.
• ಫೆವಿಕ್ವಿಕ್, ಸಲ್ಯುಷನ್​ನಂತ ಲಿಕ್ವಿಡ್ ಉತ್ಪನ್ನವನ್ನು ಅಪ್ರಾಪ್ತರು ಕೇಳಿದರೆ ಬುದ್ಧಿವಾದ ಹೇಳಿ ಕಳಿಸಿ.

ಡಿಜಿಪಿ ಆದೇಶವೇನು?

• ಕೆಮ್ಮಿನ ಸಿರಪ್ ಮತ್ತು ಇತರ ಸೈಕೋಟ್ರೋಪಿಕ್ ಔಷಧಗಳ ಅಕ್ರಮ ಮಾರಾಟ ಕಂಡುಬಂದರೆ ಔಷಧ ನಿಯಂತ್ರಕರು ಹಾಗೂ ಆರೋಗ್ಯ ಇಲಾಖೆ ಅಧಿಕಾರಿಗಳ ಗಮನಕ್ಕೆ ತರಬೇಕು.
• ಸ್ಟೇಷನರಿ ಅಂಗಡಿಗಳಲ್ಲಿ ಲಿಕ್ವಿಡ್ ಎರೇಸರ್ ಮಾರಾಟವನ್ನು ಗಮನಿಸಬೇಕು. ಎರೇಸರ್​ಗಳನ್ನು ಅಪ್ರಾಪ್ತರಿಗೆ ಮಾರಾಟ ಮಾಡದಂತೆ ಅಂಗಡಿಗಳಿಗೆ ನಿರ್ದೇಶನ ಕೊಡಬೇಕು.
• ನಗರದ ಪ್ರದೇಶಗಳಲ್ಲಿ ತ್ಯಾಜ್ಯ ತೆಗೆಯುವವರು ಹೆಚ್ಚಾಗಿ ಗಾಂಜಾ ಸೇವನೆ ಮಾಡುವವರಿದ್ದಾರೆ. ಅಂತಹ ಪ್ರದೇಶಗಳಲ್ಲಿ ಗಸ್ತು ಹೆಚ್ಚಿಸಬೇಕು.
• ಆಯಾ ಸ್ಥಳೀಯ ಪೊಲೀಸ್ ಠಾಣಾಧಿಕಾರಿಗಳು ನಿರಂತರವಾಗಿ ನಿಗಾ ವಹಿಸುವ ವ್ಯವಸ್ಥೆ ಮಾಡಬೇಕು.
• ಮಾದಕ ವಸ್ತುಗಳ ಮಾರಾಟಗಾರರ ವಿರುದ್ಧ ಗೂಂಡಾ ಕಾಯ್ದೆಯಡಿ ಪ್ರಕರಣ ದಾಖಲಿಸಬೇಕು.

https://www.vijayavani.net/linkedin-restricted-spacex-engineer-kairan-quazis-account-for-age-reason

https://www.vijayavani.net/toyota-plans-electric-car-with-1200-km-range-that-fully-charges-in-10-mins