ಸ್ಟಾರ್ಟಪ್ ಟ್ರಬಲ್: ನಗದು ಇಲ್ಲದೆ ಪರದಾಟ ಮುಚ್ಚುತ್ತಿರುವ ಸಂಸ್ಥೆಗಳು

ನವದೆಹಲಿ: ಕೋವಿಡ್-19 ಲಾಕ್​ಡೌನ್ ಪರಿಣಾಮವಾಗಿ ಸಂಕಷ್ಟ ಎದುರಿಸುತ್ತಿರುವ ವಲಯಗಳಲ್ಲಿ ಸ್ಟಾರ್ಟಪ್ ಕಂಪನಿಗಳೂ ಸೇರಿವೆ. ಶೇ. 62 ಸ್ಟಾರ್ಟಪ್​ಗಳು ಶೇ. 40ಕ್ಕಿಂತ ಹೆಚ್ಚಿನ ಆದಾಯ ಖೋತಾ ಅನುಭವಿಸಿದ್ದು ಶೇ. 30 ಕಂಪನಿಗಳು ಶೇ. 80ರವರೆಗೆ ಆದಾಯ ನಷ್ಟಕ್ಕೊಳಗಾಗಿವೆ. ನಗದು ಕೊರತೆಯಿಂದ ಅವುಗಳು ಗಂಭೀರ ಬಿಕ್ಕಟ್ಟು ಎದುರಿಸುತ್ತಿವೆ. ಸಾಫ್ಟ್​ವೇರ್ ಮತ್ತು ಸೇವಾ ಕಂಪನಿಗಳ ರಾಷ್ಟ್ರೀಯ ಸಂಸ್ಥೆ (ನ್ಯಾಸ್​ಕಾಂ) ನಡೆಸಿರುವ ಆನ್​ಲೈನ್ ಸಮೀಕ್ಷೆಯೊಂದು ಸ್ಟಾರ್ಟಪ್​ಗಳ ಬವಣೆಯನ್ನು ಬಿಚ್ಚಿಟ್ಟಿದೆ. ಕರೊನಾ ಪರಿಣಾಮವಾಗಿ ಈ ವಲಯದ ಕಂಪನಿಗಳು ಅಸ್ತಿತ್ವಕ್ಕಾಗಿ ಹೆಣಗುವಂತಾಗಿದೆ ಎಂದು ನ್ಯಾಸ್​ಕಾಂ ಹೇಳಿದೆ.

ಶೇ. 70 ಕಂಪನಿಗಳು ಮೂರು ತಿಂಗಳಿಗಿಂತ ಕಡಿಮೆ ಅವಧಿಗೆ ಸಾಕಾಗುವಷ್ಟು ನಗದನ್ನು ಮಾತ್ರ ಹೊಂದಿದ್ದು, ನಂತರ ಪರಿಸ್ಥಿತಿ ಬಿಗಡಾಯಿಸುವ ಸಂಭವವಿದೆಯೆಂಬ ಕಳವಳಕಾರಿ ವಿಚಾರವನ್ನು ಸಮೀಕ್ಷೆ ಹೊರಗೆಡವಿದೆ. ಹೊಸ ಕಂಪನಿಯಿಂದ ಹಿಡಿದು ಕ್ಷೇತ್ರದಲ್ಲಿ ಪಳಗಿರುವ ಸಂಸ್ಥೆವರೆಗೆ 250ಕ್ಕೂ ಹೆಚ್ಚು ಕಂಪನಿಗಳು ಸಮೀಕ್ಷೆಯಲ್ಲಿ ಭಾಗವಹಿಸಿದ್ದವು. ಶೇ. 30 ಕಂಪನಿಗಳು ತಮ್ಮ ವ್ಯವಹಾರಗಳನ್ನು ತಾತ್ಕಾಲಿಕವಾಗಿ ಸ್ಥಗಿತಗೊಳಿಸಿವೆ ಎಂದು ‘ಕೋವಿಡ್-19 ಕಾಲದಲ್ಲಿ ಭಾರತೀಯ ಸ್ಟಾರ್ಟಪ್ ಯಂತ್ರದ ಪುನರುಜ್ಜೀವನ’ ಎಂಬ ಶೀರ್ಷಿಕೆಯ ವರದಿಯಲ್ಲಿ ಹೇಳಲಾಗಿದೆ.

62% ಸ್ಟಾರ್ಟಪ್​ಗಳಿಗೆ ಶೇಕಡಾ 40ಕ್ಕಿಂತ ಹೆಚ್ಚಿನ ಆದಾಯ ಖೋತಾ. 

30% ಕಂಪನಿಗಳಿಗೆ ಶೇಕಡಾ

80    ರವರೆಗೆ ಆದಾಯ ನಷ್ಟ.

70% ಸ್ಟಾರ್ಟಪ್​ಗಳು ನಿಯಮ ಸರಳೀಕರಣದ ನಿರೀಕ್ಷೆಯಲ್ಲಿ

69% ಬಿ2ಬಿ ಸ್ಟಾರ್ಟಪ್​ಗಳಿಗೆ ಹಣ ಪಾವತಿ ವಿಳಂಬದಿಂದ ಆತಂಕ

66% ಸ್ಟಾರ್ಟಪ್​ಗಳು ವೈರಸ್ ಪರಿಣಾಮದ ಸನ್ನಿವೇಶ 12 ತಿಂಗಳ ವರೆಗೆ ಮುಂದುವರಿಯಬಹುದೆಂದು ಅಂದಾಜು ಮಾಡಿವೆ.

65% ಸ್ಟಾರ್ಟಪ್​ಗಳು ಮಾರ್ಕೆಟಿಂಗ್ ವೆಚ್ಚವನ್ನು ಕಡಿತ ಮಾಡುತ್ತಿವೆ.

53% ಸ್ಟಾರ್ಟಪ್​ಗಳು ವೇತನ ಕಡಿತ ಮಾಡುತ್ತಿವೆ.

13% ಸ್ಟಾರ್ಟಪ್​ಗಳು ನೌಕರರ ಸಂಖ್ಯೆ ಕಡಿತಕ್ಕೆ ಮುಂದಾಗಿವೆ.

ಇದನ್ನೂ ಓದಿ:  ಕಾಶ್ಮೀರದಲ್ಲೇ ಉಗ್ರ ನೆಲೆ ಸ್ಥಾಪಿಸಲು ಹವಣಿಸುತ್ತಿದೆ ಪಾಕ್​- ಟಿಆರ್​ಎಫ್​, ಟಿಎಂಐ, ಜಿಇಎಚ್​ಗಳು ಎಲ್​ಇಟಿ, ಜೆಇಎಂಗಳ ಹೊಸ ರೂಪ!!!

ಮುಚ್ಚುವ ಆತಂಕ: ಕರೊನಾ ಮಹಾಮಾರಿ ಹಾಗೂ ತತ್ಪರಿಣಾಮ ಹೇರಿದ ಲಾಕ್​ಡೌನ್​ನಿಂದ ತೊಂದರೆಗೊಳಗಾದ ಆರಂಭಿಕ ಹಾಗೂ ಮಧ್ಯಮ ಹಂತದಲ್ಲಿರುವ ಸ್ಟಾರ್ಟ್​ಪ್ಗಳ ಸ್ಥಿತಿಯಂತೂ ಅಯೋಮಯವಾಗಿದೆ ಎಂಬುದು ನ್ಯಾಸ್​ಕಾಂ ಹೇಳಿಕೆ. ಪರಿಸ್ಥಿತಿ ಬೇಗನೇ ಸುಧಾರಿಸದಿದ್ದರೆ ಬಿ2ಸಿ ಸ್ಟಾರ್ಟ್​ಅಪ್​ಗಳು ಮುಚ್ಚುವ ಅಪಾಯ ಎದುರಿಸುತ್ತಿವೆ ಎಂದು ಕಳವಳ ವ್ಯಕ್ತಪಡಿಸಿದೆ.

ಹಣಕಾಸಿನ ನೆರವು ಅಗತ್ಯ: ಬಿ2ಸಿ ಸ್ಟಾರ್ಟಪ್​ಗಳು ತೀವ್ರ ರೀತಿಯಲ್ಲಿ ಕಾರ್ವಿುಕ ಸಮಸ್ಯೆ ಎದುರಿಸುತ್ತಿವೆ. ಬಹಳಷ್ಟು ಸ್ಟಾರ್ಟಪ್​ಗಳು ತಮ್ಮ ವ್ಯವಹಾರಗಳಲ್ಲಿ ಬದಲಾವಣೆ ಮಾಡಿ ಪ್ರಸಕ್ತ ಸನ್ನಿವೇಶಕ್ಕೆ ಹೊಂದಿಕೊಳ್ಳಲು ಯೋಚಿಸುತ್ತಿವೆ. ಇಂಥ ಸನ್ನಿವೇಶದಲ್ಲಿ, ಅವುಗಳ ಆರ್ಥಿಕ ಬಿಕ್ಕಟ್ಟನ್ನು ಬಗೆಹರಿಸಲು ಅವುಗಳಿಗೆ ಹಣಕಾಸಿನ ನೆರವನ್ನು ಒದಗಿಸುವುದು ಅಗತ್ಯ ಎಂದು ನ್ಯಾಸ್​ಕಾಂ ಪ್ರತಿಪಾದಿಸಿದೆ.

ಇದನ್ನೂ ಓದಿ: ವಿದ್ಯಾರ್ಥಿಗಳಿಗೆ ಶುಭಸುದ್ದಿ: ಶೀಘ್ರವೇ ಏಕಕಾಲದಲ್ಲಿ 2 ಪದವಿ ವ್ಯಾಸಂಗ ಮಾಡುವ ಅವಕಾಶ ನಿಮ್ಮದಾಗಲಿದೆ...

ಯೋಜನೆಗಳು ಮುಂದಕ್ಕೆ: ಇಡೀ ಸ್ಟಾರ್ಟ್​ಅಪ್ ವಾತಾವರಣವೇ ಹಾಳಾಗಿದ್ದು, ಕರೊನಾದಿಂದಾಗಿ ಅವುಗಳ ಚಟುವಟಿಕೆಗಳ ಸರಪಣಿಯೇ ಅಸ್ತವ್ಯಸ್ತಗೊಂಡಿದೆ ಎಂದು ನ್ಯಾಸ್​ಕಾಂ ಹೇಳಿದೆ. ತಂತ್ರಜ್ಞಾನ ಉನ್ನತೀಕರಣ, ಪ್ರಾಡಕ್ಟ್ ಅಭಿವೃದ್ಧಿ, ವ್ಯವಹಾರಗಳು, ನಿಧಿಯ ವ್ಯವಸ್ಥೆ ಹಾಗೂ ವ್ಯಾಪಾರ ಅಭಿವೃದ್ಧಿ ಯೋಜನೆಗಳು ಬಹುತೇಕ ಎರಡು ತಿಂಗಳು ವಿಳಂಬಗೊಂಡಿವೆ. ಅನಿಶ್ಚಯತೆಯಿಂದಾಗಿ ಹಣ ಪಾವತಿ ಆಗದಿರುವುದು ಮುಖ್ಯ ಸಮಸ್ಯೆಯಾಗಿದೆ. ರೀಟೇಲ್ ಮತ್ತು ಫಿಂಚ್ ಸ್ಟಾರ್ಟಪ್​ಗಳು ಹೆಚ್ಚು ಬಾಧಿತವಾಗಿವೆ. ಈಗಿನ ಸಮಸ್ಯೆ ಇನ್ನೂ ಒಂದು ವರ್ಷ ಮುಂದುವರಿಯಬಹುದೆಂಬುದು ಬಹಳಷ್ಟು ಸಂಸ್ಥೆಗಳ ಅಂದಾಜಾಗಿದೆ. ಹೀಗಾಗಿ ನಿಯಮಗಳ ಸರಳೀಕರಣವಾಗಬೇಕು ಹಾಗೂ ಸರ್ಕಾರಿ ಖರೀದಿ ಅವಕಾಶ ಹೆಚ್ಚಬೇಕು ಎಂಬುದು ಅವುಗಳ ಅಭಿಪ್ರಾಯವಾಗಿದೆ.

https://www.vijayavani.net/chilli-powder-attacks-on-women-continue/